ପାଟଣା,୧୯ା୮(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ଥାନା କପୁଣ୍ଡି ପଞ୍ଚାୟତ ଖଲିଆରୀପାଟ ନୂଆଗାଁ ଗ୍ରାମର ୬ଜଣ ଶ୍ରମିକ ତାମିଲନାଡୁର ଚେନ୍ନାଇସ୍ଥିତ ଏକ ଟାୟାର କାରଖାନାରେ ଦାଦନ ଖଟିବାକୁ ଯାଇ ପ୍ରାୟ ଅଢ଼େଇ ମାସ ହେବ ଅଟକି ରହିଥିବା ଅଭିଯୋଗ ହୋଇଛି। ଏନେଇ ମଙ୍ଗଳବାର ରାତିରେ ଶ୍ରମିକଙ୍କ ପରିବାର ପକ୍ଷରୁ ପାଟଣା ଥାନାରେ ଲିଖିତ ଅଭିଯୋଗ କରାଯାଇଛି। ପରିବାର ସଦସ୍ୟଙ୍କ ସହ ପାଟଣା ଭାଜପାର ଏକ ପ୍ରତିନିଧି ଦଳ ଥାନାରେ ପହଞ୍ଚି ଅଟକ ଥିବା ଶ୍ରମିକଙ୍କୁ ତୁରନ୍ତ ଉଦ୍ଧାର କରିବାକୁ ପୁଲିସକୁ ଅବଗତ କରିଛନ୍ତି।
ପରିବାର ପକ୍ଷରୁ ମିଳିଥିବା ସୂଚନା ଅନୁଯାୟୀ, ରିତୁ ହୋ (୩୦), ଲକ୍ଷ୍ମୀ ମୁଣ୍ଡା (୧୨), ଲକ୍ଷ୍ମୀଧର ମୁଣ୍ଡା (୧୬), ଶ୍ୟାମସୁନ୍ଦର ହୋ, ମଙ୍ଗଳୁ ହୋ (୨୧) ଓ ଚନ୍ଦ୍ରୁ ହୋଙ୍କୁ ସ୍ଥାନୀୟ ଅଞ୍ଚଳର ଜଣେ ଦଲାଲ ତାମିଲନାଡୁର ଏକ କମ୍ପାନୀରେ କାମ ଯୋଗାଇଦେବାକୁ କହି ସାଙ୍ଗରେ ନେଇଥିବା ଅଭିଯୋଗ ହୋଇଛି।
ସେଠାରେ ପ୍ରାୟ ଅଢ଼େଇ ମାସ କାମ କରିବା ପରେ ଶ୍ରମିକମାନେ ଘରକୁ ଫେରିବାକୁ ଚାହିଁଥିଲେ। ହେଲେ କମ୍ପାନୀ ମାଲିକ ଓ ଦଲାଲ ସେମାନଙ୍କୁ ଘରକୁ ଫେରିବାକୁ ଦେଉ ନ ଥିବା ପରିବାର ପକ୍ଷରୁ ଅଭିଯୋଗ ହୋଇଛି। ଏପରିକି ସେମାନଙ୍କୁ ଅଟକ ରଖି ବଳପୂର୍ବକ କାମ କରାଯାଉଥିବା, ଠିକ୍ ଭାବେ ଖାଦ୍ୟ ଦିଆଯାଉ ନ ଥିବା ଏବଂ ଶାରୀରିକ ନିର୍ଯାତନା ଦିଆଯାଉଥିବା ନେଇ ପରିବାର ଅଭିଯୋଗ କରିଛନ୍ତି। ଅଟକ ଥିବା ଶ୍ରମିକମାନଙ୍କୁ ତୁରନ୍ତ ସୁରକ୍ଷିତ ଭାବେ ଉଦ୍ଧାର କରି ଘରକୁ ଫେରାଇ ଆଣିବା ସହ ଅଭିଯୋଗର ନିରପେକ୍ଷ ତଦନ୍ତ କରି ଦୋଷୀଙ୍କ ବିରୋଧରେ ଦୃଢ଼ ଆଇନଗତ ପଦକ୍ଷେପ ନେବାକୁ ପରିବାର ପକ୍ଷରୁ ଦାବି କରାଯାଇ।
ପରିବାର ଲୋକଙ୍କ ସହ ଭାଜପା ପାଟଣା ମଣ୍ଡଳ ସଭାପତି ବ୍ରଜବନ୍ଧୁ ସେଠୀ, କେନ୍ଦୁଝର ଏମ୍ପିଙ୍କ ଥାନା ପ୍ରତିନିଧି ଯୁଧିଷ୍ଠିର ମହାନ୍ତ, ପାଟଣା ମଣ୍ଡଳ ସାଧାରଣ ସମ୍ପାଦକ ମଧୁସୂଦନ ମହାନ୍ତ, ଜିଲା ସଂଖ୍ୟାଲଘୁ ସମ୍ପ୍ରଦାୟ ଉପସଭାପତି ମନ୍ସୂର ଆଲମ। ଏନେଇ ପାଟଣା ଥାନା ଅଧିକାରୀ କିରଣ ପ୍ରାସାଦ ସାହୁ କହିଛନ୍ତି, କମ୍ପାନୀ ମାଲିକ କହିଛନ୍ତି ଆଗାମୀ ୩ ତାରିଖ ଭିତରେ ଶ୍ରମିକଙ୍କ ଆଣି ଘରେ ଛାଡ଼ିବେ।
