ଲଙ୍ଗଳେଶ୍ୱର, ୬।୯(କମଳାକାନ୍ତ ଦାସ): ବାଲେଶ୍ୱର ଜିଲା ସଦର ବ୍ଲକ ଦେଇ ପ୍ରବାହିତ ହେଉଥିବା ଡୁବୁଡୁବି ନଦୀର ଶାଖା ନଦୀ ହେଉଛି ହାଣ୍ଡିଭସା ନଦୀ। ଏହି ନଦୀ ଆଳୁମେଦା ଏବଂ କଷାଫଳ ପଞ୍ଚାୟତର ମଧ୍ୟସ୍ଥଳୀରେ ରହିଥିବାରୁ ଲୋକଙ୍କ ଯାତାୟାତ ପାଇଁ ଏଠାରେ ଏକ ପକ୍କା ପୋଲ ଦୀର୍ଘ ୨୦ବର୍ଷ ପୂର୍ବରୁ ପ୍ରଶାସନ ପକ୍ଷରୁ ନିର୍ମାଣ ହୋଇଥିଲା। ପୋଲ ଉପରେ କେବଳ ଏହି ଦୁଇଟି ପଞ୍ଚାୟତ ନୁହେଁ ସଦର ବ୍ଲକ ଏବଂ ବାଲିଆପାଳ ବ୍ଲକର ଲକ୍ଷାଧିକ ଲୋକେ ନିର୍ଭର କରିଥାନ୍ତି। ତେବେ ପୋଲ ଦୁର୍ବଳ ଏବଂ ବିପଦସଙ୍କୁଳ ଅବସ୍ଥାରେ ଥିବାରୁ ସ୍ଥାନୀୟ ଲୋକେ ଏଠାରେ ନୂତନ ପକ୍କା ପୋଲ ନିର୍ମାଣ କରିବା ପାଇଁ ପ୍ରଶାସନ ଏବଂ ବିଭାଗୀୟ ଅଧୀକାରୀଙ୍କ ବାରମ୍ବାର ଦୃଷ୍ଟି ଆକର୍ଷଣ କରିଥିଲେ। ମାତ୍ର ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିଲା। ତେବେ ଗତ ଦୁଇ ଦିନ ପୂର୍ବରୁ ପ୍ରବଳ ବର୍ଷା ଏବଂ ଲୁଣି ଜୁଆର ଯୋଗୁ ପୋଲ ଭୁଶୁଡ଼ି ପଡ଼ିଥିଲା। ଫଳରେ ଲୋକଙ୍କ ଯାତାୟାତ ସମ୍ପୂର୍ଣ୍ଣ ଠପ୍ ହୋଇ ଯାଇଥିଲା। ପୋଲ ଭୁଶୁଡ଼ିବା ପରେ ସ୍ଥାନୀୟ ଲୋକେ ପୋଲ ନିର୍ମାଣ ପାଇଁ ପ୍ରଶାସନକୁ ଜଣାଇଥିଲେ। ମାତ୍ର ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ କରା ନ ଯିବାରୁ କଷାଫଳ ଏବଂ ଆଳୁମେଦା ପଞ୍ଚାୟତର ଶତାଧିକ ଲୋକେ ମିଳିତ ହୋଇ ନିକଟସ୍ଥ ଜଙ୍ଗଲରୁ କାଠ ସଂଗ୍ରହ କରି ଏକ ଅସ୍ଥାୟୀ କାଠ ପୋଲ ନିର୍ମାଣ କରିଛନ୍ତି। ପୋଲ ଭୁଶୁଡ଼ିବା ଯୋଗୁ ଯାତାୟାତ ସମ୍ପୂର୍ଣ୍ଣ ଭାବରେ ବନ୍ଦ ହୋଇ ଥିଲା। ମାତ୍ର ଦୁଇ ପଞ୍ଚାୟତବାସୀଙ୍କ ସହଯୋଗରେ ଅସ୍ଥାୟୀ କାଠପୋଲ ନିର୍ମାଣ ପରେ ଏବେ ଅଞ୍ଚଳବାସୀ ସୁରୁଖୁରୁରେ ଯାତାୟାତ କରୁଛନ୍ତି। ତେବେ ଅସ୍ଥାୟୀ ପୋଲ ନିର୍ମାଣ ପରେ ଯାତାୟାତ ସ୍ବାଭାବିକ ହୋଇଥିବା ବେଳେ ଏଠାରେ ପ୍ରଶାସନ ପକ୍ଷରୁ ଏକ ନୂତନ ପକ୍କାପୋଲ ନିର୍ମାଣ କରିବା ପାଇଁ ଦାବି କରିଛନ୍ତି ଲୋକେ। ଜିଲା ପରିଷଦ ଅଧ୍ୟକ୍ଷ ନାରାୟଣ ପ୍ରଧାନ, ସଦର ବ୍ଲକ ଅଧ୍ୟକ୍ଷା ସୁନୀତା ବେହରା ମଙ୍ଗଳବାର ଗାଁରେ ପହଞ୍ଚତ୍ ତୁରନ୍ତ ଏଠାରେ ପକ୍କା ପୋଲ ନିର୍ମାଣ ପାଇଁ ବିଭାଗୀୟ ଅଧିକାରୀଙ୍କ ଯୋଗାଯୋଗ କରିବା ସହ ଖୁବ୍ଶୀଘ୍ର ପକ୍କା ପୋଲ ନିର୍ମାଣ ନେଇ ପ୍ରତିଶ୍ରୁତି ଦେଇଛନ୍ତି। ଏହାସହ ଅସ୍ଥାୟୀ କାଠ ପୋଲ ନିର୍ମାଣ ପାଇଁ ଖର୍ଚ୍ଚ ହୋଇଥିବା ଅର୍ଥ ରାଶି ଜିଲା ପରିଷଦ ପାଣ୍ଠିରୁ ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି। ଅନ୍ୟମାନଙ୍କ ମଧ୍ୟରେ ଗୁରୁପଦ ମଣ୍ଡଳ, ଶକ୍ତିପଦ ରାୟ, ମୁକୁନ୍ଦ ଆଦେକ, ପ୍ରିୟରଞ୍ଜନ ପୃଷ୍ଟି, କାର୍ତ୍ତିକ ମାନ୍ନା, ଶିବାନନ୍ଦ ପାତ୍ର, ସୁବଳ ସାମନ୍ତ, ଶୁକଦେବ ମଣ୍ଡଳ, ସତ୍ୟ ଜେନା, ଗୌତମ ସାହୁ, ବାସୁଦେବ ସିଙ୍କ ସମେତ ଦୁଇ ପଞ୍ଚାୟତର ଶତାଧିକ ପୋଲ ନିର୍ମାଣରେ ସହଯୋଗ କରିଥିଲେ।
