ଲକ୍ଷ୍ନୌ,୨୮।୪: କରୋନା ମହାମାରୀ ସଂକ୍ରମଣ ଯୋଗୁ ଦେଶରେ ସ୍ଥିତି ଅସମ୍ଭାଳ ହୋଇଛି। ଏପରିସ୍ଥଳେ କରୋନା ସଂକ୍ରମଣ ଭୟରେ କେତେକ ଲୋକଙ୍କ ମଧ୍ୟରେ ମାନବିକତା ନ ଥିବା ଭଳି ମନେ ହେଉଛି। ଏଭଳି ଏକ ଘଟଣା ଉତ୍ତରପ୍ରଦେଶ ଜୋନ୍ପୁରରେ ଘଟିଛି। ସ୍ଥାନୀୟ ମଣ୍ଡିୟାହୁଂ ଅଞ୍ଚଳରେ ତିଲକଧାରୀ ସିଂଙ୍କ ସ୍ତ୍ରୀ ରାଜକୁମାରୀଙ୍କ ଦେହ ଦୀର୍ଘଦିନ ଧରି ଖରାପ ଥିଲା। ସେ ଘରି ରହି ଚିକିତ୍ସିତ ହେଉଥିଲେ। ସୋମବାର ଅବସ୍ଥା ଗୁରୁତର ହେବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ରାଜକୁମାରୀଙ୍କ ମୃତ୍ୟୁ ଘଟିଥିଲା। ଏହାପରେ ଆମ୍ବୁଲାନ୍ସ ଯୋଗେ ତାଙ୍କର ମୃତଦେହ ମଙ୍ଗଳବାର ଘରକୁ ଆସିଥିଲା। ତେବେ ଗାଁ ଅନ୍ତିମ ସଂସ୍କାର ପାଇଁ ସମସ୍ୟା ଉପୁଜିଥିଲା। କରୋନା ସଂକ୍ରମଣ ଭୟରେ କେହି ତିଲକଧାରୀଙ୍କ ଘରକୁ ଆସିନ ଥିଲେ। ସମସ୍ତେ କବାଟ ଝରକା ବନ୍ଦ କରି ଘରେ ଲୁଚି ରହିଥିଲେ। ଶେଷରେ ତିଲକଧାରୀ ସ୍ତ୍ରୀଙ୍କ ମୃତଦେହକୁ ସାଇକେଲରେ ବୋହି ନେଇ ନଦୀ କୂଳରେ ଅନ୍ତିମ ସଂସ୍କାର କରିଥିଲେ। ଏବେ ଏହି ଘଟଣା ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
