ଚମ୍ପୁଆ,୭ା୫(ଡି.ଏନ.ଏ.) କେନ୍ଦୁଝର ଜିଲା ଚମ୍ପୁଆ ବ୍ଲକର ୫-ଟି ରୂପାନ୍ତରିତ କୋଦଗାଡ଼ିଆ ଉଚ୍ଚ ବିଦ୍ୟାଳୟର କମ୍ପ୍ୟୁଟର ଲାବ୍ରେ ଶୁକ୍ରବାର ମଧ୍ୟାହ୍ନରେ ଅଗ୍ନିକାଣ୍ଡ ଘଟିଛି। ନିଆଁ ଲାଗି ପ୍ରାୟ ୧୦ଲକ୍ଷରୁ ଊର୍ଦ୍ଧ୍ୱ ଟଙ୍କାର ସାମଗ୍ରୀ ପୋଡ଼ି ନଷ୍ଟ ହୋଇଯାଇଛି। ଶର୍ଟସର୍କିଟ୍ ଯୋଗୁ ଅଗ୍ନିକାଣ୍ଡ ଘଟିଥିବା ଜଣାଯାଇଛି। ନିମ୍ନମାନର ବିଦ୍ୟୁତ୍ କାର୍ଯ୍ୟ ପାଇଁ ଏଭଳି ଘଟିଥିବା ସ୍ଥାନୀୟ ଲୋକେ ପ୍ରକାଶ କରିଛନ୍ତି।
ଅନୁସାରେ, ବିଦ୍ୟାଳୟର କମ୍ପ୍ୟୁଟର ଲାବ୍ରୁ ପ୍ରବଳ ଧୂଆଁ ବାହାରୁଥିବା ଦେଖି ଛାତ୍ରାବାସର ଜଣେ ଛାତ୍ର ଦୌଡ଼ି ଯାଇ ଉପସ୍ଥିତ ଶିକ୍ଷକଙ୍କୁ ଜଣାଇଥିଲେ। ଶିକ୍ଷକ ତୁରନ୍ତ ଦମକଳ ବାହିନୀକୁ ଖବର ଦେଇଥିଲେ। ବନ୍ଦ ଥିବା ଅବସ୍ଥାରେ ନିଆଁ ଲାଗିଥିବା ଯୋଗୁ ଲ୍ୟାବ୍ରେ ଥିବା କମ୍ପ୍ୟୁଟର, ଏଲ୍ସିଡି, ଟେବୁଲ ଚେୟାରଠାରୁ ଆରମ୍ଭ କରି ବହୁ ସାମଗ୍ରୀ ପୋଡ଼ିଯାଇଛି। ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ନିଆଁର ପ୍ରକୋପ ଏତେ ଅଧିକ ଥିଲା ଯେ ଭିତର କାନ୍ଥକୁ ମଧ୍ୟ ଛାଡ଼ି ନ ଥିଲା। ଖବର ପାଇ ବିଡିଓ ଜ୍ୟୋସ୍ନା ନାଏକ, ତହସିଲଦାର ଡ. ସାଇ ସସ୍ମିତା ହୋତା, ବ୍ଲକ ଶିକ୍ଷାଧିକାରୀ ଗୋବର୍ଦ୍ଧନ ନାଏକ ଓ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ପ୍ରକାଶ ଥାଉକି, ଦୁଇଦିନ ତଳେ କାଳବୈଶାଖୀରେ ୫-ଟି ରୂପାନ୍ତରିତ କାର୍ଯ୍ୟ ଚାଲିଥିବା ଅନ୍ୟ ଏକ ବିଦ୍ୟାଳୟର ଛପର ଉଡ଼ି ଯାଇଥିବା ବେଳେ କାନ୍ଥ ଦୋହଲି ଯାଇଥିଲା। ବାରମ୍ବାର ଏଭଳି ଅଘଟଣ ଘଟୁଥିବାରୁ କାର୍ଯ୍ୟର ମାନକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
