ନୂଆଦିଲ୍ଲୀ, ୧୭ା୪(ପି.ଟି.): ଅବକାରୀ ଦୁର୍ନୀତି ମାମଲାରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ସିବିଆଇ ରବିବାର ପ୍ରାୟ ୯ ଘଣ୍ଟା ଜେରା କରିଛି। ତାଙ୍କୁ ଉକ୍ତ ଦୁର୍ନୀତି ମାମଲାର ଜଣେ ସାକ୍ଷୀ ଭାବେ ତଦନ୍ତକାରୀ ଅଧିକାରୀମାନେ ୫୬ଟି ପ୍ରଶ୍ନ ପଚାରିଥିଲେ ବୋଲି କେଜ୍ରିଓ୍ବାଲ କହିଛନ୍ତି। ତେବେ ପରବର୍ତ୍ତୀ ଜେରା ପାଇଁ ତାଙ୍କୁ ସମନ ହୋଇନାହିଁ।
ତଦନ୍ତକାରୀ ସଂସ୍ଥା ଭାଜପା ଇଙ୍ଗିତରେ କାର୍ଯ୍ୟ କରୁଥିବା ଅଭିଯୋଗ କରି ଆମ୍ ଆଦ୍ମୀ ପାର୍ଟି (ଏଏପି) ନେତାମାନେ ଦିଲ୍ଲୀରେ ବିକ୍ଷୋଭ ପ୍ରଦର୍ଶନ କରିଥିଲେ। ତାଙ୍କୁ ଗିରଫ କରିବା ଲାଗି ସିବିଆଇକୁ ଭାଜପା ନିଶ୍ଚୟ ନିର୍ଦ୍ଦେଶ ଦେଇଥିବ ବୋଲି କେଜ୍ରିଓ୍ବାଲ ସିବିଆଇ କାର୍ଯ୍ୟାଳୟରେ ପହଞ୍ଚତ୍ବା ପୂର୍ବରୁ ଟୁଇଟରରେ ଏକ ଭିଡିଓ ବାର୍ତ୍ତା ପୋଷ୍ଟ କରିଥିଲେ। ଜେରା ପାଇଁ ସିବିଆଇ ସମନ କରିବା ପରେ ଏଏପି ଆବାହକ କେଜ୍ରିଓ୍ବାଲଙ୍କୁ ବହୁ ବିରୋଧୀ ଦଳ ନେତା ସମର୍ଥନ ଜଣାଇଛନ୍ତି। ଅବକାରୀ ମାମଲାରେ ତାଙ୍କର କିଛି ଲୁଚାଇବାର ନାହିଁ। ସେ ସଚ୍ଚୋଟତାର ସହ ସିବିଆଇର ପ୍ରତ୍ୟେକ ପ୍ରଶ୍ନର ଉତ୍ତର ଦେବେ ବୋଲି କହିଛନ୍ତି। ତାଙ୍କର ଲାଏ-ଡିଟେକ୍ଟର ପରୀକ୍ଷା କରାଯାଉ ବୋଲି ଦିଲ୍ଲୀ ମୁଖ୍ୟମନ୍ତ୍ରୀ ଆହ୍ବାନ ଦେଇଥିବାବେଳେ ଦୁର୍ନୀତିରୁ ଲୋକଙ୍କ ନଜର ହଟାଇବା ପାଇଁ କେଜ୍ରିଓ୍ବାଲ ଡ୍ରାମାବାଜି କରୁଥିବା ଭାଜପା ଅଭିଯୋଗ କରିଛି।
ଅବକାରୀ ମାମଲାରେ ପୂର୍ବତନ ଉପମୁଖ୍ୟନ୍ତ୍ରୀ ମନୀଷ ସିସୋଡିଆଙ୍କୁ ଗତ ମାସରେ ସିବିଆଇ ଗିରଫ କରିଥିଲା। କେଜ୍ରିଓ୍ବାଲଙ୍କୁ ସିବିଆଇ ଗିରଫ କରିପାରେ ବୋଲି ଆଶଙ୍କା କରି ଭାଜପା ନେତାମାନେ ଏକ ଜରୁରୀ ବୈଠକରେ ଏକାଠି ହୋଇଥିଲେ। ଅପରାହ୍ନ ୫ଟାରେ ଏଏପି ନେତା ଗୋପାଳ ରାୟଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଦଳର ଜାତୀୟ ସମ୍ପାଦକ ପଙ୍କଜ ଗୁପ୍ତା, ଦିଲ୍ଲୀ ମେୟର ଶେଲି ଓବେରୋଇ, ଡେପୁଟି ମେୟର ଆଲେ ଇକ୍ବାଲ ଓ ଦଳର ଅନ୍ୟ କାର୍ଯ୍ୟକର୍ତ୍ତା ଯୋଗ ଦେଇଥିଲେ। ରବିବାର ସକାଳେ କେଜ୍ରିଓ୍ବାଲ ରାଜଘାଟସ୍ଥିତ ମହାତ୍ମା ଗାନ୍ଧୀ ସ୍ମାରକ ସ୍ଥଳକୁ ଯିବା ପରେ ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନ୍ ଓ କେତେଜଣ କ୍ୟାବିନେଟ ସହଯୋଗୀଙ୍କ ସହ ସିବିଆଇ କାର୍ଯ୍ୟାଳୟକୁ ଯାଇଥିଲେ। ତାଙ୍କୁ ଜେରା ସମୟରେ ଆର୍କବିଶପ୍ ରୋଡରେ ଧାରଣାରେ ବସିଥିବା କେତେଜଣ ବରିଷ୍ଠ ଏଏପି ନେତାଙ୍କୁ ଦିଲ୍ଲୀ ପୋଲିସ ଅଟକ ରଖିଥିଲା। ସେମାନଙ୍କ ମଧ୍ୟରେ ରାଜ୍ୟ ସଭା ଏମ୍ପି ସଞ୍ଜୟ ସିଂ, ରାଘବ ଚଢ଼ା, ଦିଲ୍ଲୀ ମନ୍ତ୍ରୀ ସୌରଭ ଭରଦ୍ୱାଜ, ଅତିଶି ଏବଂ କୈଳାସ ଗେହଲଟ ପ୍ରମୁଖ ଥିଲେ।
