ନୂଆଦିଲ୍ଲୀ,୧୧।୨(ପି.ଟି.):ଭାରତରେ ପ୍ରତି ୧୦ ଲକ୍ଷ ଲୋକଙ୍କ ପାଇଁ ମାତ୍ର ୨୧ ଜଣ ବିଚାରପତି ରହିଛନ୍ତି। ଗୁରୁବାର ରାଜ୍ୟ ସଭାରେ ସରକାରଙ୍କ ପକ୍ଷରୁ ଏହି ସୂଚନା ଦିଆଯାଇଛି। ଏକ ପ୍ରଶ୍ନର ଲିଖିତ ଉତ୍ତର ଦେଇ ଆଇନ ମନ୍ତ୍ରୀ କିରେନ ରିଜିଜୁ କହିଥିଲେ, ୨୦୧୧ ଜନଗଣନା ଅନୁଯାୟୀ ଦେଶର ଲୋକସଂଖ୍ୟା ଏବଂ ଏକ ନିର୍ଦ୍ଦିଷ୍ଟ ବର୍ଷରେ ବିଭିନ୍ନ ଅଦାଲତର ବିଚାରପତି ସଂଖ୍ୟାକୁ ହିସାବକୁ ନିଆଯାଇ ବିଚାରପତି ଜନସଂଖ୍ୟା ଅନୁପାତ ପ୍ରସ୍ତୁତ ହୋଇଛି। ଗତବର୍ଷ ଡିସେମ୍ବର ୩୧ରେ ପ୍ରତି ନିୟୁତ ଜନସଂଖ୍ୟାରେ ବିଚାରପତିଙ୍କ ସଂଖ୍ୟା ୨୧.୩ ରହିଥିବା ମନ୍ତ୍ରୀ କହିଛନ୍ତି। ସୁପ୍ରିମକୋର୍ଟର ବିଚାରପତି ସଂଖ୍ୟା ୩୪ ରହିଥିବାବେଳେ ୨୫ ହାଇକୋର୍ଟର ବିଚାରପତି ସଂଖ୍ୟା ୧,୦୯୮ ରହିଛି। ଅଦାଲତଗୁଡ଼ିକରେ ବିଚାରାଧୀନ ମାମଲା ସଂଖ୍ୟା ବଢ଼ୁଥିବା ସମ୍ପର୍କିତ ପ୍ରଶ୍ନର ଉତ୍ତରରେ ରିଜିଜୁ କହିଥିଲେ, ଫାଷ୍ଟ ଟ୍ରାକ୍ କୋର୍ଟ ସମେତ ଅନ୍ୟାନ୍ୟ ସବ୍ଅର୍ଡିନେଟ କୋର୍ଟ ସ୍ଥାପନ କରିବା ରାଜ୍ୟ ସରକାରଙ୍କ ଦାୟିତ୍ୱ। ରାଜ୍ୟ ସରକାର ସମ୍ପୃକ୍ତ ହାଇକୋର୍ଟଙ୍କ ସହ ପରାମର୍ଶକ୍ରମେ ଅଧିକ ସବ୍ଅର୍ଡିନେଟ କୋର୍ଟ ଖୋଲିପାରିବେ। ତ୍ୱରିତ୍ ନ୍ୟାୟ ପ୍ରଦାନ ଲାଗି ଚତୁର୍ଦ୍ଦଶ ଅର୍ଥ କମିଶନ ୨୦୧୫-୨୦୨୦ ସୁଦ୍ଧା ୧,୮୦୦ ଫାଷ୍ଟ ଟ୍ରାକ୍ କୋର୍ଟ ସ୍ଥାପନ ଲାଗି ସୁପାରିସ କରିଥିଲେ। ଟିକସ ହସ୍ତାନ୍ତରଣ ଜରିଆରେ ମିଳୁଥବା ଅଧିକ ଆର୍ଥତ୍କ ସହାୟତାକୁ ଏଥିରେ ବିନିଯୋଗ କରିବାକୁ ଅର୍ଥ କମିଶନ ରାଜ୍ୟ ସରକାରଙ୍କୁ ପରାମର୍ଶ ଦେଇଥିଲେ। ଦେଶର ୨୨ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ମୋଟ ୮୯୮ ଫାଷ୍ଟଟ୍ରାକ୍ କୋର୍ଟ କାର୍ଯ୍ୟ କରୁଛି।
