ଭୁବନେଶ୍ୱର,୨୬।୧୧(ବ୍ୟୁରୋ): ଭୁବନେଶ୍ୱରରେ ପାର୍କର ସୁପରିଚାଳନା ପାଇଁ ସହରାଞ୍ଚଳ କର୍ତ୍ତୃପକ୍ଷ ସ୍ବତନ୍ତ୍ର ରଣନୀତି କରିଛନ୍ତି। ପାର୍କଗୁଡ଼ିକର ଆୟତନ ଅନୁସାରେ ଏହାର ଶ୍ରେଣୀଭୁକ୍ତ କରାଯାଇଛି। ଏହି ଅନୁସାରେ ଅଧ ଏକରରୁ କମ୍ ପରିସୀମା ଥିବା ପାର୍କଗୁଡ଼ିକୁ ଭୁବନେଶ୍ୱର ମହାନଗର ନିଗମ(ବିଏମ୍ସି)ର ତତ୍ତ୍ୱାବଧାନରେ ଏବଂ ଅଧ ଏକରରୁ ଅଧିକ ପରିସୀମା ଥିବା ପାର୍କଗୁଡ଼ିକ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ)ର ତତ୍ତ୍ୱାବଧାନରେ ରଖିବାକୁ ବିଏମ୍ସି କମିଶନର ତଥା ବିଡିଏର ଉପାଧ୍ୟକ୍ଷ ସଞ୍ଜୟ କୁମାର ସିଂହ ନିର୍ଦ୍ଦେଶ ଦେଇଛନ୍ତି। ଏହାକୁ ଭିତ୍ତିକରି ବିଡିଏରୁ ୯ଟି ପାର୍କ ବିଏମ୍ସିକୁ ହସ୍ତାନ୍ତର କରାଯାଇଛି।
ବର୍ତ୍ତମାନ ବିଏମ୍ସି ତତ୍ତ୍ୱାବଧାନରେ ମୋଟ୍ ୬୨ଟି କଲୋନୀ ପାର୍କ ରହିଥିବା ବେଳେ ସେଗୁଡ଼ିକ ମଧ୍ୟରୁ ୨୯ଟି ପାର୍କ ନର୍ଥ ଜୋନ୍ରେ, ୧୯ଟି ଦକ୍ଷିଣ-ପଶ୍ଚିମ ଜୋନ୍ରେ ଏବଂ ୧୪ଟି ଦକ୍ଷିଣ-ପୂର୍ବ ଜୋନ୍ରେ ରହିଛି। ତେବେ ଏଗୁଡ଼ିକର ପରିଚାଳନା ଗୋଷ୍ଠୀଭିତ୍ତିକ କରାଯାଇ ପବ୍ଲିକ୍ ପ୍ରାଇଭେଟ୍ ପାର୍ଟନର୍ସିପ୍ ବା ପିପିପି ମୋଡ୍ରେ ସଫଳତା ଲାଭ କରିଛି। ୬୨ଟି ପାର୍କ ମଧ୍ୟରୁ ୨୨ଟି ପାର୍କ ମିଶନ୍ ଶକ୍ତି ସ୍ବୟଂ ସହାୟକ ଗୋଷ୍ଠୀଙ୍କ ପରିଚାଳନାରେ ରହିଥିବା ବେଳେ ଏଥିରୁ ୧୮ଟି ପାର୍କ ଅବାସିକ କଲ୍ୟାଣ ସଂଘ ବା ଆର୍ଡବ୍ଲ୍ୟୁଏ ମାଧ୍ୟମରେ ପରିଚାଳନା କରାଯାଉଛି।
