ପ୍ରସିଦ୍ଧ ଶୈବକ୍ଷେତ୍ର କପିଳାସ, ମହିମା ଧର୍ମର ପ୍ରମୁଖ ପୀଠ ଯୋରନ୍ଦା ଏବଂ ପ୍ରାକୃତିକ ସୌନ୍ଦର୍ଯ୍ୟର ଗନ୍ତାଘର ସପ୍ତଶଯ୍ୟା। ଢେଙ୍କାନାଳ ଜିଲା ପର୍ଯ୍ୟଟନ ମାନଚିତ୍ରରେ ସ୍ବର୍ଣ୍ଣ ତ୍ରିଭୁଜ ଭାବେ ପରିଚିତ ଏହି ଦର୍ଶନୀୟସ୍ଥାନ ସାରା ବିଶ୍ୱର ପର୍ଯ୍ୟଟକଙ୍କୁ ଆକର୍ଷିତ କରିବାର କ୍ଷମତା ରଖେ। ପର୍ଯ୍ୟଟନ ବିଭବରେ ଭରପୂର ଏହି ସ୍ଥାନକୁ ଜାତୀୟସ୍ତରୀୟ ପର୍ଯ୍ୟଟନସ୍ଥଳୀ ଭାବେ ବିକାଶ କରାଗଲେ ପର୍ଯ୍ୟାପ୍ତ ରାଜସ୍ବ ଆଦାୟର ସୁଯୋଗ ରହିଛି। ହେଲେ ସରକାରୀ ଉଦାସୀନତା ଏବଂ ହତାଦର ଯୋଗୁ ଦୀର୍ଘଦିନ ପରେ ବି ଅବହେଳିତ ଅବସ୍ଥାରେ ରହିଛି ସ୍ବର୍ଣ୍ଣ ତ୍ରିଭୁଜ। ଆଧ୍ୟାତ୍ମିକ ଦୃଷ୍ଟିକୋଣରୁ କପିଳାସ ଶୈବପୀଠର ଗୁରୁତ୍ୱ ଅନେକ। ଦୀର୍ଘଦିନ ହେଲା ଏହାର ଉନ୍ନୟନମୂଳକ କାର୍ଯ୍ୟ ପ୍ରତ୍ନତତ୍ତ୍ୱ ବିଭାଗ ତତ୍ତ୍ୱାବଧାନରେ ଚାଲିଛି। ତେବେ ଆଇନଗତ କଟକଣା ଯୋଗୁ ଏଠାରେ ଜିଲା ପ୍ରଶାସନ ଟଙ୍କାଟିଏ ମଧ୍ୟ ଖର୍ଚ୍ଚ କରିପାରୁନାହିଁ। ଜାଗରଯାତ୍ରା ସମୟରେ ଲକ୍ଷାଧିକ ଶ୍ରଦ୍ଧାଳୁଙ୍କ ସମାଗମ ଦୃଷ୍ଟିରୁ କାଁ ଭଁା କାମ ହେଉଛି। ତାହା ବି କେବଳ ମୁଖଶାଳା ଆଖପାଖ ଅଞ୍ଚଳରେ ସୀମିତ। ଯଦିଓ ପ୍ରତ୍ନତତ୍ତ୍ୱ ବିଭାଗ ହାତରେ ପୀଠର ପାରିପାର୍ଶ୍ୱିକ ଉନ୍ନୟନ କାର୍ଯ୍ୟ ନ୍ୟସ୍ତ କରାଯାଇଛି, ହେଲେ ଏହା ବି ଠିକ୍ ଭାବେ ହେଉ ନ ଥିବା ଅଭିଯୋଗ ହେଉଛି। ଅନୁରୂପ ସମସ୍ୟାରେ ଛନ୍ଦି ହୋଇଛି ବିଶ୍ୱ ପ୍ରସିଦ୍ଧ ମହିମାଧର୍ମ ପୀଠ ଯୋରନ୍ଦା। ଏଠାରେ ପାନୀୟ ଜଳ ଯୋଗାଣ, ଆଲୋକୀକରଣ, ରାସ୍ତାଘାଟ, ଯାତ୍ରୀ ବିଶ୍ରାମାଗାର ଭଳି ମୌଳିକ ଆବଶ୍ୟକତା ପୂରଣ ହୋଇପାରୁନାହିଁ। କହିବାକୁ ଗଲେ ଯୋରନ୍ଦାର ଉନ୍ନତି କେବଳ ପ୍ରତିଶ୍ରୁତିରେ ସୀମିତ ରହିଛି। ସେହିପରି ସବୁଜିମାରେ ଭରପୂର ସପ୍ତଶଯ୍ୟା ମଧ୍ୟ ଅବହେଳାର ଶିକାର ହୋଇ ରହିଛି। ଏଠାରେ ପଞ୍ଚାୟତ ପ୍ରଶାସନ ପକ୍ଷରୁ ଯାହା କିଛି ଉନ୍ନୟନମୂଳକ କାର୍ଯ୍ୟ ଚାଲିଛି। ଏହାର ବିକାଶ ଲାଗି ପର୍ଯ୍ୟଟନ ବିଭାଗ ପକ୍ଷରୁ ବିଧିବଦ୍ଧ ଭାବେ ରୋଡ୍ ମ୍ୟାପ୍ ପ୍ରସ୍ତୁତ ହେଉନାହିଁ। ଫଳରେ ଏଠାକୁ ଆସୁଥିବା ପର୍ଯ୍ୟଟକମାନେ ଅନେକ ସମୟରେ ତିକ୍ତ ଅନୁଭୂତି ନେଇ ଫେରୁଛନ୍ତି। ନିକଟରେ ଓଡ଼ିଶାର ମନ୍ଦିର ଏବଂ ପର୍ଯ୍ୟଟନ କ୍ଷେତ୍ରଗୁଡ଼ିକର ସୌନ୍ଦର୍ଯ୍ୟକରଣ ଲାଗି ରାଜ୍ୟ ସରକାରଙ୍କ ପକ୍ଷରୁ ସ୍ବତନ୍ତ୍ର ଯୋଜନା ପ୍ରସ୍ତୁତ କରାଯାଇଛି। ହେଲେ କପିଳାସ, ସପ୍ତଶଯ୍ୟା ଏବଂ ଯୋରନ୍ଦା ପ୍ରତି ସତେ ଯେମିତି ଆଖି ବୁଜିଦେଇଛନ୍ତି ସରକାର। ଉଭୟ କେନ୍ଦ୍ର ଏବଂ ରାଜ୍ୟ ସରକାର ଆଗେଇ ଆସିଲେ ସ୍ବର୍ଣ୍ଣ ତ୍ରିଭୁଜ ବିକାଶ ଦେଖିବ ବୋଲି ସାଧାରଣରେ ମତପ୍ରକାଶ ପାଇଛି।
