ଭୁବନେଶ୍ୱର, ୮।୧୨(ବ୍ୟୁରୋ): ୨୦୨୩ ଯୁକ୍ତ୨ ପରୀକ୍ଷା ଲାଗି ଫର୍ମ ପୂରଣ ପ୍ରକ୍ରିୟା ଶେଷ ହୋଇଥିବା ବେଳେ ତାରିଖ ସମ୍ପର୍କିତ ବିଜ୍ଞପ୍ତି ପ୍ରକାଶ କରିବାକୁ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ଉଦ୍ୟମ ହେଉଛି। ତେବେ ଚଳିତବର୍ଷ ୨ଥର ଫର୍ମ ପୂରଣ କରିବାକୁ ପିଲାଙ୍କୁ ସୁଯୋଗ ଦିଆଯାଇଥିଲା। ଆବଶ୍ୟକ ହେଲେ ପୁଣି ଫର୍ମପୂରଣ କରିବାକୁ ଶେଷ ସୁଯୋଗ ଦିଆଯିବ ବୋଲି ବିଚାର କରାଯାଉଛି। ହେଲେ ସେ ନେଇ ଚୂଡ଼ାନ୍ତ ନିଷ୍ପତ୍ତି ହୋଇନାହିଁ।
୨୦୨୦ ଓ ୨୦୨୧ରେ ଅଫ୍ଲାଇନ୍ ପରୀକ୍ଷା କରା ନ ଯାଇ ବିକଳ୍ପ ବ୍ୟବସ୍ଥାରେ ମାର୍କିଂ କରାଯାଇଥିଲା। ୨୦୨୨ରେ ଅଫ୍ଲାଇନ୍ ପରୀକ୍ଷା କରିବାକୁ ଗଣଶିକ୍ଷା ବିଭାଗ ପକ୍ଷରୁ ନିଷ୍ପତ୍ତି ହୋଇଥିଲା। ମାତ୍ର ପରୀକ୍ଷାରେ ସ୍ବଚ୍ଛତା ଲାଗି ଯେତିକି ପଦକ୍ଷେପ ଗ୍ରହଣ କରିବାକୁ ବିଭାଗ ପକ୍ଷରୁ ନିଷ୍ପତ୍ତି ହୋଇଥିଲା ତାହା ବିଳମ୍ବ କାରଣରୁ ଲାଗୁ କରାଯାଇ ପାରି ନ ଥିଲା। ମାତ୍ର ୨୦୨୩ ପରୀକ୍ଷାରେ ସ୍ବଚ୍ଛତାକୁ ଗୁରୁତ୍ୱ ଦେଇ କଡ଼ା ପଦକ୍ଷେପ ଗ୍ରହଣ କରିବାକୁ ଯୁକ୍ତ୨ ପରିଷଦ ପକ୍ଷରୁ ବ୍ଲୁ-ପ୍ରିଣ୍ଟ ପ୍ରସ୍ତୁତ ହେଉଛି। ଜାନୁୟାରୀରେ କଳା, ବିଜ୍ଞାନ, ବାଣିଜ୍ୟ, ଧନ୍ଦାମୂଳକ ଶିକ୍ଷାର ପ୍ରାକ୍ଟିକାଲ ପରୀକ୍ଷା ଓ ମାର୍ଚ୍ଚ ଦ୍ୱିତୀୟ ସପ୍ତାହ କିମ୍ବା ଏପ୍ରିଲ ପ୍ରଥମ ସପ୍ତାହରୁ ଥିଓରି ପରୀକ୍ଷା କରିବାକୁ ଯୋଜନା କରାଯାଇଛି। ରାଜ୍ୟରେ ୨,୦୬୫ଟି ଉଚ୍ଚ ମାଧ୍ୟମିକ ସ୍କୁଲ ରହିଛି।
ଚଳିତବର୍ଷ ପ୍ରାୟ ୧,୧୫୦ରୁ ୧,୨୦୦ ଉଚ୍ଚ ମାଧ୍ୟମିକ ସ୍କୁଲକୁ ପରୀକ୍ଷା କେନ୍ଦ୍ର ଭାବେ ଚୟନ କରିବାକୁ ନିଷ୍ପତ୍ତି ହୋଇଛି। ପରୀକ୍ଷା ସୁପରିଚାଳନା ଲାଗି ପ୍ରଥମକରି ସରକାରୀ ତଥା ଜିଲା କଲେଜ ଅଧୀନରେ ଥିବା ପରୀକ୍ଷା କେନ୍ଦ୍ରଗୁଡ଼ିକୁ ଟ୍ୟାଗ୍ କରାଯିବ। ଏହି ଟ୍ୟାଗ୍ ସେଣ୍ଟରକୁ ଦୈନିକ ଯାଞ୍ଚ ହେବ। ପରୀକ୍ଷା କେନ୍ଦ୍ରରେ ଗୋଟିଏ ଶ୍ରେଣୀରେ ଯେପରି କମ୍ ସଂଖ୍ୟକ ପରୀକ୍ଷାର୍ଥୀ ବସି ପରୀକ୍ଷା ଦେବେ ସେଥିଲାଗି ଅଧିକ ସଂଖ୍ୟକ ଉଚ୍ଚ ମାଧ୍ୟମିକ ସ୍କୁଲକୁ ମନୋନୀତ କରାଯିବ। କଲେଜରେ ସିସି ଟିଭି ସହ ୨୪ଘଣ୍ଟିଆ ସୁରକ୍ଷା ବ୍ୟବସ୍ଥା ଲାଗି ପଦକ୍ଷେପ ଗ୍ରହଣ କରାଯିବ। ପ୍ରତି ଜୋନ୍ୱାରି ତ୍ରିସ୍ତରୀୟ ସ୍କ୍ବାଡ୍ ବ୍ୟବସ୍ଥା ରହିବ। ଆଡମିଟ୍ କାର୍ଡରେ ବାର୍କୋଡ୍ ବ୍ୟବସ୍ଥା ରଖିବାକୁ ନିଷ୍ପତ୍ତି ହୋଇଛି। ଏହାଦ୍ୱାରା ନକଲି ପରିକ୍ଷାର୍ଥୀଙ୍କୁ ଧରିବାରେ ସହଜ ହେବ। ବିଶେଷକରି ପରୀକ୍ଷା ପରିଚାଳନା ସହ ମୂଲ୍ୟାଙ୍କନ ଏବଂ ରେଜଲ୍ଟ ପ୍ରକାଶ ଯେପରି ସୁରୁଖୁରୁରେ ଶେଷ ହେବ ସେଥିଲାଗି ପରିଷଦ ପକ୍ଷରୁ ମାନସ ମନ୍ଥନ ଆରମ୍ଭ ହୋଇଥିବା ସୂଚନା ମିଳିଛି।
