ନୂଆଦିଲ୍ଲୀ,୨୭।୪: ଆମ ଆଦମୀ ପାର୍ଟି (ଆପ)ରୁ ଇସ୍ତଫା ଦେଇଥିବା ରାଘବ ଚଢାଙ୍କ ସମେତ ସମସ୍ତ ୭ ଜଣ ଏମ୍ପି ସୋମବାର ଆନୁଷ୍ଠାନିକ ଭାବରେ ଭାରତୀୟ ଜନତା ପାର୍ଟି (ଭାଜପା)ରେ ଯୋଗ ଦେଇଛନ୍ତି। ଏହି ୭ ଜଣ ଏମ୍ପିଙ୍କ ଦଳ ପରିବର୍ତ୍ତନ ସହିତ ରାଜ୍ୟ ସଭାରେ ଭାଜପାର ଶକ୍ତି ବୃଦ୍ଧି ପାଇଛି। ରାଜ୍ୟ ସଭାରେ ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡିଏ)ର ସଂଖ୍ୟା ବର୍ତ୍ତମାନ ୧୪୮କୁ ବୃଦ୍ଧି ପାଇଛି। ଏହି ସମୟରେ ପୂର୍ବରୁ ରାଜ୍ୟ ସଭାରେ ୧୦ଟି ଆସନ ଥିବା ଆପ ପାଖରେ ଏବେ କେବଳ ୩ ଜଣ ଏମ୍ପି ଅଛନ୍ତି।
ସମସ୍ତ ବିଦ୍ରୋହୀ ଆପ ଏମ୍ପି ଭାଜପାରେ ଯୋଗଦେବା ପାଇଁ ରାଜ୍ୟ ସଭାରୁ ଅନୁମୋଦନ ପାଇଥିଲେ। ରାଜ୍ୟ ସଭା ସଚିବାଳୟ ମଧ୍ୟ ଏ ସମ୍ପର୍କରେ ଏକ ଆନୁଷ୍ଠାନିକ ବିଜ୍ଞପ୍ତି ଜାରି କରିଛି। କେନ୍ଦ୍ର ସଂସଦୀୟ ବ୍ୟାପାର ମନ୍ତ୍ରୀ କିରେନ ରିଜିଜୁ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ ମାଧ୍ୟମରେ ଏହି ସୂଚନା ଶେୟାର କରିଛନ୍ତି। ସେ ଲେଖିଛନ୍ତି, ରାଜ୍ୟ ସଭାର ଅଧ୍ୟକ୍ଷ ସି.ପି. ରାଧାକୃଷ୍ଣନ, ଆମ ଆଦମୀ ପାର୍ଟିର ୭ ଜଣ ଏମ୍ପିଙ୍କ ଭାଜପାରେ ମିଶ୍ରଣକୁ ଗ୍ରହଣ କରିଛନ୍ତି। ରାଘବ ଚଡ୍ଡା, ସନ୍ଦୀପ ପାଠକ, ଅଶୋକ ମିତ୍ତଲ, ହରଭଜନ ସିଂହ, ସ୍ବାତୀ ମାଲିୱାଲ, ରାଜିନ୍ଦର ଗୁପ୍ତା ଏବଂ ବିକ୍ରମଜିତ ସିଂହ ସାହାନି ବର୍ତ୍ତମାନ ଭାଜପା ସଂସଦୀୟ ଦଳର ସଦସ୍ୟ।
ଏହି ସମୟରେ, ଆମ ଆଦମୀ ପାର୍ଟି ରାଜ୍ୟ ସଭା ଅଧ୍ୟକ୍ଷ ସି.ପି. ରାଧାକୃଷ୍ଣନଙ୍କ ନିକଟରେ ଆବେଦନ କରିଥିଲା ଯେ, ଦଳ ଛାଡି ଭାରତୀୟ ଜନତା ପାର୍ଟିରେ ଯୋଗ ଦେଇଥିବା ସମସ୍ତ ୭ ଜଣ ରାଜ୍ୟ ସଭା ଏମ୍ପିଙ୍କୁ ଅଯୋଗ୍ୟ ଘୋଷଣା କରାଯାଉ।
Dharitri – Odisha’s No.1 Odia Daily
