ଥୁଆମୂଳ ରାମପୁର,୮।୭(ଦୁର୍ଗା କୀର୍ତ୍ତି): ଥୁଆମୂଳ ରାମପୁର ଦକ୍ଷିଣ ବନାଞ୍ଚଳ ଏବଂ ତାଲୁକ ଆଇନ ସେବା ସମିତିର ମିଳିତ ଆନୁକୂଲ୍ୟରେ ସ୍ଥାନୀୟ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ୭୭ତମ ବନ ମହୋତ୍ସବ ସପ୍ତାହ-୨୦୨୬ ଉଦଯାପିତ ହୋଇଯାଇଛି। ଗତ ଜୁଲାଇ ୧ ତାରିଖରୁ ଆରମ୍ଭ ହୋଇଥିବା ଏହି ସପ୍ତାହବ୍ୟାପୀ ହରିତ ଅଭିଯାନ ସୋମବାର ଦିନ ବିଦ୍ୟାଳୟ ପ୍ରାଙ୍ଗଣରେ ବୃକ୍ଷରୋପଣ ସହ ଶେଷ ହୋଇଛି ।
ଦକ୍ଷିଣ ବନାଞ୍ଚଳ ରେଞ୍ଜର ତ୍ରିନାଥ ସେଠୀ ଏବଂ ଡେପୁଟି ରେଞ୍ଜର ସୈରିନ୍ଧ୍ରୀ ବାଗ୍ଙ୍କ ପ୍ରତ୍ୟକ୍ଷ ନିର୍ଦ୍ଦେଶନାରେ ଆୟୋଜିତ ଏହି ଉଦଯାପନୀ ସମାରୋହରେ ଜେଏମ୍ଏଫ୍ସି କୋର୍ଟର ବିଚାରପତି ତଥା ତାଲୁକ ଆଇନ ସେବା ପ୍ରାଧିକରଣ ସମିତିର ଅଧ୍ୟକ୍ଷ ଡ଼ଃ ତାରିଣୀ ପ୍ରସାଦ ସାହୁ ମୁଖ୍ୟ ଅତିଥି ଭାବେ ଯୋଗ ଦେଇ ଚାରା ରୋପଣ କରିଥିଲେ। ଏହି ଅବସରରେ ସେ ଛାତ୍ରୀଛାତ୍ରମାନଙ୍କୁ ‘ବୃକ୍ଷ ହିଁ ଜୀବନ’ ବୋଲି କହି ପରିବେଶ ସୁରକ୍ଷା ସମ୍ପର୍କରେ ସଚେତନ କରିଥିଲେ। ଚଳିତ ବର୍ଷ ଏହି ବନ ମହୋତ୍ସବ ଅନ୍ତର୍ଗତ ବ୍ଲକର ୫ଟି ପ୍ରମୁଖ ସ୍ଥାନ—କୁମୁଡ଼ାବାହାଲ ଗ୍ରାମବିକାଶ ଶିକ୍ଷା ନିକେତନ, ଅଗ୍ନିଶମ ବିଭାଗ କାର୍ଯ୍ୟାଳୟ, ଦର୍ଶନୀୟ ସ୍ଥାନ ‘ହେଲୋ ପଏଣ୍ଟ’, ଶୁଣ୍ଢିଯୁବା ପ୍ରାଥମିକ ବିଦ୍ୟାଳୟ ଏବଂ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ପରିସରରେ ପ୍ରାୟ ୨୦୦ଟି ସୁନ୍ଦର ଚାରା ରୋପଣ କରାଯାଇଛି। ଏଥିରେ ଚମ୍ପା, କାଜୁ, ଆମ୍ବ, ଅଁଳା, କାଞ୍ଚନ ଓ ଶିଶୁ ଆଦି ପ୍ରଜାତିର ବୃକ୍ଷ ସାମିଲ ରହିଛି।
କାର୍ଯ୍ୟକ୍ରମରେ ବନ ବିଭାଗ ପକ୍ଷରୁ ଫରେଷ୍ଟର ଏକାଦଶୀ ନାଏକ, ଫରେଷ୍ଟ ଗାର୍ଡ ସୁଧାଂଶୁ ସାହୁ, ରଞ୍ଜିତା ଖଡ଼ିଆ ଏବଂ ବିଦ୍ୟାଳୟର ପ୍ରଧାନ ଶିକ୍ଷକ ନାଗେଶ୍ୱର ନାଏକଙ୍କ ସମେତ ସମସ୍ତ ଶିକ୍ଷକ-ଶିକ୍ଷୟିତ୍ରୀ ଉପସ୍ଥିତ ଥିଲେ। ଅପରପକ୍ଷରେ ନ୍ୟାୟିକ ବିଭାଗ ପକ୍ଷରୁ କୋର୍ଟର ହେଡ୍ କ୍ଲର୍କ ଅଶୋକ ସାହୁ, ଜୁନିଅର କ୍ଲର୍କ ଜିମି ବେହେରା, ଏପିପି ପ୍ରିୟଙ୍କା ମାଝୀ, ଏପିପି ସୁଧାଂଶୁ ନାଏକ, ସିଏସଆଇ ରାଜଶେଖର ପାଡ଼େଲା ଏବଂ ଆଇନଜୀବୀ ମନୋରଞ୍ଜନ ନାଏକ ଓ ଦିଲ୍ଲୀପ କୁମାର ନାଏକ ପ୍ରମୁଖ ଉପସ୍ଥିତ ରହି ବୃକ୍ଷରୋପଣ କରିଥିଲେ। ବନାଞ୍ଚଳ ଅଧିକାରୀ ସୂଚନା ଦେଇ କହିଛନ୍ତି ଯେ, ଏହା କେବଳ ସରକାରୀ ସପ୍ତାହ ମଧ୍ୟରେ ସୀମିତ ନୁହେଁ, ଆଗାମୀ ଦିନରେ ମଧ୍ୟ ଯେକୌଣସି ଅନୁଷ୍ଠାନ ଯୋଗାଯୋଗ କଲେ ବନ ବିଭାଗ ଚାରା ଯୋଗାଇବା ସହ ବୃକ୍ଷରୋପଣରେ ସହଯୋଗ କରିବ।
