କେନ୍ଦୁଝର,୫ା୪: ସ୍ଥାନୀୟ ସରକାରୀ ଡିଗ୍ରୀ ଇଞ୍ଜିନିୟରିଂ କଲେଜରେ ଆଉ ୫ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ମହିଳା ହଷ୍ଟେଲର ୪ ଛାତ୍ରୀ ଓ ଜଣେ ରୋଷେୟା ପଜିଟିଭ୍ ହେବା ପରେ କଲେଜ ପ୍ରଶାସନର ଚିନ୍ତା ବଢ଼ିଯାଇଛି। ପୂର୍ବରୁ ହଷ୍ଟେଲରେ ରହୁଥିବା ୨ ଛାତ୍ର ପଜିଟିଭ୍ ଚିହ୍ନଟ ହୋଇଥିଲେ। ହଷ୍ଟେଲ ପରିସରକୁ ବିଶୋଧନ କରିବା ସହ କଲେଜ କର୍ତ୍ତପକ୍ଷ ପିଲାମାନଙ୍କୁ ଶ୍ରେଣୀରେ ଆଉ ପାଠ ନ ପଢ଼ାଇ ଅନ୍ଲାଇନ ପାଠପଢ଼ା ବ୍ୟବସ୍ଥା କରିଥିଲେ।
ସମୁଦାୟ ୧୨୭ ଜଣଙ୍କ ସୋମବାର ପରୀକ୍ଷା କରାଯାଇଥିଲା। ସେଥିରୁ ହଷ୍ଟେଲରେ ଥିବା ୧୦୨ ଆଣ୍ଟିଜେନରୁ ୫ ଜଣ ପଜିଟିଭ୍ ବାହାରିଥିବା ବେଳେ ଆଉ ୨୫ ଜଣଙ୍କର ଆଣ୍ଟିଜେନ ଟେଷ୍ଟ ପାଇଁ ନମୁନା ଯାଇଛି। ପାଠପଢ଼ା, ପରୀକ୍ଷା ଫର୍ମପୂରଣ ଆଦି ଅନ୍ଲାଇନରେ କରାଯାଉଛି। ଅନ୍ୟ ରିପୋର୍ଟକୁ ଅପେକ୍ଷା କରାଯାଇଥିବା ଅଧ୍ୟକ୍ଷ ତ୍ରିଲୋଚନ ସାହୁ କହିଛନ୍ତି। ତେବେ ଗତ ୨୪ ଘଣ୍ଟାରେ ମୋଟ ୮ ଆକ୍ରାନ୍ତ ଚିହ୍ନଟ ହୋଇଛି। ସମସ୍ତେ ଲୋକାଲ କଣ୍ଟାକ୍ଟ କେଶ୍ ବୋଲି ଜଣାପଡ଼ିଛି। ଏହାକୁ ମିଶାଇ ଜିଲାରେ ସମୁଦାୟ ପଜିଟିଭ୍ ସଂଖ୍ୟା ୩୦ରେ ପହଞ୍ଚିଛି। ପଜିଟିଭ୍ ସଂଖ୍ୟା ବୃଦ୍ଧି ପାଉଥିବାରୁ ଜିଲା ପ୍ରଶାସନ ପକ୍ଷରୁ ଆବଶ୍ୟକ ପଦକ୍ଷେପ ନିଆଯାଉଛି। ଅଧିକ ସଂଖ୍ୟାରେ ସ୍ବାବ ପରୀକ୍ଷା ସହ ଟିକାକରଣକୁ ତ୍ୱରାନ୍ବିତ କରାଯାଉଥିବା ସୂଚନା ଦିଆଯାଇଛି।
