ସମ୍ବଲପୁର,୧୫।୧୧(ଭବାନୀ ଶଙ୍କର ଭୋଇ)\:ବିଜେଡି ଦୟାରୁ ମୋ ନାଁରେ ୭୨ କେସ୍ । କେସ୍, ମୋ ପାଇଁ କେସ୍ ଗୋଟେ ଉପହାର ସଦୃଶ ା ବିଜେଡି ସରକାର ମୋତେ ନିର୍ଯାତନା ଦେବା ପାଇଁ କେସ୍ ଦେଉଥିଲା। ବିରୋଧୀ ଦଳରେ ରହିଲେ କେସ୍ ହେବ। ଯାହା ନାମରେ କେସ୍ ନାହିଁ ସେ ରାଜନୀତି କରିବା ପାଇଁ ଅନଫିଟ୍। ବିରୋଧୀ ଦଳରେ ଥିବା ସମୟରେ ଲୋକଙ୍କ ପାଇଁ ସ୍ବର ଉତ୍ତୋଳନ କରୁଥିଲି, ରାଜ୍ୟ ସରକାରକୁ ଘେରୁଥିଲି। ରାଜନୈତିକ ଆନ୍ଦୋଳନ କଲେ ବି ପୋଲିସ ମୁହାଁମୁହିଁ ପରିସ୍ଥିତି ସୃଷ୍ଟି କରି ମୋ ନାମରେ ମାମଲା ରୁଜୁ କରୁଥିଲା। ସେଥିପାଇଁ ମୋ ନାମରେ କେଉଁଠି କ’ଣ ମାମଲା ଅଛି ମୁଁ ତା’ର ହିସାବ ରଖିନାହିଁ। ପୋଲିସ ତତ୍କାଳୀନ ସରକାର ଚାପରେ ମୋ ନାମରେ କେସ୍ କରୁଥିଲା ।
ସେଥିପାଇଁ ମୁଁ ଆଦୌ ଚିନ୍ତିତ ନୁହେଁ ବୋଲି କହିଛନ୍ତି ସମ୍ବଲପୁର ବିଧାୟକ ଜୟନାରାୟଣ ମିଶ୍ର।
ଗୁରୁବାର ସମ୍ବଲପୁର ଭାଜପା କାର୍ଯ୍ୟାଳୟରେ ଗଣମାଧ୍ୟମ ପ୍ରତିନିଧି ସୁପ୍ରିମ କୋର୍ଟରେ ଆଗୁଆ ଜାମିନ୍ ଖାରଜ ହୋଇଥିବା ନେଇ ବିଧାୟକ ଜୟନାରାୟଣ ମିଶ୍ରଙ୍କ ପ୍ରତିକ୍ରିୟା ନେବାକୁ ଚାହିଁଥିଲେ। ହେଲେ ସେହି ବିଷୟରେ ସେ କିଛି ସୂଚନା ପାଇନହାନ୍ତି ବୋଲି କହିଥିଲେ। ଏହାପରେ ଗଣମାଧ୍ୟମ କେଉଁ କେସ୍ର ଆବେଦନ ଖାରଜ ହୋଇଛି ବୋଲି ପ୍ରଶ୍ନ କରିବାରୁ ତାଙ୍କ ନାମରେ ୭୨ ମାମଲା ରହିଥିବାରୁ କେଉଁ କେସ୍ କେଉଁ କୋର୍ଟରେ ଚାଲିଛି ସେ ନିଜେ ଜାଣନ୍ତି ନାହିଁ ବୋଲି କହିଥିଲେ। ଅନେକ କେସ୍ ଖାରଜ ହୋଇସାରିଛି ଏବଂ ବାକି ସବୁ ମଧ୍ୟ ୨- ୩ ମାସରେ ଖାରଜ ହୋଇଯିବ ବୋଲି ସେ ଦୃଢ଼ୋକ୍ତି ପ୍ରକାଶ କରିଥିଲେ।
ସୁପ୍ରିମକୋର୍ଟରେ ଅଗ୍ରିମ ଜାମିନ ଆବେଦନ ଖାରଜ ହୋଇଥିବାରୁ ଆଗକୁ ମନ୍ତ୍ରିମଣ୍ଡଳ ସମ୍ପ୍ରସାରଣରେ ସୁଯୋଗ ମିଳିବା ନେଇ ଆଶଙ୍କା ରହିଛି କି ବୋଲି ଖବରଦାତାମାନେ ପ୍ରଶ୍ନ କରିବାରୁ ସେ ମନ୍ତ୍ରୀ ହେବା ପାଇଁ ଲାଳାୟିତ ନ ଥିବା କହିଥିଲେ। ପୁନଶ୍ଚ କେସ୍ ସହିତ ମନ୍ତ୍ରିମଣ୍ଡଳରେ ସାମିଲ ହେବାର କୌଣସି ସମ୍ପର୍କ ନ ଥିବା ସେ କହିଥିଲେ। ରାଜନେତାମାନଙ୍କ ବ୍ୟବହାର ଲୋକଙ୍କ ପାଇଁ ଉଦାହରଣ ସୃଷ୍ଟି କରିବା କଥା। ତେଣୁ ମହିଳା ପୋଲିସ ଉପରେ ଆକ୍ରମଣ ଘଟଣାକୁ କିଭଳି ଦେଖୁଛନ୍ତି ବୋଲି ଗଣମାଧ୍ୟମ ପ୍ରତିନିଧି ପଚାରିବାରୁ ଜୟନାରାୟଣ କହିଥିଲେ, ଜଣେ ପୋଲିସ ମୋ ଗୋଡ଼କୁ ଜୋତାରେ ମାଡ଼ିଦେବ, ମୁଁ ତାକୁ ଧକ୍କା ନ ଦେଇ କ’ଣ ଅପେକ୍ଷା କରିବି ବୋଲି ସେ ପ୍ରଶ୍ନ କରିଥିଲେ। ଯଦି ପୋଲିସ ଜନସାଧାରଣଙ୍କୁ ବାଡ଼େଇବ, ତେବେ ଜନସାଧାରଣ ପୋଲିସକୁ ଗୋଡ଼େଇ ବାଡ଼େଇବା କଥା। ରାଜନୈତିକ ନେତାଙ୍କ ଭାବମୂର୍ତ୍ତି ତାଙ୍କ କାମକୁ ନେଇ ହୋଇଥାଏ। ସେ ଲୋକଙ୍କ ପାଇଁ କାମ କରୁଛନ୍ତି। ତେଣୁ କେସ୍ ମକଦ୍ଦମାକୁ ନେଇ ଖାତିର କରନ୍ତି ନାହିଁ ବୋଲି ଜୟନାରାୟଣ କହିଛନ୍ତି।
