ଦାରିଙ୍ଗବାଡ଼ି, ୪/୧୦ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଗ୍ରୀନବାଡ଼ି ପଞ୍ଚାୟତର ଗ୍ରାମ୍ୟ କମିଟି ପକ୍ଷରୁ ନିଜ ଗାଁ ଶ୍ମଶାନ ଜମିକୁ ନିଜେ ସଫେଇ କରି ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି।
ପ୍ରକାଶ ଯେ, ବ୍ଲକ ମୁଖ୍ୟାଳୟଠାରୁ ମାତ୍ର ଗୋଟିଏ କିଲୋମିଟର ଦୂରରେ ଏହି ଶ୍ମଶାନଟି ରହିଛି। କିନ୍ତୁ ଶେଷ ଯାତ୍ରା କରୁଥିବା ବ୍ୟକ୍ତିଙ୍କୁ ସମ୍ମାନ ଜଣାଇ ମୃତଦେହ ଦାହ କରିବା ଏବଂ ଶ୍ମଶାନକୁ ଯାଉଥିବା ଲୋକଙ୍କ ପାଇଁ ମୁଣ୍ଡ ଗୁଞ୍ଜିବାକୁ ଏଠାରେ ଗୃହଟିଏ ମଧ୍ୟ ନାହିଁ। ଫଳରେ ଗ୍ରାମବାସୀ ବହୁ ହଇରାଣ ହେଉଛନ୍ତି। ବିଶେଷକରି ବର୍ଷାଦିନେ ମୃତଦେହ ଦାହ କରାଯିବା ସମୟରେ ଲୋକେ ବିଭିନ୍ନ ସମସ୍ୟାର ସମ୍ମୁଖୀନ ହେଉଥିବା ଗ୍ରାମ୍ୟ କମିଟି ସମ୍ପାଦକ ଲିଟୁ ନାୟକ କହିଛନ୍ତି।
ସେହିପରି ଶ୍ମଶାନକୁ ଯାତାୟାତ କରୁଥିବା ରାସ୍ତାରେ କଲଭର୍ଟଟିଏ ନଥିବାରୁ ବର୍ଷା ସମୟରେ ଶ୍ମଶାନକୁ ମୃତଦେହ ନେଇଯିବା ମୁସ୍କିଲ ହେଉଥିବା ଗ୍ରାମ୍ୟ କମିଟି ସଭାପତି ଧର୍ମେନ୍ଦ୍ର ପ୍ରଧାନ ଓ ଉପସଭାପତି ତ୍ରିଲୋଚନା ନାୟକ ପ୍ରମୁଖ ଅଭିଯୋଗ କରିଛନ୍ତି।
ଏନେଇ ଗ୍ରାମ୍ୟ କମିଟି ପକ୍ଷରୁ ବାରମ୍ବାର ପ୍ରଶାସନ ନିକଟରେ ଗୁହାରି ଜଣାଇଥିଲେ ମଧ୍ୟ ସମସ୍ୟାର ସମାଧାନ ହୋଇନଥିବା କମିଟି ପକ୍ଷରୁ ଉଦ୍ବେଗର ସହ କୁହାଯାଇଛି।
ଗାଁ ବୈଠକର ନିଷ୍ପତ୍ତିକ୍ରମେ ଏବେ ଶ୍ମଶାନ ଜମିରେ ଉଠିଥିବା ଅନାବନା ଗଛ ଓ ଘାସ କାଟି ସଫେଇ କରାଯାଇଛି। ଏହି ସଫେଇ ପ୍ରକ୍ରିୟା ନିୟମିତ ଭାବେ କରାଯିବ ବୋଲି କମିଟି ପକ୍ଷରୁ ନିଷ୍ପତ୍ତି ନିଆଯାଇଥିବା ଜଣାପଡ଼ିଛି।
