ପୁରୀ ଅଫିସ, ୧୪ା୧୦: ପୁରୀ ସହରରେ ବ୍ରାଉନସୁଗାର କାରବାର ବଢିଚାଲିଛି। ବିଶେଷକରି ଯୁବପିଢ଼ି ଏହି କାରବାରରେ ସମ୍ପୃକ୍ତ ହେଉଥିବାବେଳେ ଖୋର୍ଦ୍ଧା ଓ ଭୁବନେଶ୍ୱରରୁ ଏଠାକୁ ଧଳାଜହର ଆସୁଛି। ମଙ୍ଗଳବାର ରାତିରେ ପୁରୀ ପୋଲିସର ସ୍ପେଶାଲ ଟାସ୍କ ଫୋର୍ସ ଟିମ୍ ବ୍ରାଉନ ସୁଗାର ବିକ୍ରି କରୁଥିବା ଏକ ର଼୍ୟାକେଟ୍ର ୫ଜଣଙ୍କୁ ଗିରଫ କରିଛି। ସେମାନଙ୍କୁ ବୁଧବାର କୋର୍ଟ ଚାଲାଣ କରାଯାଇଛି। ଗିରଫ ଅଭିଯୁକ୍ତମାନେ ହେଲେ ଖୋର୍ଦ୍ଧା ଜିଲା ଖଣ୍ଡଗିରି ଥାନା ଅଧୀନ ଭୁବନେଶ୍ୱର ପୋଖରୀପୁଟ ଅଞ୍ଚଳର ଧୀରେନ୍ଦ୍ର ସାହୁ ଓରଫ ଟୁଟୁ (୪୦), ଖଣ୍ଡଗିରି ଅଞ୍ଚଳର ସୁବ୍ରତ ଖୁଣ୍ଟିଆ (୨୩), ଡୁମୁଡୁମା ଅଞ୍ଚଳର ମାଧବ ମଣ୍ଡଳ ଓରଫ ସନା (୨୮), ସୁରଜ ପରିଡ଼ା ଓରଫ ଗୁଡୁ (୨୧) ଏବଂ ବାଣପୁର ଥାନା ଅନ୍ତର୍ଗତ ଖୁଣ୍ଟପାଲିର ଆଦିତ୍ୟ ନାରାୟଣ ସ୍ବାଇଁ (୩୦)। ଏମାନଙ୍କଠାରୁ ୨୫୦ଗ୍ରାମର ବ୍ରାଉନସୁଗାର ସମେତ ୧୧ଟି ମୋବାଇଲ ଫୋନ, ୫ହଜାର ଟଙ୍କା, ଏଟିଏମ୍ କାର୍ଡ, ଡ୍ରାଇଭିଂ ଲାଇସେନ୍ସ, ଏକ ବାଇକ (ନଂ. ଓଡି ୩୩ ପି ୬୫୬୮) ଏବଂ ଏକ କାର୍ (ନଂ. ଓଆର୍ ୦୨-ଏଏମ୍ ୯୪୯୬) ଜବତ କରାଯାଇଛି। ଜବତ ବ୍ରାଉନସୁଗାରର ମୂଲ୍ୟ ୨୫ ଲକ୍ଷ ଟଙ୍କା ହେବ ବୋଲି ପୋଲିସ କହିଛି। ଏ ନେଇ କେସ୍ ନଂ. ୧୫୯/୨୧ ରୁଜୁ କରାଯାଇଛି।
ପୋଲିସ ସୂଚନା ମୁତାବକ, ପୁରୀରେ ବ୍ରାଉନସୁଗାର କାରବାର ରୋକିବା ପାଇଁ ଏସ୍ପି କନଓ୍ବର ବିଶାଲ ସିଂ ସ୍ପେଶାଲ ଟାସ୍କଫୋର୍ସ (ଏସ୍ଟିଏଫ୍) ଗଠନ କରିଛନ୍ତି। ଏଥିରେ ଅତିରିକ୍ତ ଏସ୍ପି ମିହିର ପଣ୍ଡା, ସିଟି ଡିଏସ୍ପି ଜନାର୍ଦ୍ଦନ ପାଢୀ, ସଦର ଏସ୍ଡିପିଓ ଏବଂ ବଳିଆପଣ୍ଡା ଥାନା ଅଧିକାରୀ ସାମିଲ ଅଛନ୍ତି। ମଙ୍ଗଳବାର ବିଳମ୍ବିତ ରାତିରେ ପୁରୀ ବାଇପାସ୍ ନିକଟରେ ବ୍ରାଉନସୁଗାର ବିକ୍ରି ଲାଗି ଯୋଜନା ଚାଲିଥିବାବେଳେ ପୋଲିସ ଖବର ପାଇଥିଲା। ବଳିଆପଣ୍ଡା ଥାନା ଅଧିକାରୀ ସେଠୀଙ୍କ ନେତୃତ୍ୱରେ ଏସ୍ଟିଏଫ୍ ଟିମ୍ ସେଠାରେ ଚଢ଼ାଉ କରି ଅଭିଯୁକ୍ତମାନଙ୍କୁ କାବୁ କରିଥିଲା।
