କୋଲକାତା,୨୪।୩: ପଶ୍ଚିମବଙ୍ଗରେ ବିଧାନସଭା ନିର୍ବାଚନ ତାତି ବଢ଼ିବାରେ ଲାଗିଛି। ନନ୍ଦିଗ୍ରାମରୁ ମୁଖ୍ୟମନ୍ତ୍ରୀ ମମତା ବାନାର୍ଜୀ ପ୍ରାର୍ଥୀପତ୍ର ଦାଖଲ କରିଛନ୍ତି। ତାଙ୍କ ବିରୋଧରେ ଭାଜପା ପକ୍ଷରୁ ଶୁଭେନ୍ଦୁ ଅଧିକାରୀଙ୍କୁ ନନ୍ଦିଗ୍ରାମରୁ ଟିକଟ ଦିଆଯାଇଛି। ତେବେ ଏବେ ରୋଚକ ଘଟଣା ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ନନ୍ଦିଗ୍ରାମ ଆସନରୁ ମମତା ଏବଂ ଶୁଭେନ୍ଦୁଙ୍କ ବିରୋଧରେ ଲଢ଼ିବା ପାଇଁ ଯୁବ ଡ୍ରାଇଭର ସ୍ବପନ। ସେ କହିଛନ୍ତି ନନ୍ଦିଗ୍ରାମରେ ବହୁ ସମସ୍ୟା ରହିଛି। ଏସବୁ ସୁଧାର ହୋଇ ପାରିନାହିଁ। ତେଣୁ ସେ ନିର୍ଦ୍ଦଳୀୟ ପ୍ରାର୍ଥୀ ଭାବେ ଏହି ଅସନରୁ ପ୍ରତିଦ୍ୱନ୍ଦ୍ୱିତା କରୁଥିବା କହିଛନ୍ତି। ରାଜ୍ୟରେ ପ୍ରତିବର୍ଷ ଘଟୁଥିବା ସଡ଼କ ଦୁର୍ଘଟଣାରେ ବହୁ ଲୋକଙ୍କ ଜୀବନ ଯାଇଥାଏ। ତାଙ୍କ ପିତାଙ୍କର ମଧ୍ୟ ଏଭଳି ମୃତ୍ୟୁ ଘଟିଛି। ତାଙ୍କ ପିତାଙ୍କ ମୋଟରସାଇକେଲକୁ ଏକ ବସ୍ ଧକ୍କା ଦେଇଥିଲା। ରାଜ୍ୟ ପରିବହନ ବିଭାଗରେ ବିନା ଲାଇସେନ୍ସ୍ରେ ଗାଡ଼ି ଚଳାଉଥିବା ଡ୍ରାଇଭର ରହିଛନ୍ତି। ଏନେଇ ସ୍ବପନ ବର୍ତ୍ତମାନର ଭାଜପା ପ୍ରାର୍ଥୀ ତଥା ପୂର୍ବତନ ସଡ଼କ ପରିବହନ ମନ୍ତ୍ରୀ ଶୁଭେନ୍ଦୁଙ୍କୁ ଚିଠି ଲେଖି କେତେକ ଅନୁରୋଧ କରିଥିଲେ। ମାତ୍ର ତାଙ୍କ ଚିଠିର ଭିନ୍ନ ଅର୍ଥ ବାହାରି ଥିଲା। ପ୍ରତିଦିନ କାମ ସମୟରେ ୨୦-୩୦ ଟଙ୍କା ପୋଲିସଙ୍କୁ ଲାଞ୍ଚ ଦେବାକୁ ପଡୁଥିବା ସ୍ବପନ ଅଭିଯୋଗ କରିଛନ୍ତି। ଏସବୁ ସମସ୍ୟାର ନିରାକରଣ କରାଯାଉ ନ ଥିବା ସେ କହିଛନ୍ତି। ସୂଚନାଯୋଗ୍ୟ, ନନ୍ଦିଗ୍ରାମରେ ଏପ୍ରିଲ୍ ୧ରେ ମତଦାନ କରାଯିବ।
