ଭଞ୍ଜନଗର, ୨୦।୮(ବାବୁଲା ପ୍ରଧାନ):ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ଅନ୍ତର୍ଗତ କେନ୍ଦ୍ରୀୟ ବନାଞ୍ଚଳର ପାଲାସପଲ୍ଲୀ ଗାଁ ନିକଟସ୍ଥ ଏକ ଜମିରୁ ପ୍ରାୟ ୩୬ ଘନଫୁଟ ଶାଗୁଆନ କାଠ ଜବତ କରାଯାଇଛି। ଗୁରୁବାର ସକାଳେ ବନବିଭାଗର ଏକ ଟିମ ଚଢ଼ାଉ କରି ଏହି କାଠ ଜବତ କରିଥିବା ଜଣାପଡ଼ିଛି। ଜବତ କାଠର ଆନୁମାନିକ ମୂଲ୍ୟ ୫୦ ହଜାର ଟଙ୍କାରୁ ଊର୍ଦ୍ଧ୍ୱ ହେବ ବୋଲି ବନବିଭାଗ ପକ୍ଷରୁ ଜଣାପଡ଼ିଛି।
ସୂଚନାନୁଯାୟୀ, ଜଙ୍ଗଲଜାତ ଦ୍ରବ୍ୟ ବେଆଇନ ଭାବେ ମହଜୁଦ ରଖାଯାଇଥିବା ନେଇ ବନବିଭାଗକୁ ବିଶ୍ୱସନୀୟ ସୂଚନା ମିଳିଥିଲା। ଏହାପରେ ଡିଏଫଓ ହିମାଂଶୁ ଶେଖର ମହାନ୍ତି ରେଞ୍ଜର ପୃଥିବୀରାଜ ପ୍ରଧାନଙ୍କୁ ଆବଶ୍ୟକ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ। ଡି ଏଫ ଓ ଙ୍କ ନିର୍ଦ୍ଦେଶକ୍ରମେ ବିଭିନ୍ନ ସେକ୍ସନର ବନ କର୍ମଚାରୀମାନେ ଏକତ୍ରିତ ହୋଇ ସୂଚନା ମିଳିଥିବା ସ୍ଥାନରେ ଚଢ଼ାଉ କରିଥିଲେ। ଚଢ଼ାଉ ସମୟରେ ପ୍ରାୟ ୩୬ ଘନଫୁଟ ଶାଗୁଆନ କାଠ ମିଳିବା ପରେ ତାହାକୁ ଜବତ କରାଯାଇଛି।
ଏତେ ପରିମାଣର ଶାଗୁଆନ କାଠ ଉକ୍ତ ସ୍ଥାନକୁ କେଉଁଠାରୁ ଆସିଲା, ତାହାକୁ ନେଇ ପ୍ରଶ୍ନ ଉଠିଛି। ଗାଙ୍ଗପୁର ସେକ୍ସନ ଅଧୀନରେ ସଂରକ୍ଷିତ ଶାଗୁଆନ ଜଙ୍ଗଲ ଥିବାରୁ ସେଠାରୁ କାଠ ଚୋରି ହୋଇଥାଇପାରେ ବୋଲି ଆଶଙ୍କା ପ୍ରକାଶ ପାଇଛି। ଏଥିପାଇଁ ବୁଢ଼ାକେନ୍ଦୁ ଜଙ୍ଗଲ ଅଞ୍ଚଳରେ ଯାଞ୍ଚ ଓ ପାଟ୍ରୋଲିଂକୁ ଅଧିକ କଡ଼ାକଡ଼ି କରିବାକୁ ଦାବି ହୋଇଛି।
ଅନ୍ୟପକ୍ଷରେ, ଏହି ବେଆଇନ କାର୍ଯ୍ୟରେ କେଉଁମାନେ ସମ୍ପୃକ୍ତ ଅଛନ୍ତି, ସେନେଇ ବନବିଭାଗ ପକ୍ଷରୁ ତଦନ୍ତ ଜାରି ରହିଛି। ସମ୍ପୃକ୍ତ ବ୍ୟକ୍ତିଙ୍କୁ ଚିହ୍ନଟ କରିବା ସହ ଧରିବା ପାଇଁ ତଦନ୍ତକାରୀ ଟିମ ପ୍ରୟାସ ଜାରି ରଖିଛି। ଏନେଇ ବନବିଭାଗ ପକ୍ଷରୁ ଏକ ମାମଲା ରୁଜୁ କରାଯାଇ ଘଟଣାର ଅଧିକ ତଦନ୍ତ ଚାଲିଛି। ଘଟଣାରେ ଏପର୍ଯ୍ୟନ୍ତ କାହାରିକୁ ଗିରଫ କରାଯାଇନାହିଁ।
Dharitri – Odisha’s No.1 Odia Daily
