ଭବାନୀପାଟଣା,୨୯ା୭ (ଉତ୍ତମ କୁମାର ଦାଶ):କଳାହାଣ୍ଡି ଜିଲାରେ ଗତ ଜୁନ ୧୩ରେ ବିଭିନ୍ନ ପଦବୀରେ କାର୍ଯ୍ୟରତ ରାଜସ୍ବ କର୍ମଚାରୀଙ୍କ ବଦଳି ହୋଇଛି। ଏଥିରେ ଜିଲାର ୧୩ ତହସିଲର ୬୦ଜଣ ରାଜସ୍ବ ନିରୀକ୍ଷକ (ଆର୍ଆଇ)ଙ୍କୁ ବଦଳି କରାଯାଇଛି। ଏକସଙ୍ଗେ ଏତେ ସଂଖ୍ୟକ ଆର୍ଆଇଙ୍କ ବଦଳି କେତେକଙ୍କୁ ବିସ୍ମିତ କରିଛି। ଜମିଜମା ବାବଦ ସମସ୍ତ କାର୍ଯ୍ୟ ତଥା ରେକର୍ଡ ପ୍ରସ୍ତୁତି ଓ ପରିଚାଳନା କ୍ଷେତ୍ରରେ ଆର୍ଆଇଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଛି। କୁହାଯାଏ ଜମିଜମା ରେକର୍ଡର ପବିତ୍ରତା ହେଉଛି ଅଲ୍ଲଂଘନୀୟ ଓ ତାହା ରାଜସ୍ବ ଅଧିକାରୀଙ୍କ ହାତରେ ସୁରକ୍ଷିତ। ଏପରିସ୍ଥଳେ ଜିଲାରେ ୬୦ ଆର୍ଆଇଙ୍କ ବଦଳି ହୋଇଥିବାବେଳେ ଏବେ ବି ୩୦ପଦବୀ ଖାଲି ପଡ଼ିଛି। ସେହିଭଳି ଅତିରିକ୍ତ ରାଜସ୍ବ ନିରୀକ୍ଷକ ୩୫ଜଣ ଥିବାବେଳେ ୭୬ ପଦବୀ ଖାଲି ପଡିଛି। ଅମିନ ସଂଖ୍ୟା ୮୧ରୁ ଅଛନ୍ତି ୨୩ଜଣ। ସେହିପରି କନିଷ୍ଠ ରାଜସ୍ବ ସହ କର୍ମଚାରୀ ପଦବୀ ୧୬୬ରୁ ୬୨ଟିରେ କେହି ନାହାନ୍ତି। ଦୀର୍ଘବର୍ଷ ହେବ ଜିଲା ମୁଖ୍ୟାଳୟରେ ଯେଉଁମାନେ ରହିଛନ୍ତି ସେମାନଙ୍କ ବଦଳି ହେଉନାହିଁ। ୧୦ରୁ ୧୫ବର୍ଷ ହେବ କେତେକ କର୍ମଚାରୀ ଜିଲାର ଭିନ୍ନ ଭିନ୍ନ ବିଭାଗରେ କାର୍ଯ୍ୟ କରିଆସୁଛନ୍ତି। ବଦଳି ନୀତି କେଉଁ ଆଧାରରେ ଗତି କରୁଛି ତାହା ଜଣାପଡୁନାହିଁ। ନୂଆ ସରକାରଙ୍କ ରାଜସ୍ବ ବିଭାଗ ନୂଆ ନୀତି ଆପଣେଇ ସଂସ୍କାର କଥା କହୁଥିବା ସମୟରେ ବାସ୍ତବ ଚିତ୍ର ପ୍ରତି ଧ୍ୟାନ ଦେବା ଉଚିତ ବୋଲି ଅନେକେ ମତ ଦେଇଛନ୍ତି।
