କେସିଙ୍ଗା,୨୨।୨(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକ ତୁର୍ଳାଖମନ ଧାନ ମଣ୍ଡି ନିକଟରେ ସୋମବାର ବିଳମ୍ବିତ ରାତିରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ବୋଲେରୋ-ଟ୍ରକ ମୁହାଁମୁହିଁ ଧକ୍କା ହେବା ଫଳରେ ୪ଜଣଙ୍କ ଘଟଣା ସ୍ଥଳରେ ମୃତ୍ୟୁ ଘଟିଛି। ୮ଜଣ ଗୁରୁତର ଆହତ ହୋଇଛନ୍ତି। ୪ ମୃତକ ହେଲେ ବଲାଙ୍ଗୀର ଜିଲା ସଇଁତଲା ବ୍ଲକ ଅଧୀନ ଶିଷକେଲା ଗ୍ରାମର ଯଜ୍ଞା ନାଗ(୩୫), ଖାଇରମାଲ ଗ୍ରାମର ଚମ୍ପା ନାଗ (୩୮), ଶିଷକେଲା ଗ୍ରାମର ଶୁକନ ନାଗ(୬୨), କଳାହାଣ୍ଡି ଜିଲା ପଲମ ଫାଣ୍ଡି ଅନ୍ତର୍ଗତ କେନ୍ଦୁବାହାଳି ଗ୍ରାମର ସୁଦାମ ସୁନା(୪୫)
ଆହତମାନେ ହେଲେ ମୁସ୍କାନା ସୁନା(୬), ମାଧୁରୀ ସୁନା(୧୮), ଷୋଭାଗିନୀ ହରପାଲ(୧୬), ଭକ୍ତ ନନ୍ଦ(୪୫), ବୁଡୁ ନାଗ(୫୦), ସୁନିତା କୁମାର(୧୭), ଶକ୍ତି କୁମାର(୨୫), ଯଦୁ ହରପାଳ(୫୦)। ଆହତଙ୍କୁ ଉଦ୍ଧାର କରି ପ୍ରଥମେ କେସିଙ୍ଗା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ ଭବାନୀପାଟଣା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି କେସିଙ୍ଗା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ବ୍ୟବଚ୍ଛେଦ ପାଇଁ ପଠାଇଛି।
ସୂଚନା ଯୋଗ୍ୟ, କେସିଙ୍ଗା ଥାନା ଅଞ୍ଚଳର ଜଣେ ଯୁବକଙ୍କ ବଲାଙ୍ଗୀର ଜିଲା ଶିଶକେଲା ପିପଲପଦର ଗାଁରେ ବିବାହ ଥିଲା । ଏନେଇ ବରଯାତ୍ରୀ ପିପଲପଦର ଯାଇଥିଲେ। ବିଳମ୍ବିତ ରାତିରେ ଏକ ବୋଲେରୋରେ ୧୨ ଜଣ କେସିଙ୍ଗା ଫେରୁଥିଲେ। ତୁର୍ଳାଖମନଠାରେ ବୋଲେରୋ ଏବଂ ଧାନ ବୋଝେଇ ଟ୍ରକ ମଧ୍ୟରେ ମୁହାଁମୁହିଁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ଦୁଇ ଜଣ ପୁରୁଷ ଏବଂ ୨ ମହିଳାଙ୍କ ମୃତ୍ୟୁ ଘଟିଛି। ଏନେଇ ପୋଲିସ ଏକ ଦୁର୍ଘଟଣା ମାମଲା ରୁଜୁ କରି ଘଟଣାର ଅଧିକ ତଦନ୍ତ ଚଳାଇଛି।
