ନୂଆଦିଲ୍ଲୀ,୧୫।୫: କ୍ୟାନସର ବା କର୍କଟ ଚିକିତ୍ସା ପାଇଁ ସାଧାରଣତଃ ଇମ୍ୟୁନୋଥେରାପି କିମ୍ବା କେମୋଥେରାପି ଦିଆଯାଇଥାଏ। କିନ୍ତୁ ଏହି ଥେରାପି ପାଇଁ ରୋଗୀଙ୍କୁ ଦୀର୍ଘ ସମୟ ଧରି ହସ୍ପିଟାଲରେ ରହିବାକୁ ପଡ଼ିଥାଏ। ଏହି ସମସ୍ୟାର ସମାଧାନ ପାଇଁ ଏବେ ଭାରତରେ ଏକ ନୂଆ କ୍ୟାନ୍ସର ଇଞ୍ଜେକ୍ସନ ଆସିଛି।
କର୍କଟ ଚିକିତ୍ସା ପାଇଁ ଇମ୍ୟୁନୋଥେରାପି ଡ୍ରଗ ‘ଏଟେଜୋଲିଜୁମାବ’ (Atezolizumab) ଲଞ୍ଚ କରାଯାଇଛି, ଯାହା ଭାରତରେ ‘ଟେସେଣ୍ଟ୍ରିକ’ (Tecentriq) ବ୍ରାଣ୍ଡ ନାମରେ ଉପଲବ୍ଧ ହେଉଛି। ଏହି ଇଞ୍ଜେକ୍ସନ ଥେରାପି ଯୋଗୁ ରୋଗୀଙ୍କୁ ଆଉ ଘଣ୍ଟା ଘଣ୍ଟା ଧରି ହସ୍ପିଟାଲରେ ରହିବାକୁ ପଡ଼ିବ ନାହିଁ। ମାତ୍ର ୭ ମିନିଟ ମଧ୍ୟରେ ଏହି ଇଞ୍ଜେକ୍ସନ ରୋଗୀଙ୍କୁ ଦିଆଯାଇପାରିବ।
ଏହି ଇମ୍ୟୁନୋଥେରାପି ଶଟ ସେହି ରୋଗୀଙ୍କ ପାଇଁ ଉଦ୍ଦିଷ୍ଟ, ଯେଉଁମାନେ ନନ-ସ୍ମଲ ସେଲ ଲଙ୍ଗ କ୍ୟାନସର (Lung Cancer) ରେ ପୀଡ଼ିତ। ଭାରତରେ ପ୍ରତିବର୍ଷ ଏହି ପ୍ରକାରର ପ୍ରାୟ ୮୧,୦୦୦ ରୁ ଅଧିକ ମାମଲା ଦେଖାଯାଏ। ତେବେ ଏହି ଶଟ ସବୁ ରୋଗୀଙ୍କୁ ଦିଆଯାଇପାରିବ ନାହିଁ। ଏହା କେବଳ PD-L1 ରିସେପ୍ଟରକୁ ଟାର୍ଗେଟ କରିଥାଏ। ତେଣୁ ଯେଉଁ ରୋଗୀଙ୍କ କ୍ୟାନ୍ସର କୋଷଗୁଡ଼ିକରେ ଏହି ରିସେପ୍ଟର ଅଛି, ସେମାନେ ହିଁ ଏହାର ଲାଭ ଉଠାଇପାରିବେ। ଏକ ଆକଳନ ଅନୁସାରେ, ଅଧାରୁ ଅଧିକ ରୋଗୀ ଏହି ଚିକିତ୍ସା ପାଇଁ ଯୋଗ୍ୟ।
ଏହି ୭ ମିନିଟ କ୍ୟାନ୍ସର ଶଟର ମୂଲ୍ୟ ବେଶ ଅଧିକ। ଏହାର ଗୋଟିଏ ଡୋଜର ଦାମ ପ୍ରାୟ ୩.୭ ଲକ୍ଷ ଟଙ୍କା। ଅଧିକାଂଶ ରୋଗୀଙ୍କୁ ସମ୍ପୂର୍ଣ୍ଣ ଚିକିତ୍ସା ପାଇଁ ପ୍ରାୟ ୬ଟି ଡୋଜ ଆବଶ୍ୟକ ହୋଇଥାଏ। ଏହି ଔଷଧକୁ କେନ୍ଦ୍ର ସରକାରଙ୍କ ସ୍ବାସ୍ଥ୍ୟ ଯୋଜନା (CGHS) ରେ ମଧ୍ୟ ଅନ୍ତର୍ଭୁକ୍ତ କରାଯାଇଛି। ତେବେ ଇଣ୍ଟ୍ରାଭେନସ (ଶିରା ମାଧ୍ୟମରେ ଦିଆଯାଉଥିବା) ଭର୍ସନର ୧,୨୦୦ ମିଗ୍ରା ତୁଳନାରେ ଏହି ଡୋଜ ୧,୮୦୦ ମିଗ୍ରା ଅଟେ, ଫଳରେ ଉଭୟର ମୂଲ୍ୟ ମଧ୍ୟରେ ୨୫,୦୦୦ ରୁ ୩୦,୦୦୦ ଟଙ୍କାର ପାର୍ଥକ୍ୟ ରହିବ। କିନ୍ତୁ ହସ୍ପିଟାଲରେ ଭର୍ତ୍ତି ହେବା ଖର୍ଚ୍ଚକୁ ମିଶାଇଲେ ମୋଟ ଖର୍ଚ୍ଚ ବୃଦ୍ଧି ପାଇବ।
କର୍କଟ କୋଷଗୁଡ଼ିକ ଶରୀରର ରୋଗ ପ୍ରତିରୋଧକ ଶକ୍ତି (Immune System) ରୁ ନିଜକୁ ଲୁଚାଇ ରଖିବାର କ୍ଷମତା ରଖନ୍ତି। ‘ଏଟେଜୋଲିଜୁମାବ’ କ୍ୟାନ୍ସରର ଏହି କ୍ଷମତାକୁ ଛଡ଼ାଇ ନେଇଥାଏ। ଏହାଦ୍ୱାରା ଶରୀରର ଇମ୍ୟୁନ ସିଷ୍ଟମ ବା ରୋଗ ପ୍ରତିରୋଧକ ପ୍ରଣାଳୀ କ୍ୟାନ୍ସର କୋଷଗୁଡ଼ିକୁ ଚିହ୍ନଟ କରି ସେଗୁଡ଼ିକ ଉପରେ ଆକ୍ରମଣ କରିଥାଏ।
ସାଧାରଣତଃ ଆମ ଶରୀରର ଟି-ସେଲ୍ସ (T-cells) ଅସ୍ବାଭାବିକ କୋଷଗୁଡ଼ିକୁ ନଷ୍ଟ କରିଦିଅନ୍ତି। କିନ୍ତୁ କ୍ୟାନସର କୋଷଗୁଡ଼ିକ ନିଜ ସ୍ତରରେ PD-L1 ନାମକ ଏକ ପ୍ରୋଟିନ ପ୍ରଦର୍ଶନ କରନ୍ତି, ଯାହା ଇମ୍ୟୁନ ସେଲ୍ସକୁ ଭୁଲ ସିଗନାଲ ଦିଏ। ଫଳରେ ଇମ୍ୟୁନ ସେଲ୍ସ ସେମାନଙ୍କୁ ଆକ୍ରମଣ କରେ ନାହିଁ ଏବଂ କ୍ୟାନ୍ସର ବଢ଼ିଚାଲେ। ଏହି ନୂଆ ଇଞ୍ଜେକ୍ସନ ସେହି ଭୁଲ ସିଗନାଲକୁ ବନ୍ଦ କରି ଚିକିତ୍ସାରେ ସାହାଯ୍ୟ କରେ।
