କେନ୍ଦୁଝର,୮।୧୧(ସ୍ବ.ପ୍ର.): ପ୍ରତ୍ୟେକ ବର୍ଷ ଦୁର୍ନୀତି ନିବାରଣ ସପ୍ତାହ ପାଳନ ହେଉଛି। ଦୁର୍ନୀତି ବିରୋଧରେ ଜନ ସଚେତନତା ସୃଷ୍ଟି କରିବା ପାଇଁ ଶପଥପାଠ, ରାଲି, ସଭାସମିତି, ପ୍ରତିଯୋଗିତା ଆଦି ଆୟୋଜନ ହେଉଛି। ଏହା ସତ୍ତ୍ୱେ ଦୁର୍ନୀତି କମିବାର ନଁା ଧରୁନି। ପ୍ରତିଦିନ ରାଜ୍ୟର କେଉଁଠି ନା କେଉଁଠି ଦୁର୍ନୀତି ଅଭିଯୋଗରେ ଅଧିକାରୀ ହୁଅନ୍ତୁ ଅବା ଚତୁର୍ଥ ଶ୍ରେଣୀ କର୍ମଚାରୀ ଧରାପଡୁଛନ୍ତି। ଅନେକ କୋଟି ଟଙ୍କା, କୋଠା, ଜମି ଜବତ ହେଉଛି।
ତଥ୍ୟ ମୁତାବକ, ବାଲେଶ୍ୱର ଭିଜିଲାନ୍ସ ଡିଭିଜନ ଅଧୀନରେ ୨୦୨୧ରେ ସମୁଦାୟ ୪୦ ମାମଲା ରୁଜୁ ହୋଇଛି। ସେଥିରୁ ୯ଟି ଆୟବହିର୍ଭୂତ ସମ୍ପତ୍ତି ମାମଲା ଥିବା ବେଳେ ୧୧ଟି ଟ୍ରାପ୍ ଓ ୨୦ଟି ଅନ୍ୟ ଦୁର୍ନୀତି ସମ୍ପର୍କିତ ମାମଲା ରୁଜୁ ହୋଇଛି। ସେଥିରୁ ୭ ଜଣ କ୍ଲାସ୍ ୧ ଅଧିକାରୀ, ୬ ଜଣ କ୍ଲାସ୍ ୨ ଅଧିକାରୀ, ୨୩ ଜଣ କ୍ଲାସ୍ ୩ ଅଧିକାରୀ ଓ ୧୦ ଜଣ ଅନ୍ୟ ଅଧିକାରୀଙ୍କ ବିରୋଧରେ ମାମଲା ହୋଇଛି। ଚଳିତବର୍ଷ ବାଲେଶ୍ୱର ଭିଜିଲାନ୍ସ ଡିଭିଜନ ପକ୍ଷରୁ ୨୮ ମାମଲାର ତଦନ୍ତ କରାଯାଇଥିଲା। ୨୬ଟି କେସ୍ରେ ଅଭିଯୋଗ ଫର୍ଦ୍ଦ ଦାଖଲ ହୋଇଥିବା ବେଳେ ୭ଟି କେସ୍ରେ ଦଣ୍ଡବିଧାନ ହୋଇଛି। ୨୧ ଜଣଙ୍କୁ ଗିରଫ କରାଯାଇଛି। ସେଥିରେ ୩ ଜଣ କ୍ଲାସ୍ ୧, ୩ ଜଣ କ୍ଲାସ୍ ୨ ଓ ୧୦ ଜଣ କ୍ଲାସ୍ ୩ ଅଧିକାରୀ ରହିଥିବା ବେଳେ ୨ ଜଣ ଅନ୍ୟ ଅଧିକାରୀ ଏବଂ ୩ ଜଣ ବେସରକାରୀ ଲୋକ ଗିରଫ ହୋଇଛନ୍ତି। ୨ ଜଣ ସରକାରୀ କର୍ମଚାରୀଙ୍କୁ ଚାକିରିରୁ ବହିଷ୍କାର କରାଯାଇଛି।
ସେହିପରି ୨୦୨୧ରେ ଫରେଷ୍ଟ ବିଭାଗ ୧୦ଟି ରେଡ୍ କରି ୧୦ ଫରେଷ୍ଟ କେସ କରି ସମୁଦାୟ ୩୦ ଲକ୍ଷ ୬୦ ହଜାର ୩୦୦ ଟଙ୍କା ମୂଲ୍ୟର କାଠ, ମେଶିନ ଆଦି ଜବତ କରିଛି। ୨୦୨୨ରେ ୩୨ଟି କ୍ରିମିନାଲ କେସ କରିଛି ା ଏଥିରେ ୫ଟି ଆୟବହିର୍ଭୂତ ସମ୍ପତ୍ତି ଠୁଳ ମାମଲା, ୧୧ଟି ଟ୍ରାପ୍ ଓ ୧୬ ଅନ୍ୟ ଦୁର୍ନୀତି ମାମଲା ରୁଜୁ କରାଯାଇଛି। ଦୁର୍ନୀତିରେ ୨ ଜଣ କ୍ଲାସ୍ ୧, ୩ ଜଣ କ୍ଲାସ୍ ୨, ୨୨ ଜଣ କ୍ଲାସ୍ ୩ ଅଧିକାରୀ ଓ ୨୦ ଜଣ ଅନ୍ୟ କର୍ମଚାରୀ ଜଡ଼ିତ ଅଛନ୍ତି। ୨୦୨୨ରେ ବାଲେଶ୍ୱର ଭିଜିଲାନ୍ସ ଡିଭିଜନ ୨୭ ଖୋଲା ତଦନ୍ତ କରିଛନ୍ତି। ସେଥିରେ ୨ ଜଣ କ୍ଲାସ୍ ୧ , ୨ ଜଣ କ୍ଲାସ ୨, ୨୦ କ୍ଲାସ ୩ ଅଧିକାରୀ ଓ ୮ ଜଣ ଅନ୍ୟ କର୍ମଚାରୀ ଅନ୍ତର୍ଭୁକ୍ତ ଅଛନ୍ତି। ସମୁଦାୟ ୮ କେସ୍ରେ ଦଣ୍ଡବିଧାନ ହୋଇଥିବା ବେଳେ ୫ ଜଣ କର୍ମଚାରୀଙ୍କୁ ଚାକିରିରୁ ବାହାର କରାଯାଇଛି। ବନ ବିଭାଗ ପକ୍ଷରୁ ରେଡ୍ କରାଯାଇ ୨୮ କେସ୍ ରୁଜୁ କରାଯାଇ ୧ କୋଟି ୨୫ ଲକ୍ଷ ୨ ହଜାର ୯୫୦ ଟଙ୍କାର କାଠ, ମେଶିନ ଆଦି ଜବତ ହୋଇଛି।
ବାଲେଶ୍ୱର ଡିଭିଜନ ଅଧୀନ କେନ୍ଦୁଝର ୟୁନିଟ୍ ଅଧୀନରେ ୨୦୨୧ ମସିହାରେ ସମୁଦାୟ ୧୩ ଦୁର୍ନୀତି ମାମଲା ରୁଜୁ କରାଯାଇଛି। ସେଥି ମଧ୍ୟରୁ ୪ ଜଣ ବି କ୍ଲାସ୍, ୯ ଜଣ ସି କ୍ଲାସ୍ ଅଧିକାରୀଙ୍କ ବିରୋଧରେ ମାମଲା ରୁଜୁ ହୋଇଛି। ସେହିପରି ୨୦୨୨ରେ ରୁଜୁ ହୋଇଥିବା ୯ ଟି ଦୁର୍ନୀତି ମାମଲାରୁ ଜଣେ କ୍ଲାସ୍ ୧, ୨ ଜଣ କ୍ଲାସ ୨ ଓ ୬ ଜଣ କ୍ଲାସ୍ ୩ ଅଧିକାରୀ ରହିଛନ୍ତି।
