ବଇଣ୍ଡା,୨୮।୮(ପରିକ୍ଷିତ ସାହୁ): ଅନୁଗୋଳ ଜିଲା କିଶୋରନଗର ଥାନା ଧଉରାପାଲିରେ ଏକ ହୃଦୟବିଦାରକ ଘଟଣା ଘଟିଛି। ପାଇଖାନା ଟାଙ୍କିରେ ଶ୍ବାସରୁଦ୍ଧ ହୋଇ ୨ ଶ୍ରମିକଙ୍କ ମୃତ୍ୟୁ ଘଟିଛି। ମୃତକ ଦୁଇଜଣ ହେଲେ ବଇଜା ଗ୍ରାମର ଆର୍ତତ୍ରାଣ ମିର୍ଦ୍ଧା ଏବଂ ବାମୁର ଗ୍ରାମରର ରୀନା ମହାର ବୋଲି ସୂଚନା ମିଳିଛି।
ଘଟଣାରୁ ଜଣାପଡିଛି ଯେ, ଓସ୍କାପାଲି ଅଞ୍ଚଳର ଜଣେ ଅବସରପ୍ରାପ୍ତ ପ୍ରଧାନ ଶିକ୍ଷକ ଧଉରାପାଲି ଗ୍ରାମରେ ଜମି କିଣି ଘର ନିର୍ମାଣ କରୁଛନ୍ତି । ଏହି ଘର ନିର୍ମାଣ ଦାୟିତ୍ୱରେ ଥିବା ରାଜମିସ୍ତ୍ରୀ ଭାବରେ କାମ କରୁଥିବା ଆର୍ତ୍ତତ୍ରାଣଙ୍କୁ ଠିକା ଭାବରେ ଦିଆଯାଇଛି । ଘର ପାଖରେ ଏକ ପାଇଖାନା ଟାଙ୍କି ନିର୍ମାଣ କରାଯାଇଛି । ଉକ୍ତ ପାଇଖାନା ଟାଙ୍କିରେ ସେଟ୍ରିଙ୍ଗ ଖୋଲିବା ପାଇଁ ବୁଧବାର ସକାଳ ୮ଟାରେ ଆର୍ତ୍ତତ୍ରାଣଙ୍କ ସହ ମହିଳା ଶ୍ରମିକ ରୀନା ପାଇଖାନା ଟାଙ୍କି ଭିତରେ ପଶିଥିଲେ। ଅନ୍ୟ ଆଉ କିଛି ଶ୍ରମିକ ଘର କାମ କରୁଥିଲେ। ହେଲେ ଉଭୟ ୨ ଜଣ ପାଇଖାନା ଟାଙ୍କିରୁ ବର୍ଷା ଜଳ ଗୁଡିକ କାଢିବା ପାଇଁ ବ୍ୟବସ୍ଥା କରୁଥିବା ବେଳେ ଶ୍ୱାସରୁଦ୍ଧ ହୋଇଯାଇଥିଲେ। ଦୀର୍ଘ ୧ ଘଣ୍ଟା ହେବ ଉକ୍ତ ଟାଙ୍କିରୁ ନ ବାହାରିବା ପରେ କିଛି ଶ୍ରମିକ ଓ ଅବସରପ୍ରାପ୍ତ ଶିକ୍ଷକଙ୍କର ସମ୍ପର୍କୀୟମାନେ ଯାଇ ଦେଇବାରୁ ଉଭୟ ଅଚେତ ଅବସ୍ଥାରେ ଉକ୍ତ ଟାଙ୍କିରେ ପଡିଥିଲେ।
ଏ ନେଇ ବାମୁର ଅଗ୍ନିଶମ ବିଭାଗ କର୍ମଚାରୀଙ୍କୁ ସୂଚନା ଦିଆଯାଇଥିଲା। ଖବର ପାଇଁ ବାମୁର ଅଗ୍ନିଶମ ବିଭାଗର ଏକ ଟିମ ପହଞ୍ଚି ଉଭୟଙ୍କୁ ଅଚେତ ଅବସ୍ଥାରେ କିଶୋରନଗର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ପରେ ସେଠାରେ କିଶୋରନଗର ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ।
ଏହି ଘଟଣା ଜଣାପଡିବା ପରେ କିଶୋରନଗର ଡାକ୍ତର ଖାନାରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ଖବର ପାଇ କିଶୋରନଗର ତହସିଲଦାର ମନୋଜ କୁମାର ପ୍ରଧାନ, କିଶୋରନଗର ଆଇଆଇସି ବିଭୁତି ପ୍ରଧାନ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ପରେ କିଶୋରନଗର ତହସିଲଦାର ରେଡ କ୍ରସରୁ ଉଭୟ ପରିବାରକୁ ୧୦ ହଜାର ଟଙ୍କା ଲେଖାଏ ସାହାଯ୍ୟ ଯୋଗାଇ ଦେଇଛନ୍ତି । କିଶୋରନଗର ପୋଲିସ ଦୁଇଟି ମୃତଦେହ ଜବତ କରି ନମ୍ବର ୮/୨୦୨୪ ଓ ୯/୨୦୨୪ ରେ ଦୁଇଟି ଅପମୃତ ମାମଲା ରୁଜୁ କରିଛି ।
