କୁଜଙ୍ଗ,୨୩।୪(ମନୋଜ ପ୍ରଧାନ):କୁଜଙ୍ଗ ବ୍ଲକ ବାଲିଆ ପଞ୍ଚାୟତ ଅନ୍ତର୍ଗତ ବଡ଼ଙ୍ଗ ଗ୍ରାମକୁ ସଂଯୋଗ କରୁଥିବା ତତ୍କାଳୀନ ଲୁଣା ନଦୀ ଉପରେ ଥିବା ଏକ ଅଣଓସାରିଆ ପୋଲକୁ ଓସାରିଆ କରି ଭାରିଯାନ ଯାତାୟାତ କରିପାରିବା ଭଳି ନିର୍ମାଣ ଉଦ୍ଦେଶ୍ୟରେ ୨୦୨୨ରେ ଭଙ୍ଗାଯାଇଥିଲା। ଏହାପରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ନୂତନ ପୋଲ ନିର୍ମାଣ କରିବା ଲାଗି ୨କୋଟି ୪୫ ଲକ୍ଷ ଟଙ୍କାର ବ୍ୟୟ ଅଟକଳ କରାଯାଇଥିଲ। ପ୍ରସ୍ତାବ ମଞ୍ଜୁରି ନିମନ୍ତେ ସରକାରଙ୍କ ନିକଟରେ ଦାଖଲ କରାଯାଇଥିଲା। ଏହା ମଞ୍ଜୁରି ପାଇବା ପରେ ଗତ ମାର୍ଚ୍ଚ ପ୍ରଥମ ସପ୍ତାହରେ ବିଧାୟକ ଶିଳାନ୍ୟାସ କରିଥିଲେ। ଇତିମଧ୍ୟରେ ଦେଢ଼ ମାସ ଅତିକ୍ରାନ୍ତ କରିଥିଲେ ବି ପୋଲ ନିର୍ମାଣର ନା ଗନ୍ଧ ନାହିଁ।
ଏହି ରାସ୍ତା ଉପରେ ବଡ଼ଙ୍ଗ, ପରିଆଙ୍ଗ, ପାନପଲ୍ଲି, ମାଲିପୁରା ଓ ସମାଗୋଳ ଆଦି ଗ୍ରାମର ୧୦ ହଜାରରୁ ଊର୍ଦ୍ଧ୍ୱ ଜନସାଧାରଣ ନିର୍ଭରଶୀଳ। ମାତ୍ର ନୂତନ ପୋଲ ନିର୍ମାଣ ହେଉ ନ ଥିବାରୁ ସେମାନେ ଅସନ୍ତୋଷବ୍ୟକ୍ତ କରିଛନ୍ତି। ବିଳମ୍ବ ସମ୍ପର୍କରେ କୁଜଙ୍ଗ ଗ୍ରାମ୍ୟ ଉନ୍ନୟନ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ବୁଦ୍ଧନାଥ ସିଂଙ୍କୁ ପଚାରିବାରେ,୧୧ କେଭି ବିଦ୍ୟୁତ୍ ଖୁଣ୍ଟ ନିର୍ମାଣ କାର୍ଯ୍ୟରେ ବାଧକ ସାଜିଛି ବୋଲି କହିଥିଲେ। ବିଭାଗ ପକ୍ଷରୁ ପୋଲ ସିଧାରୁ ଖୁଣ୍ଟ ହଟାଇବା ପାଇଁ ବିଦ୍ୟୁତ୍ ବିଭାଗକୁ ଚିଠି କରାଯାଇଛି।
ମାତ୍ର ବିଦୁତ୍ ବିଭାଗ ପକ୍ଷରୁ ଖୁଣ୍ଟ ଘୁଞ୍ଚାଇବାକୁ ପଦକ୍ଷେପ ନିଆଯାଉ ନ ଥିବାରୁ ପୋଲ ନିର୍ମାଣ କାର୍ଯ୍ୟ ଅଟକିଛି ବୋଲି ସେ କହିଥିଲେ। ଏ ସମ୍ପର୍କରେ ବିଦ୍ୟୁତ୍ ବିଭାଗ ଯନ୍ତ୍ରୀ ଅମରେନ୍ଦ୍ର ନନ୍ଦଙ୍କ ଦୃଷ୍ଟି ଆକର୍ଷଣ କରିବାରେ ଖୁଣ୍ଟ ସ୍ଥାନାନ୍ତର ପାଇଁ ୮ ଲକ୍ଷ ଟଙ୍କା ଖର୍ଚ୍ଚ ହେବ। ଏନେଇ ବ୍ୟୟ ଅଟକଳ କରାଯାଇ ଗ୍ରାମ ଉନ୍ନୟନ ବିଭାଗକୁ ଦିଆଯିବା ସହ ଉକ୍ତ ପରିମାଣର ଅର୍ଥ ପୈଠ କରିବା ପାଇଁ କୁହାଯାଇଛି। ହେଲେ ଗ୍ରାମ ଉନ୍ନୟନ ବିଭାଗ ପକ୍ଷରୁ ଏହି ଅର୍ଥ ପୈଠ କରାଯାଇ ନଥିବାରୁ ଉକ୍ତ ଖୁଣ୍ଟ ସ୍ଥାନାନ୍ତର ହୋଇପାରୁନାହିଁ ବୋଲି କହିଥିଲେ। ଏଭଳି ଭାବେ ଉଭୟ ବିଭାଗ ପରସ୍ପରକୁ ଦୋଷାରୋପ କରୁଥିବାବେଳେ ସାଧାରଣ ଲୋକେ ହନ୍ତସନ୍ତ ହେଉଛନ୍ତି ବୋଲି ସ୍ଥାନୀୟ ଲୋକେ କହିଛନ୍ତି। ଏହି ରାସ୍ତା ଦେଇ ଚାଷୀମାନେ କୁଜଙ୍ଗ ଓ ପାରାଦୀପ ବଜାର ସମେତ ବାହାରକୁ ପରିବା ପଠାଇଥାନ୍ତି। ବହୁ ଛାତୀଛାତ୍ର ମଧ୍ୟ ଏହି ରାସ୍ତା ଦେଇ ଯାତୟାତ କରିଥାନ୍ତି। ପୋଲ ଭଙ୍ଗା ଯିବା ପରେ ସେମାନେ ଅସୁବିଧାର ସମ୍ମୁଖୀନ ହେଉଛନ୍ତି। ଯାତାୟାତ ଲାଗି କରାଯାଇଥିବା ଅସ୍ଥାୟୀ ଶୋଠ ରାସ୍ତାରେ ବର୍ଷାଦିନେ ଅଧିକ ସମସ୍ୟା ହୋଇଥାଏ। ଆଉ ଦୁଇମାସ ପରେ ବର୍ଷା ଋତୁ ଆସିବା। ଯଦି ଭୀଷଣ ବର୍ଷା ହେବ ଅସ୍ଥାୟୀ ଶୋଠ ରାସ୍ତା ଧୋଇ ଯିବାର ଆଶଙ୍କା ରହିଛି। ଏଥିପ୍ରତି ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଇ ତୁରନ୍ତ ପୋଲ ନିର୍ମାଣ କରିବାକୁ ସାମାଜିକ କର୍ମୀ ସୁଦର୍ଶନ ବାରିକ, ରାମଚନ୍ଦ୍ର ଭୋଳ, ପ୍ରମୋଦ ପରିଡ଼ା ଓ ଅଜୟ ଭୋଳ ପ୍ରମୁଖ ଦାବି କରିଛନ୍ତି।
