ନନ୍ଦପୁର/ପାଡୁଆ,୫।୫(ତୁଷାର କାନ୍ତ ମହାନ୍ତି/ଶଙ୍କର ପୂଜାରୀ): କାଳବୈଶାଖୀ ପ୍ରଭାବରେ ସୋମବାର ଓଡ଼ିଶା ସୀମାନ୍ତ ଆନ୍ଧ୍ର ପେଦାବାଇଲି ହାଟ ମଝିରେ ଏକ ବିରାଟ ଗଛ ଉପୁଡ଼ି ନନ୍ଦପୁର ବ୍ଲକରେ ତିନିଜଣଙ୍କ ମୃତ୍ୟୁ ଘଟଣା ମଙ୍ଗଳବାର ନୂଆ ମୋଡ ନେଇଛି । କ୍ଷତିପୂରଣ ପ୍ରଦାନ ପରେ ଶବ ବ୍ୟବଚ୍ଛେଦ କରିବାକୁ ଦିଆଯିବ ବୋଲି ଓଡ଼ିଶା ସରପଞ୍ଚ ଓ ମୃତକଙ୍କ ପରିବାର ଲୋକେ ଆନ୍ଧ୍ର ପ୍ରଶାସନକୁ ଦାବି କରିଛନ୍ତି । ଫଳରେ ଆନ୍ଧ୍ର ମୁଚିମପୁଟ ଥାନା ସମ୍ମୁଖରେ ମଙ୍ଗଳବାର ସକାଳୁ ଚାପା ଉତ୍ତେଜନା ଦେଖାଦେଇଛି ।
ସକାଳୁ କୋରାପୁଟ ଜିଲା ନନ୍ଦପୁର ବ୍ଲକ ପାନ୍ଥଲୁଙ୍ଗ ପଞ୍ଚାୟତ ସରପଞ୍ଚ ପୂଜା ଖିଲ, ସାମାଜିକ କର୍ମୀ ଆକାଶ ଖିଲ, ପଞ୍ଚାୟତର ବୁଦ୍ଧିଜୀବୀ ଆପନା ପାଙ୍ଗି, କୈଳାସ ଖେମୁଣ୍ଡୁ, ଶିବ ଅଲଗୁ, ଅର୍ଜୁନ ଖଡା, ସନ୍ତୋଷ ଖେମୁଣ୍ଡୁ, ଅନନ୍ତ ଖରାଙ୍କ ସମେତ ୩ ମୃତକ ଓ ଜଣେ ଆହତଙ୍କ ପରିବାର ଲୋକେ ମୁଚିମପୁଟ ଥାନାରେ ପହଞ୍ଚି ଆନ୍ଧ୍ର ସରକାର, ଏଏସଆର ଜିଲା ପ୍ରଶାସନ ମୁଚିମପୁଟ ପୋଲିସ, ପେଦାବାଇଲି ହାଟ କମିଟି ଓ ଆନ୍ଧ୍ର ସରପଞ୍ଚଙ୍କ ସମ୍ମୁଖରେ କ୍ଷତିପୂରଣ ପ୍ରଦାନ କରିବାକୁ ଦାବି କରିଛନ୍ତି । ଆନ୍ଧ୍ର ହାଟ କମିଟି ତରଫରୁ ଓଡ଼ିଶା ଚାଷୀ ଓ ବେପାରୀଙ୍କ ଠାରୁ ଜୋର ଜବରଦସ୍ତ ହାଟ ପାନୁ (କର) ଆଦାୟ କରାଯାଉଛି। ତେଣୁ ହାଟ କମିଟି ମୃତକଙ୍କ ପରିବାରକୁ ୨ ଲକ୍ଷ ଲେଖାଏଁ ଓ ଆହତଙ୍କ ପରିବାରକୁ ୫୦ ହଜାର ଟଙ୍କାର ଆର୍ଥିକ ସହାୟତା ପ୍ରଦାନ କରୁ ବୋଲି କହିଛନ୍ତି ।
ଆନ୍ଧ୍ର ସରକାର ଓ ଏଏସଆର ଜିଲା ପ୍ରଶାସନ ରାଜସ୍ବ ବିପର୍ଯ୍ୟୟ ପରିଚାଳନା ନିୟମ ପ୍ରକାରେ ଏକ୍ସଗ୍ରାସିଆ (ଅନୁକମ୍ପା) ରାଶି ପ୍ରଦାନ କରିବାର ବ୍ୟବସ୍ଥା କରନ୍ତୁ ବୋଲି ଦାବି କରିଛନ୍ତି । ଆନ୍ଧ୍ର ପେଦାବାଇଲି ସରପଞ୍ଚ, ଏମପିଟିସି, ଚେୟାରମେନ ମୁଚିମପୁଟ, ଜିଲା ପରିଷଦ ସଦସ୍ୟ ମୁଚିମପୁଟ ଓ ପୋଲିସ ପ୍ରଶାସନ ଓଡ଼ିଶା ପ୍ରତିନିଧିଙ୍କ ସହ ପ୍ରଥମ ଦଫା ଆଲୋଚନା କରିବା ପରେ ଏଏସଆର ଜିଲା ପ୍ରଶାସନଙ୍କୁ ଘଟଣା ସମ୍ପର୍କରେ ଅବଗତ କରାଯାଇଛି। ନିର୍ଦ୍ଦେଶ ମୁତାବକ କାର୍ଯ୍ୟନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦେଇଛନ୍ତି ।
