କେନ୍ଦୁଝର,୩୦ା୭(ସ୍ବ.ପ୍ର.): କେନ୍ଦୁଝରର ଅତିରିକ୍ତ ଜିଲା ଦୌରାଜଜ୍ ମାନସ କୁମାର ମିଶ୍ର ଜଣେ ନାବାଳିକା ବଳାତ୍କାରୀଙ୍କୁ ୨୦ ବର୍ଷ ସଶ୍ରମ କାରାଦଣ୍ଡ ସହିତ ୧୦ ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ଜରିମାନା ଅନାଦେୟ ହେଲେ ୧ ବର୍ଷ ଅଧିକ ଜେଲଦଣ୍ଡ ଭୋଗିବାକୁ ପଡ଼ିବ ବୋଲି ଆଦେଶ ହୋଇଛି।
ସୂଚନାଯୋଗ୍ୟ, ୨୦୧୫ ଡିସେମ୍ବର ୧୪ରେ ହରିଚନ୍ଦନପୁର ଥାନା ଖଡ଼ିବାହାଳି ଗ୍ରାମର ଦାସ ମାଝି କୌଣସି କାମରେ ଖେଦିଆମୁଣ୍ଡାକୁ ଯାଇଥିଲେ। ତେବେ ଗାଁ ରାସ୍ତାରେ ଉକ୍ତ ଗ୍ରାମର ଜଣେ ୫ ବର୍ଷର ନାବାଳିକା ଏକାକୀ ବୁଲୁଥିବା ଦେଖି ତାଙ୍କୁ ପାଖ ହୁଡ଼ିକୁ ଉଠାଇ ନେଇ ବଳାତ୍କାର କରିଥିଲେ। ଝିଅଟି ସଂଜ୍ଞାହୀନ ହୋଇପଡ଼ିବାରୁ, ସେଠାରେ ଝିଅକୁ ଛାଡ଼ି ଦାସ ଫେରାର ହୋଇଯାଇଥିଲେ। ଝିଅର ପରିବାର ଲୋକେ ଖୋଜାଖୋଜି କରିବା ପରେ ଅଚେତ ଅବସ୍ଥାରେ ଝିଅକୁ ଉଦ୍ଧାର କରି ଥାନାରେ ୧୫ ତାରିଖରେ ଅଭିଯୋଗ କରିଥିଲେ। ପୋଲିସ କେସ ନଂ.୧୫୬/୨୦୧୫ରେ ଏକ ମାମଲା ରୁଜୁ କରି ଦାସଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ଏହି କେସ୍ରେ ୧୫ ଜଣ ସାକ୍ଷୀଙ୍କ ବୟାନ ଶୁଣିବା ପରେ ବିଚାରପତି ଶନିବାର ଦାସଙ୍କୁ ୨୦ ବର୍ଷ ସଶ୍ରମ କାରାଦଣ୍ଡ ସହିତ ୧୦ ହଜାର ଟଙ୍କା ଜରିମାନା ଆଦେଶ ଦେଇଛନ୍ତି। ସେହିପରି ପୀଡ଼ିତାଙ୍କୁ ଦେଢ଼ ଲକ୍ଷ ଟଙ୍କା ସହାୟତା ପ୍ରଦାନ କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।
