ନୂଆଦିଲ୍ଲୀ,୨୪ା୮: ବେସରକାରୀ ବିମାନ ଚଳାଚଳ ମହାନିର୍ଦ୍ଦେଶାଳୟ (ଡିଜିସିଏ) ଟାଟା ଗ୍ରୁପ୍ ମାଲିକାନାରେ ଥିବା ଏୟାରଇଣ୍ଡିଆ ଉପରେ ୯୦ ଲକ୍ଷ ଟଙ୍କା ଜରିମାନା ଲଗାଇଛି। ଯୋଗ୍ୟତା ନ ଥିବା ପାଇଲଟ ବିମାନ ଉଡ଼ାଉଥିବା ତଦନ୍ତରୁ ଜଣାପଡ଼ିବା ପରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହା ବ୍ୟତୀତ ଏୟାର ଇଣ୍ଡିଆର ନିର୍ଦ୍ଦେଶକ (ଅପରେଶନ୍ସ) ପଙ୍କୁଲ ମାଥୁର ଏବଂ ନିର୍ଦ୍ଦେଶକ (ଟ୍ରେନିଂ) ମନୀଷ ବାସବଦାଙ୍କୁ ଯଥାକ୍ରମେ ୬ ଲକ୍ଷ ଓ ୩ ଲକ୍ଷ ଟଙ୍କା ଜରିମାନା କରାଯାଇଛି। ଏୟାର ଇଣ୍ଡିଆ ଲିଃ ଜଣେ ନନ୍ଟ୍ରେନର ଲାଇନ କ୍ୟାପ୍ଟେନ ଓ ଜଣେ ନନ୍-ଲାଇନ ରିଲିଜ୍ଡ ଫାଷ୍ଟ ଅଫିସରଙ୍କ କମାଣ୍ଡରେ ବିମାନ ଚଳାଉଥିଲା। ଏହା ନିରାପତ୍ତାର ଗୁରୁତର ଉଲ୍ଲଂଘନ ବୋଲି ଡିଜିସିଏ ଉଲ୍ଲେଖ କରିଛି। ଗତ ଜୁଲାଇ ୨୨ରେ ଡିଜିସିଏ ଏଥିପାଇଁ ସ୍ପଷ୍ଟୀକରଣ ମାଗିଥିଲେ ମଧ୍ୟ କୌଣସି ଉତ୍ତର ମିଳି ନ ଥିଲା। ଜୁଲାଇ ୧୦ରେ ସ୍ବେଚ୍ଛାକୃତ ରିପୋର୍ଟ ମିଳିବା ପରେ ଡିଜିସିଏ ତଦନ୍ତ ଆରମ୍ଭ କରିଥିଲା। ଏୟାରଲାଇନ୍ସର ବିଭିନ୍ନ ପଦବୀରେ ଥିବା କର୍ମଚାରୀଙ୍କ ଦ୍ୱାରା ନିୟାମକ ବ୍ୟବସ୍ଥାରେ ଅନେକ ଉଲ୍ଲଂଘନ ହୋଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଥିଲା।
