ଅନୁଗୋଳ ଅଫିସ, ୧୯।୪- ଅନୁଗୋଳ ସହର ଉପକଣ୍ଠ ଆମ୍ବପାଳ ନତଡ଼ାଠାରେ ଗୁରୁବାର ଅପରାହ୍ନରେ ଏକ କାର୍ ଓ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଛି। ଏଥିରେ ୨ ଜଣ ଗୁରୁତର ହୋଇଥିବା ଜଣାପଡିଛି। ସେମାନଙ୍କ ପରିଚୟ ମିଳିପାରି ନାହିଁ। ଏଥିସହ କାର୍ରେ ଥିବା ଅନ୍ୟ ୩ ଜଣ ମହିଳା, ୨ ଶିଶୁ ଓ ଡ୍ରାଇଭର ଆହତ ହୋଇଥିବା ପ୍ରତ୍ୟକ୍ଷଦର୍ଶୀ କହିଛନ୍ତି। ଏ ସଂକ୍ରାନ୍ତରେ ଥାନାରେ କୌଣସି ଅଭିଯୋଗ ହୋଇ ନ ଥିବା ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ସୂଚନା ଦେଇଛନ୍ତି।
ଟଣାରୁ ଜଣାପଡିଛି, କଟକ ଆଠଗଡ ଅଞ୍ଚଳରୁ ଏକ କାର୍(ଓଡି-୩୩-ଏଲ୍-୮୨୫୧)ରେ ୩ ଜଣ ମହିଳା ୨ ଶିଶୁଙ୍କ ସହ ତାଳଚେରକୁ ମା’ ହିଙ୍ଗୁଳାଙ୍କ ଦର୍ଶନ ପାଇଁ ଆସିଥିଲେ। ସେମାନେ ଫେରିବାବେଳେ ଆମ୍ବପାଳ ନତଡ଼ା ନିକଟରେ ଅନୁଗୋଳ ପଟୁ ଯାଉଥିବା ଦ୍ରୁତଗାମୀ ବାଇକ (ନଂ. ଓଡି-୧୯-ଜେ-୯୪୮୬) କାର୍ ମୁହାଁମୁହିଁ ଧକ୍କା ହୋଇଥିଲା। ପିଟି ହେବା ପରେ ବାଇକ୍ଟି ପ୍ରାୟ ଶହେ ମିଟର ଦୂରରେ ଛିଟିକି ପଡିଥିଲା। ପରିଚୟ ମିଳି ନ ଥିଲେ ବି ସେମାନେ ଅନୁଗୋଳ କାଙ୍ଗୁଲା ଅଞ୍ଚଳର ବୋଲି ଜଣାପଡିଛି। ସ୍ଥାନୀୟ ଲୋକେ ଓ ପଥଚାରୀ ସେମାନଙ୍କ ଅନୁଗୋଳ ମେଡିକାଲ ପଠାଇଥିଲେ। ସେଠାରୁ ଜଣକୁ କଟକ ପଠାଯାଇଥିବା ବେଳେ ଅନ୍ୟଜଣେ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି। ଶୁକ୍ରବାର ଦୁର୍ଘଟଣାଗ୍ରସ୍ତ ଗାଡ଼ି ଜବତ କରାଯିବ ବୋଲି ପୋଲିସ କହିଛି।
