ସିମୁଳିଆ, ୧୫ା୪(ଡି.ଏନ.ଏ.): ଦିନେ କିମ୍ବା ଦୁଇଦିନ ନୁହେଁ, ୨୦ବର୍ଷ ହେଲା ପୁଅର କିଛି ପତ୍ତା ନାହିଁ। ବିଭିନ୍ନ ମନ୍ଦିର, ସାଧକ, ଜ୍ୟୋତିଷଙ୍କ ନିକଟକୁ ବୁଝାବୁଝି ପାଇଁ ଯାଇ ଅନେକ ଟଙ୍କା ଖର୍ଚ୍ଚ କରିସାରିଲେଣି। ସମସ୍ତଙ୍କଠାରୁ ଆଶ୍ୱାସନା ମିଳୁଛି । ତେବେ ପୁଅ ବଞ୍ଚିଛି, ନିଶ୍ଚୟ ଫେରିବ ବୋଲି ମନରେ ଆଶା ରଖିଛନ୍ତି ବାଲେଶ୍ୱର ଜିଲା ସିମୁଳିଆ ବ୍ଲକ ବଙ୍ଗାଳପୁର ପଞ୍ଚାୟତ ଅଧୀନ ବଙ୍ଗାଳପୁର ଅଞ୍ଚଳର ୬୦ବର୍ଷୀୟା ମଲ୍ଲୀ ଜେନା। ।
ଜେନା ଓ ମଲ୍ଲୀ ଜେନାଙ୍କ ଦୁଇ ଝିଅ ଓ ଦୁଇ ପୁଅ। ଉମାକାନ୍ତ ହେଉଛନ୍ତି ବଡପୁଅ। ମଲ୍ଲୀ ଓ ସନାତନ ଚାଷକାମ କରି ଚଳନ୍ତି । ପରିବାର ଚଳାଇବା ପାଇଁ ମାତ୍ର ୧୭ବର୍ଷ ବୟସରେ ବଡପୁଅ ଉମାକାନ୍ତ ଘରୁ ଗୋଡକାଢି ପଡୋଶୀଙ୍କ ସହିତ ମୁମ୍ବାଇ ଯାଇଥିଲେ। ସେଠାରେ ଥାନେ ଅଞ୍ଚଳରେ ଥିବା ସିନ୍ଧୁଦୁର୍ଗା ହୋଟେଲରେ କାମ ଆରମ୍ଭ କରିଥିଲେ। ପରେ ଟଙ୍କା ପଠାଇ ସାନ ଭଉଣୀଙ୍କ ବିବାହ ସମ୍ପନ୍ନ କରାଇଥିଲେ। ଭଉଣୀ ବିବାହ ପରେ ଘରକୁ ଆସି ପୁଣି ମୁମ୍ବାଇ ଯିବା ପରେ ଗତ ୨୦ବର୍ଷ ହେଲା ଉମାକାନ୍ତଙ୍କ କୌଣସି ଖୋଜ ଖବର ନ ଥିବା କହିଛନ୍ତି ତାଙ୍କ ମା’ ମଲ୍ଲୀ । ଘରକୁ ଫୋନ ନାହିଁ କିମ୍ବା ପୁଅଠାରୁ ଘର ଚଳାଇବା ପାଇଁ ଟଙ୍କା ମଧ୍ୟ ଆସୁନାହିଁ । ସମ୍ପର୍କୀୟମାନଙ୍କୁ ପୁଅର ଖବର ନେବା ପାଇଁ ମଲ୍ଲୀ ବହୁତ ନେହୁରା ହୁଅନ୍ତି, ପ୍ରତ୍ୟେକ ଦିନ ସେ ପୁଅର ବାଟକୁ ଚାହିଁ ରହନ୍ତି। ତାଙ୍କ ପରିବାର ହରିଜନ ଶ୍ରେଣୀର ହୋଇଥିବାରୁ ପ୍ରଶାସନ କିମ୍ବା କେଉଁଠି କଣ ଆବେଦନ କରିବା ପାଇଁ ପଡିବ ତାହା ମଧ୍ୟ ତାଙ୍କୁ ଜଣାନାହିଁ। ପ୍ରଶାସନ ଏ ଦିଗରେ ସହାୟତା କରିବାକୁ ଉମାକାନ୍ତଙ୍କ ପରିବାର ଲୋକେ ନିବେଦନ କରିଛନ୍ତି।
