ବେଙ୍ଗାଲୁରୁ,୩।୮: କର୍ନାଟକରେ କଂଗ୍ରେସ ସରକାରଙ୍କ କ୍ୟାବିନେଟ ବିସ୍ତାରକୁ ନେଇ ଚାଲିଥିବା କଳ୍ପନାଜଳ୍ପନାର ଅନ୍ତ ଘଟିଥିବାବେଳେ ନୂତନ ଭାବରେ ପ୍ରକାଶିତ ମନ୍ତ୍ରୀ ତାଲିକା ସେହି ବିଧାୟକମାନଙ୍କୁ ନିରାଶ କରିଛି ଯେଉଁମାନେ କ୍ୟାବିନେଟ ପାହ୍ୟା ପାଇଁ ଆଶା ରଖିଥିଲେ। କ୍ୟାବିନେଟ ବିସ୍ତାର ପୂର୍ବରୁ ଦୁଇ ଜଣ କଂଗ୍ରେସ ବିଧାୟକ ଇସ୍ତଫା ଦେଇଛନ୍ତି। ରାଜ୍ୟରେ ରାଜନୈତିକ ଅସ୍ଥିରତା ମଧ୍ୟରେ କର୍ନାଟକର ଉପମୁଖ୍ୟମନ୍ତ୍ରୀ ଡି.କେ. ଶିବକୁମାର ଏକ ଗୁରୁତ୍ୱପୂର୍ଣ୍ଣ ବୟାନ ଦେଇ ସ୍ପଷ୍ଟ କରିଛନ୍ତି ଯେ, ସମସ୍ତ ବିଧାୟକଙ୍କୁ ଏକାଥରେ କ୍ୟାବିନେଟ୍ରେ ସାମିଲ କରିବା ସମ୍ଭବ ନୁହେଁ।
ଶିବକୁମାର କହିଛନ୍ତି, ପ୍ରତ୍ୟେକ ବିଧାୟକଙ୍କୁ କ୍ୟାବିନେଟ୍ରେ ସାମିଲ କରିବା ସମ୍ଭବ ନୁହେଁ। ଯେଉଁମାନେ ଏଥର ହାତଛଡ଼ା ହୋଇଛନ୍ତି ସେମାନେ ଭବିଷ୍ୟତରେ ସୁଯୋଗ ପାଇବେ। ମୁଁ ସିଦ୍ଧରମୈୟାଙ୍କ କ୍ୟାବିନେଟ୍ଷର ଆରମ୍ଭରେ ମନ୍ତ୍ରୀ ପଦ ପାଇ ନ ଥିଲି, କିନ୍ତୁ ପରେ ମୁଁ ମନ୍ତ୍ରୀ ହୋଇଥିଲି। ସେହିପରି ଭବିଷ୍ୟତରେ ସମସ୍ତଙ୍କୁ ସୁଯୋଗ ପ୍ରଦାନ କରିବୁ।
ଦୁଇ ଜଣ କଂଗ୍ରେସ ବିଧାୟକ କ୍ୟାବିନେଟ୍ରେ ସ୍ଥାନ ନ ପାଇବାରୁ ହତାଶାରେ ଇସ୍ତଫା ଦେଇଥିଲେ। ସୂଚନା ଅନୁଯାୟୀ, ଇଣ୍ଡି ନିର୍ବାଚନମଣ୍ଡଳୀର ବିଧାୟକ ପାଟିଲ ବିଧାନସଭାରେ ଉପବାଚସ୍ପତି ରୁଦ୍ରପ୍ପା ଲାମାନୀଙ୍କୁ ତାଙ୍କ ଇସ୍ତଫାପତ୍ର ପ୍ରଦାନ କରିଛନ୍ତି। ଇସ୍ତଫା ଘୋଷଣା ପରେ, ତାଙ୍କ ସମର୍ଥକମାନେ ତାଙ୍କ ପ୍ରତି ଅନ୍ୟାୟ ହୋଇଥିବା ଅଭିଯୋଗ କରି ସ୍ଲୋଗାନ ଦେଇ ପ୍ରତିବାଦ ପ୍ରଦର୍ଶନ କରିଛନ୍ତି। କଂଗ୍ରେସ ବିଧାୟକ ଯଶୱନ୍ତରାୟଗୌଡ଼ା ଭି. ପାଟିଲ ମଧ୍ୟ ଇସ୍ତଫା ଦେଇଛନ୍ତି।
ମୁଖ୍ୟମନ୍ତ୍ରୀ ଡି.କେ. ଶିବକୁମାର ଦାୟିତ୍ୱ ଗ୍ରହଣ କରିବାର ଦୁଇ ମାସ ପରେ ସୋମବାର ମନ୍ତ୍ରିମଣ୍ଡଳ ବିସ୍ତାର ହୋଇଛି ।
Dharitri – Odisha’s No.1 Odia Daily
