କେନ୍ଦୁଝର, ୨୪ା୯(ସ୍ବ.ପ୍ର.): ଜଙ୍ଗଲ ଓ ପାହାଡ଼ ପରିବେଷ୍ଟିତ ଭୌଗୋଳିକ ସ୍ଥିତି ପାଇଁ ପାରମ୍ପାରିକ ପ୍ରବାହମାନ ଜଳସେଚନ ପଦ୍ଧତି ଦ୍ୱାରା ଜଳସେଚନ ସୁବିଧା ହେଉ ନ ଥିବାରୁ ପାହାଡ଼ିଆ ଅଞ୍ଚଳ ଚାଷ କ୍ଷେତ୍ରରେ ପଛେଇ ଯାଉଛି। ଏହି ତାରତମ୍ୟ ଦୂର କରିବା ପାଇଁ ରାଜ୍ୟ ସରକାର ପାର୍ବତାଗିରି ବୃହତ ଉଠା ଜଳସେଚନ ଯୋଜନା କାର୍ଯ୍ୟକାରୀ କରିଛନ୍ତି। ଏହି ଯୋଜନାରେ ସମୁଦାୟ ୧୦, ୭୫୯ କୋଟି ୨୦ ଲକ୍ଷ ବ୍ୟୟବରାଦ ହୋଇଥିବା ବେଳେ ବିଭିନ୍ନ ନଦୀ, ଝରଣା, ଜଳଭଣ୍ଡାର ତଥା କେନାଲରୁ ଜଳ ଉତ୍ତୋଳନ କରାଯାଇ ୨,୬୩,୮୦୧ ହେକ୍ଟର ଜମିକୁ ଜଳସେଚନ ସୁବିଧା ହେବ। ପ୍ରକଳ୍ପରେ କେନ୍ଦୁଝର ଜିଲା ପାଇଁ ୬୩୯କୋଟି ମଞ୍ଜୁର କରାଯାଇଛି ବୋଲି ଜିଲା ଦଳୀୟ କାର୍ଯ୍ୟାଳୟରେ ଶୁକ୍ରବାର ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ବିଜେଡି ପକ୍ଷରୁ କୁହାଯାଇଛି ।
ଅନ୍ତର୍ଗତ କେନ୍ଦୁଝର ଜିଲାରେ ଆନନ୍ଦପୁର ବାମ ମୁଖ୍ୟ କେନାଲ, ବିଦ୍ୟାଧରପୁର ଆନିକଟ, ହଦଗଡ଼ ଜଳଭଣ୍ଡାର ଓ ବ୍ରାହ୍ମଣୀ ନଦୀରୁ ଜଳ ଉତ୍ତୋଳନ କରି ୧୭ ହଜାର ହେକ୍ଟର ଚାଷ ଜମିକୁ ଜଳସେଚନ ହେବ। ପ୍ରକଳ୍ପ ଗୁଡ଼ିକର ବିଦ୍ୟୁତ୍ ସଂଯୋଗୀକରଣ ଓ ୧୫ ବର୍ଷ ରକ୍ଷଣାବେକ୍ଷଣ ପାଇଁ ପ୍ରସ୍ତାବ ରହିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦୁଝର ଜିଲାର ୧୪ ଟି ପ୍ରକଳ୍ପ ପାଇଁ ୬୩୯ କୋଟି ଟଙ୍କା ଅନୁମୋଦନ କରିଛନ୍ତି। ୩୬ ମାସ ମଧ୍ୟରେ ପ୍ରକଳ୍ପ କାମ ସରିବ ବୋଲି ସେ ନିର୍ଦ୍ଦେଶ ଦେଇଛନ୍ତି। ଏହା ଦ୍ୱାର ଆନନ୍ଦପୁର ନିର୍ବାଚନମଣ୍ଡଳୀର ହାଟଡ଼ିହି, ଆନନ୍ଦପୁର ବ୍ଲକ, ଘଷିପୁରା ନିର୍ବାଚନ ମଣ୍ଡଳୀର ଘଷିପୁରା ବ୍ଲକ୍ର ଚାଷୀମାନେ ଉପକୃତ ହୋଇପାରିବେ। ଏଥିରେ ପାରମ୍ପାରିକ ଧାନ ଫସଲ ସହିତ ଅର୍ଥକାରୀ ଫସଲ କରିବା ପାଇଁ ଚାଷୀମାନେ ଉତ୍ସାହିତ ହେବେ ଏବଂ ସେମାନଙ୍କ ସାମାଜିକ ଓ ଅର୍ଥନୈତିକ ବିକାଶ ହୋଇପାରିବ ବୋଲି ଉପସ୍ଥିତ ବିଜେଡି ନେତୃବୃନ୍ଦ ସୂଚନା ଦେଇଛନ୍ତି। ବିଜେଡି ଜିଲା ସଭାପତି ମାଧବ ସର୍ଦ୍ଦାରଙ୍କ ଅଧ୍ୟକ୍ଷତାରେ ସମ୍ମିଳନୀରେ ଘଷିପୁରା ବିଧାୟକ ବଦ୍ରିନାରାୟଣ ପାତ୍ର, ଆନନ୍ଦପୁର ବିଧାୟକ ଭାଗୀରଥୀ ସେଠୀ, ପାଟଣା ବିଧାୟକ ତଥା ଜିଲା ଯୋଜନା ବୋର୍ଡ ଅଧ୍ୟକ୍ଷ ଜଗନ୍ନାଥ ନାୟକ, ଜିଲା ପରିଷଦ ଅଧ୍ୟକ୍ଷା ସାଗରିକା ସାହୁ, ସଭ୍ୟ ଆଶିଷ ଚକ୍ରବର୍ତ୍ତୀ, ସମବାୟବିତ୍ କାନନ ବିହାରୀ ପହି, ପୌରାଧ୍ୟକ୍ଷ ବରଦା ପ୍ରସନ୍ନ ଦାସ, ମୀନା ମାଝୀ ସମେତ ଅନ୍ୟମାନେ ଉପସ୍ଥିତ ଥିଲେ।
