ବାହାନଗା, ୨୨ା୪(ଡି.ଏନ.ଏ.)-ବାଲେଶ୍ୱର ଜିଲା ବାହାନଗା ବ୍ଲକର ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ କିଛି ଅଞ୍ଚଳକୁ ଅଗ୍ନିଶମ ବିଭାଗ ଦ୍ୱାରା ସାନିଟାଇଜ୍ କରାଯାଇଛି। ଗୋପାଳପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ପ୍ରତ୍ୟେକ ଦିନ ଶହ ଶହ ରୋଗୀ ଚାଲିଆସୁଥିବାରୁ ଏହାକୁ ଆଖିଆଗରେ ରଖି ପ୍ରଶାସନ ପକ୍ଷରୁ ପ୍ରଥମେ ସ୍ବାସ୍ଥ୍ୟକେନ୍ଦ୍ରକୁ ଅଗ୍ନିଶମ ବିଭାଗ ଗାଡି ଦ୍ୱାରା ସାନିଟାଇଜ କରାଯାଇଛି। ପରେ ଗୋପାଳପୁର ପଞ୍ଚାୟତ ଜୁଣିଆଁ ବଜାର ଓ ତାର ଆଖପାଖ ଗ୍ରାମକୁ ସାନିଟାଇଜ କରାଯାଇଛି । ଗୁରୁବାର ଗୋପାଳପୁର ବଜାରକୁ ମଧ୍ୟ ସାନିଟାଇଜ କରାଯିବ ବୋଲି ତହସିଲଦାର ଜିତେନ୍ଦ୍ର କୁମାର କର କହିଛନ୍ତି। ବଜାର ଦିନ ୧୦ଟା ପର୍ଯ୍ୟନ୍ତ ଖୋଲା ରହୁଥିବା ବେଳେ ମାସ୍କ ମୁହଁରେ ନ ପିନ୍ଧିଲେ ୨ଶହ ଟଙ୍କା ଜରିମାନା ଆଦାୟ କରାଯାଉଛି। ଫଳରେ ଦୁଇଦିନ ମଧ୍ୟରେ ତହସିଲ ପ୍ରଶାସନ ୮ହଜାର ଟଙ୍କା ଜରିମାନା ଆଦାୟ କରିସାରିଲାଣି। ବଜାରରେ ପ୍ରଶାସନ ତରଫରୁ ଲୋକମାନଙ୍କୁ ସାମାଜିକ ଦୂରତ୍ୱ ରଖି କିଣାବିକା କରିବା ପାଇଁ ସଚେତନ କରୁଥିବା ବେଳେ ଖିଲାପକାରୀଙ୍କ ପ୍ରତି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ମୋଟରସାଇକେଲ ଧରି ବଜାରକୁ ନ ଆସିବା ପାଇଁ ପୋଲିସ୍ ଓ ତହସିଲ ପ୍ରଶାସନ ବାରଣ କରିବା ସହିତ ଯେଉଁମାନେ ନ ମାନି ଚଳପ୍ରଚଳ କରୁଛନ୍ତି ସେମାନଙ୍କୁ ଆଣ୍ଠେଇବା ସହିତ ଜରିମାନା ଆଦାୟ କରାଯାଉଛି। ଫଳରେ ଲୋକମାନେ କିପରି ସୁରକ୍ଷିତ ରହିବା ସହିତ ଅଞ୍ଚଳକୁ କରୋନା ସଂକ୍ରମଣ ନ ହେବ ସେଥିପ୍ରତି ପ୍ରଶାସନ ସଜାଗ ରହିଥିବା ଗୋପାଳପୁର ଫାଣ୍ଡି ଅଧିକାରୀ ବଂଶୀଧର ପ୍ରଧାନ ପ୍ରକାଶ କରିଥିଲେ।
