ବୁଗୁଡ଼ା,୨୮ା୧: ଗଞ୍ଜାମ ଜିଲା ବୁଗୁଡ଼ା ବନାଞ୍ଚଳ ମାଣିତରା ସେକ୍ସନ ବଡ଼ପଥର କୁଣ୍ଡାଖାଇ ମୁଣ୍ଡିଆରେ ଗୁରୁବାର ସକାଳେ ଫାଶରେ ପଡିଥିବା ଏକ ବାର୍ହାକୁ ଖାଇବାକୁ ଆସି ଫସି ଯାଇଥିଲା କଲରାପତରିଆ ବାଘ। ବନ କର୍ମଚାରୀ ସ୍ଥାନୀୟ ଯୁବକଙ୍କ ସହଯୋଗରେ ବାଘକୁ ଉଦ୍ଧାର କରାଯାଇଛି। ହେଲେ ବାଘକୁ ଜଙ୍ଗଲରେ ଛାଡିବାକୁ ନେବା ବେଳେ ଜଣେ ଯୁବକଙ୍କୁ କାମୁଡି ଦେବାରୁ ତାଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି।
ପ୍ରକାଶ ଯେ, କୌଣସି ଶିକାରୀ ବାର୍ହା ଶିକାର ପାଇଁ ବଡ଼ପଥର ପାହାଡ଼ରେ ବୁଧବାର ରାତିରେ ଫାଶ ବିଛାଇଥିଲେ। ସେଥିରୁ ଗୋଟିଏ ଫାଶରେ ଏକ ବାର୍ହା ପଡିଥିଲା। ଏକ କଲରାପତରିଆ ବାଘ ଖାଇବାକୁ ଆସିବା ବେଳେ ଅନ୍ୟ ଏକ ଫାଶରେ ପଡିଯାଇଥିଲା। ଫାଶରେ ପଡି ବାଘଟି ଗର୍ଜନ କରିବାରୁ ସ୍ଥାନୀୟ ଲୋକେ ଶୁଣି ବନବିଭାଗକୁ ଜଣାଇଥିଲେ। ବନାଞ୍ଚଳ ଅଧିକାରୀ ଫକୀର ଚରଣ ବେହେରାଙ୍କ ନେତୃତ୍ୱରେ ବନ କର୍ମଚାରୀମାନେ ପହଞ୍ଚତ୍ ସ୍ଥାନୀୟ ଯୁବକଙ୍କ ସହଯୋଗରେ ଜାଲ ବିଛାଇ ବାଘଟିକୁ କାବୁ କରିଥିଲେ। ବାଘ ଦେଖିବାକୁ ଆଖପାଖ ଗାଁର ଶତାଧିକ ଲୋକ ରୁଣ୍ଡ ହୋଇଥିଲେ। କାବୁ କରି ବାଘକୁ ନେବା ବେଳେ ଦିଲୀପ ଦାଶ ନାମକ ଜଣେ ଯୁବକଙ୍କ ଡାହାଣ ଜଙ୍ଘକୁ କାମୁଡି ଦେଇଥିଲା। ତାଙ୍କୁ ବୁଗୁଡ଼ା ମେଡିକାଲରେ ଭର୍ତ୍ତି କରାଯାଇଛି। ଘଟଣା ପରେ ଭଞ୍ଜନଗର ମୋବାଇଲ ଟିମ୍ ଏବଂ ଡିଏଫ୍ଓ ସୂର୍ଯ୍ୟ ନାରାୟଣ ବେହୁରା, ଏସିଏଫ୍ ଶଙ୍କର୍ଷଣ ବେହେରା ଓ ପ୍ରଭାକର ନାୟକ ପହଞ୍ଚତ୍ ଉଦ୍ଧାର ବାଘକୁ ବୁଗୁଡ଼ା ବନାଞ୍ଚଳ କିରିଆମ୍ବା ସଂରକ୍ଷିତ ଜଙ୍ଗଲରେ ବିଭାଗୀୟ ଅଧିକାରୀଙ୍କ ଉପସ୍ଥିତିରେ ଛଡାଯାଇଛି।
