ପାରାଦୀପ, ୨୧।୧୦(ସ୍ବ.ପ୍ର.): ପାରାଦୀପ ବନ୍ଦର ନିଷିଦ୍ଧାଞ୍ଚଳରେ ପୁଣି ଏକ ବଡ ଧରଣର ଜାଲିଆତି ଘଟଣା ଚଳିତ ମାସରେ ଘଟିଛି। ଏହି ଘଟଣା ପ୍ରଥମେ କୋର୍ଟ ଓ ପରେ ପାରାଦୀପ ଆଦର୍ଶ ଥାନାକୁ ଆସିଛି। ଉକ୍ତ ଘଟଣାରେ ବୁଧବାର ପୋଲିସ ୭ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି । ଲୋଡିଂରେ ନିୟୋଜିତ ୨୫ ଟ୍ରକକୁ ଜବତ କରାଯାଇଛି। ଏ ନେଇ ଥାନାରେ ନଂ. ୨୧୭/୨୧ ମାମଲା (ଦଫା ୩୭୯, ୪୬୫, ୪୬୭, ୪୬୮, ୪୬୯, ୪୭୧, ୧୨୦/ବି) ରୁଜୁ ହୋଇଛି। ଗିରଫ ଅଭିଯୁକ୍ତ ହେଲେ ସୌମ୍ୟରଞ୍ଜନ ଶତପଥୀ, ସଞ୍ଜୀବ କୁମାର ମିଶ୍ର, ଚିନ୍ମୟ ଭୂୟଁା, ସୁଶାନ୍ତ କୁମାର ସାମଲ, ଶାରଦା ପ୍ରସନ୍ନ ଓଝା, ପ୍ରକାଶ ମଲ୍ଲିକ ଓ ଭାଗୀରଥି ପ୍ରଧାନ। ଏମାନେ ଇନମେଶିନାରୀ ନାମକ ଷ୍ଟିଭେଡର୍ସ ସଂସ୍ଥାର କର୍ମଚାରୀ, ମେଶିନ ଲୋଡର, ଅପରେଟର ବୋଲି ପୋଲିସ ସୂଚନା ଦେଇଛି। ଉକ୍ତ ଟ୍ରକ୍ ଗୁଡିକରେ ଗତ ୫ ତାରିଖରେ କୋକିଂ କୋଲ ଲୋଡିଂ ହୋଇଥିଲା। ଉକ୍ତ କୋଇଲା ଟ୍ରାନ୍ସପୋର୍ଟ ପାଇଁ କାଗଜପତ୍ର ଜାଲିଆତି କରାଯାଇଥିଲା ବୋଲି ଅଭିଯୋଗ ହୋଇଥିଲା। ସମଗ୍ର ଘଟଣାରେ ଏକାଧିକ ବଡ ସଂସ୍ଥାନ ଜଡ଼ିତ ଥିବା ଜଣାପଡିଛି।
ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ଝାଡଖଣ୍ଡର ଅତାବିରା ନାମକ ଆମଦାନୀକାରୀ ସଂସ୍ଥା ୭୦୦ ମେଟ୍ରିକ ଟନ କୋଇଲା ନେବା ପାଇଁ ପାରାଦୀପର କୋଷ୍ଟାଲ ଟ୍ରାନ୍ସପୋର୍ଟ ନାମକ ସଂସ୍ଥାକୁ ଅଗ୍ରାଧିକାର ଦେଇଥିଲା। କିନ୍ତୁ ଉକ୍ତ ଅର୍ଡରରେ କୋକିଂ କୋଲ ବୋଲି ପ୍ରଥମେ ଉଲ୍ଲେଖ ଥିଲା। ସେହି ଅର୍ଡର ମୁତାବକ କୋଷ୍ଟାଲ ଟ୍ରାନ୍ସପୋର୍ଟ ପାରାଦୀପର ଜେସିସି(ଜଏଣ୍ଟ କୋଅର୍ଡିନେଶନ କମିଟି) କୁ ୨୫ ଟି ଟ୍ରକ ଦେବା ପାଇଁ ମେଲ ଦେଇଥିଲା। ୫ ତାରିଖ ଦିନ ଟ୍ରକଗୁଡିକ ଆବଶ୍ୟକ ପରମିଟ, ଗେଟ୍ ପାଶ ଆଦି ନେଇ ପୋର୍ଟ ଭିତରେ ଲୋଡିଂ ପାଇଁ ଯାଇଥିଲେ। ୭ ଟି ଟ୍ରକ ଲୋଡିଂ ପରେ ବନ୍ଦର ସୁରକ୍ଷା ଦାୟିତ୍ୱରେ ଥିବା ସିଆଇଏସ୍ଏଫ୍ ପାଖରେ ଅଭିଯୋଗ ହୋଇଥିଲା ଯେ ଉକ୍ତ ଗାଡିରେ ଫେକ୍ ଡକ୍ୟୁମେଣ୍ଟ ଜରିଆରେ କୋକିଂ କୋଲ ଲୋଡ କରାଯାଉଛି। ସିଆଇଏସ୍ଏଫ୍ ଓ ବନ୍ଦର ଟ୍ରାଫିକ ବିଭାଗ ପକ୍ଷରୁ ଘଟଣା ସ୍ଥଳରେ ପହଞ୍ଚତ୍ ଯାଞ୍ଚ କରାଯାଇଥିଲା। ସେଥିରେ ଜଣାପଡିଲା ତ୍ରିଶକ୍ତି ନାମକ ସଂସ୍ଥାର କାଗଜପତ୍ରରେ ଏହା ଚାଲିଛି। ଏମିତି ପ୍ରାୟ ୫ ଦିନ ଧରି ଯାଞ୍ଚ ଭିତରେ ତ୍ରିଶକ୍ତି ସଂସ୍ଥା ପକ୍ଷରୁ କୁଜଙ୍ଗ କୋର୍ଟରେ ଏହି ଘଟଣା ସମ୍ପର୍କରେ ଏକ ମାମଲା (ଆଇସିସି ନଂ. ୨୯୨/୨୧) କରାଯାଇଥିଲା। ଉକ୍ତ ମାମଲାର ତଦନ୍ତ ପାଇଁ ପାରାଦୀପ ଆଦର୍ଶ ଥାନା ପୋଲିସକୁ କୋର୍ଟ ନିର୍ଦ୍ଦେଶ ଦେଇଥିଲେ। ୧୫ ଦିନ ତଦନ୍ତ ପରେ ବୁଧବାର ୭ ଜଣ ଗିରଫ ହୋଇଛନ୍ତି। ଆଗକୁ ତଦନ୍ତ ଆଧାରରେ ଅନ୍ୟମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଆଇଆଇସି ରଜନୀକାନ୍ତ ମିଶ୍ର କହିଛନ୍ତି।
