ଯେଉଁ ବୟସରେ ଅଧିକାଂଶ ଛାତ୍ର ସେମାନଙ୍କର କଲେଜ ଶିକ୍ଷା ଆରମ୍ଭ କରୁଛନ୍ତି, ସେହି ବୟସରେ ଆମେରିକାର ଜଣେ ଯୁବକ କଲେଜ ପ୍ରଫେସର ଭାବରେ ଛାତ୍ରମାନଙ୍କୁ ପାଠ ପଢ଼ାଉଛନ୍ତି। ଆମେରିକାର ଫ୍ଲୋରିଡାର ବାସିନ୍ଦା ନାଥନ ଥମାସ ବର୍ତ୍ତମାନ କଲେଜ ସ୍ତରରେ ପାଠ ପଢ଼ାଉଛନ୍ତି। ମାତ୍ର ୧୮ ବର୍ଷ ଏବଂ ୩୪୬ ଦିନ ବୟସରେ, ଥମାସ ବିଶ୍ୱର ସବୁଠାରୁ କମ ବୟସର ପୁରୁଷ ପ୍ରଫେସର ଭାବରେ ଗିନିଜ ୱାଲର୍ଡ ରେକର୍ଡରେ ସ୍ଥାନ ପାଇ ୩୦୬ ବର୍ଷ ଧରି ରହିଥିବା ଏକ ରେକର୍ଡ ଭାଙ୍ଗିଛନ୍ତି।
ନାଥନ ଥମାସ ଫ୍ଲୋରିଡାର ମିଆମି ଡେଡ କଲେଜରେ ଜଣେ ଇଞ୍ଜିନିୟରିଂ ପ୍ରଶିକ୍ଷକ ଭାବରେ ପାଠପଢ଼ାଇବା ଆରମ୍ଭ କରିଛନ୍ତି। ତାଙ୍କ ଶ୍ରେଣୀର ଅନେକ ଛାତ୍ର ତାଙ୍କ ବୟସର ଅଛନ୍ତି।
ନାଥନ ଥମାସଙ୍କ ପୂର୍ବରୁ ବିଶ୍ୱର ସବୁଠାରୁ କମ ବୟସର ପୁରୁଷ ପ୍ରଫେସରର ରେକର୍ଡ ସ୍କଟିସ ଗଣିତଜ୍ଞ କଲିନ ମ୍ୟାକଲାରିନଙ୍କ ନାମରେ ଥିଲା। ମ୍ୟାକଲାରିନ ୧୭୧୭ ମସିହାରେ ୧୯ ବର୍ଷ ବୟସରେ ପ୍ରଫେସର ହୋଇ ରେକର୍ଡ ସ୍ଥାପନ କରିଥିଲେ। ନାଥନ ୧୮ ବର୍ଷ ଏବଂ ୩୪୬ ଦିନ ବୟସରେ ପ୍ରଫେସର ହୋଇଛନ୍ତି।
ରିପୋର୍ଟ ଅନୁସାରେ, ନାଥନ ବହୁତ କମ ବୟସରେ ତାଙ୍କର ଶିକ୍ଷାଗତ ଯାତ୍ରା ଆରମ୍ଭ କରିଥିଲେ। ଯେତେବେଳେ ସେ ମାତ୍ର ୧୦ ବର୍ଷ ବୟସର ଥିଲେ, ସେ ନିୟମିତ ସ୍କୁଲ ଶିକ୍ଷା ସହିତ ମିଆମି ଡେଡ କଲେଜରେ ଦ୍ୱୈତ ନାମଲେଖା କାର୍ଯ୍ୟକ୍ରମ ମାଧ୍ୟମରେ କଲେଜ ସ୍ତରୀୟ ଅଧ୍ୟୟନ ଆରମ୍ଭ କରିଥିଲେ।
ପରବର୍ତ୍ତୀ ସମୟରେ, ୧୪ ବର୍ଷ ବୟସରେ, ସେ ଫ୍ଲୋରିଡା ଇଣ୍ଟରନ୍ୟାସନାଲ ୟୁନିଭରସିଟିରେ ନାମ ଲେଖାଇଥିଲେ। ଏଠାରେ ସେ ବୈଦ୍ୟୁତିକ ଇଞ୍ଜିନିୟରିଂରେ ସମ୍ମାନ ସହିତ ତାଙ୍କର ସ୍ନାତକ ଏବଂ ସ୍ନାତକୋତ୍ତର ଡିଗ୍ରୀ ଉଭୟ ସମାପ୍ତ କରିଥିଲେ।
ତାଙ୍କର ଶିକ୍ଷା ସମାପ୍ତ କରିବା ପରେ ନାଥନ ମିଆମି ଡେଡ କଲେଜକୁ ଫେରି ଆସିଲେ, ଯେଉଁଠାରେ ସେ ଥରେ ଛାତ୍ର ଥିଲେ। ଅଗଷ୍ଟ ୨୦୨୩ରେ, ସେ ‘ସି ଫର୍ ଇଞ୍ଜିନିୟରସ’ ଶୀର୍ଷକ ଏକ ପାଠ୍ୟକ୍ରମ ପଢ଼ାଇବା ଆରମ୍ଭ କଲେ। ଏହି ପାଠ୍ୟକ୍ରମ ଇଞ୍ଜିନିୟରିଂ ଛାତ୍ରମାନଙ୍କୁ C ପ୍ରୋଗ୍ରାମିଂ ଏବଂ କମ୍ପ୍ୟୁଟେସନାଲ ସମସ୍ୟା ସମାଧାନ ବିଷୟରେ ନିର୍ଦ୍ଦେଶ ଦିଏ।
ନାଥନ କହିଛନ୍ତି ଯେ, ସେ ତାଙ୍କ ଶିକ୍ଷାଗତ ଯାତ୍ରା ସମୟରେ ବୟସକୁ କେବେବି ଗୁରୁତ୍ୱ ଦେଇ ନଥିଲେ। ତାଙ୍କ ମତରେ, ପ୍ରତ୍ୟେକ ଛାତ୍ର ଶିଖିବାର ଲକ୍ଷ୍ୟ ନେଇ ଶ୍ରେଣୀରେ ଯୋଗଦାନ କରନ୍ତି ଏବଂ ଏହା ହିଁ ସବୁଠାରୁ ଗୁରୁତ୍ୱପୂର୍ଣ୍ଣ।
Dharitri – Odisha’s No.1 Odia Daily
