ତିର୍ତ୍ତୋଲ,୯ା୬(ଡି.ଏନ.ଏ.): ତିର୍ତ୍ତୋଲ ବ୍ଲକ ପୋରଗଦେଇ ପଞ୍ଚାୟତ ଯୋଗଣିଆ ଛକରେ ଗତ ନଭେମ୍ବର ମାସ ୨୮ ତାରିଖରେ ୨ଲକ୍ଷ ଟଙ୍କା ବ୍ୟୟରେ ଏକ ହାଇମାଷ୍ଟ ଲାଇଟ୍ ଲାଗିଥିଲା। ଚଳିତବର୍ଷ ଫେବୃୟାରୀ ୧୬ ତାରିଖରୁ ତାହା ଅଚଳ ହୋଇପଡିଛି। ଏହାର ମରାମତି ପାଇଁ ପଞ୍ଚାୟତ କର୍ତ୍ତୃପକ୍ଷ ବାରମ୍ବାର ଅଭିଯୋଗ କରିଥିଲେ ମଧ୍ୟ ତାହା ହୋଇପାରିନାହିଁ। ତେଣୁ ୨ଲକ୍ଷ ଟଙ୍କା ବ୍ୟୟରେ ଲାଗିଥିବା ଏହି ଲାଇଟ୍ ମାତ୍ର ୩ ମାସ ନ ଜଳିବା ଆଲୋଚନାର ବିଷୟ ହୋଇଛି।
ପ୍ରକାଶ ଯେ, ପୂର୍ବତନ ଏମ୍ପି ଡା.କୁଳମଣି ସାମଲଙ୍କ ଅନୁଦାନ ପାଣ୍ଠିରେ ଏହି ଲାଇଟ୍ ଲାଗିଥିଲା। ଏହି ହାଇମାଷ୍ଟ ଲାଇଟ୍ ଖୁଣ୍ଟର ଉପର ଷ୍ଟାଣ୍ଡରେ ୫ଟି ହାଲୋଜିନ ଗୋଲାକାର ଭାବେ ଲଗାଯାଇଛି। ତାହା ଚାରି ଦିଗକୁ ଆଲୋକିତ କରୁଥିଲା। ଅଳ୍ପଦିନ ମଧ୍ୟରେ ୩ଟି ହାଲୋଜିନ ଖରାପ ହୋଇଯାଇଥିଲା। ଫଳରେ ଛକର ଗୋଟିଏ ପାର୍ଶ୍ୱ ସମ୍ପୂର୍ଣ୍ଣ ଅନ୍ଧାର ରହୁଛି। ଏହି ଛକରେ ଏକାଧିକ ଦୋକାନ ରହିଛି। ଏଠାରେ ସପ୍ତାହକୁ ଦୁଇଦିନ ସାପ୍ତାହିକ ହାଟ ବସୁଛି। ତେଣୁ ପ୍ରତ୍ୟହ ସନ୍ଧ୍ୟାରେ ଗହଳି ହୋଇଥାଏ। ଲାଇଟ ନ ଥିବାରୁ ଲୋକେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ପଞ୍ଚାୟତ କର୍ତ୍ତୃପକ୍ଷ ଏକାଧିକଥର ବିଡିଓଙ୍କୁ ଲିଖିତ ଅଭିଯୋଗ କରିଥିଲେ ମଧ୍ୟ କିଛି ସୁଫଳ ମିଳୁନି। ବାରମ୍ବାର ବ୍ଲକକୁ ଦୌଡ଼ି ନିରାଶ ହେବା ପରେ ଜିଲାପାଳ ଓ ପିଡିଙ୍କୁ ମଧ୍ୟ ଅବଗତ କରାଗଲା। ତଥାପି ମଧ୍ୟ ଏହାର ମରାମତି ହୋଇପାରିନାହିଁ। ଫଳରେ ଯେଉଁ ଉଦ୍ଦେଶ୍ୟରେ ଲାଇଟ ଲଗାଯାଇଥିଲା ତାହା ଫଳପ୍ରଦ ହେଉନାହିଁ।
