ଅମୃତସର,୧୭।୧୧ : ଅମୃତସର ପୋଲିସ ଆତଙ୍କବାଦୀ ନେଟୱାର୍କର ଦୁଇ ଆତଙ୍କବାଦୀଙ୍କୁ ଗିରଫ କରିଛି। ପୋଲିସ ସେମାନଙ୍କ ପାଖରୁ ତିନୋଟି ହ୍ୟାଣ୍ଡ ଗ୍ରେନେଡ, ଏକ ଲକ୍ଷ ଟଙ୍କା ଏବଂ ଗୋଟିଏ କାର ଜବତ କରିଛି। ତେବେ ଘଟଣାର ଗମ୍ଭୀରତାକୁ ଦୃଷ୍ଟିରେ ରଖି ବରିଷ୍ଠ ପୋଲିସ ଅଧିକାରୀ କିଛି ପ୍ରକାଶ କରିବାକୁ ପ୍ରସ୍ତୁତ ନୁହଁନ୍ତି। ଖୁବ ଶୀଘ୍ର ଡିଜିପି ଗୌରବ ଯାଦବ ଚଣ୍ଡିଗଡ଼ରେ ଏନେଇ ଏକ ଗଣମାଧ୍ୟମ ସମ୍ମିଳନୀ କରିପାରିବେ।
ଗିରଫ ଆତଙ୍କବାଦୀମାନେ ଫେରୋଜପୁର ଜିଲାର ବାରକେ ଗ୍ରାମର ପ୍ରକାଶ ସିଂ ଛଦ୍ମନାମ ମିଣ୍ଟୁ ଏବଂ ଫେରୋଜେପୁରର ସାଦର ପୋଲିସ ଷ୍ଟେଶନ ଅନ୍ତର୍ଗତ ଆଲିକେ ଗାଁର ବାସିନ୍ଦା ଅଙ୍ଗ୍ରେଜୀ ସିଂ ଛଦ୍ମନାମ ଗେଜା ବୋଲି ଜଣାପଡିଛି। ପୋଲିସକୁ ଗୁପ୍ତସୂଚନା ମିଳିଥିଲା ଯେ ଆତଙ୍କବଦାଦୀମାନେ ପଠାନକୋଟରୁ ଅମୃତସର ଆଡକୁ ଏକ କାରରେ ଆସୁଛନ୍ତି। ଗୁରୁବାର ସକାଳେ ମକବୁଲପୁରା ଅଞ୍ଚଳରେ ଅବରୋଧ କରି ପୋଲିସ ଗାଡି ଯାଞ୍ଚ ଆରମ୍ଭ କରିଥିଲା।
ଏହି ସମୟରେ ପଠାନକୋଟରୁ ଆସୁଥିବା ଏକ କାରକୁ ଅଟକାଇ ତଲାସୀ କରାଯାଇଥିଲା ଏବଂ କାରରୁ ତିନୋଟି ହ୍ୟାଣ୍ଡ ଗ୍ରେନେଡ ଜବତ କରାଯାଇଥିଲା। ଏହା ବ୍ୟତୀତ ପୋଲିସ ସନ୍ଦିଗ୍ଧଙ୍କ ନିକଟରୁ ଏକ ଲକ୍ଷ ଟଙ୍କା ଜବତ କରିଛି। ପୋଲିସ ସନ୍ଦେହ କରୁଛି ଯେ ଅଭିଯୁକ୍ତମାନେ ଏହି ଗ୍ରେନେଡକୁ ଜମ୍ମୁ-କଶ୍ମୀରର କିଛି ଆତଙ୍କବାଦୀ ସଂଗଠନରୁ ଆଣିଛନ୍ତି। ଉଭୟଙ୍କୁ ଗିରଫ କରିବା ପରେ ପୋଲିସ ଘଟଣାର ତଦନ୍ତ ଆରମ୍ଭ କରିଛି।
