ବନ୍ତଳା, ୧୫ା୯(ଡି.ଏନ.ଏ.) – ଅନୁଗୋଳ ଜିଲା ଶିକ୍ଷା ଅଧିକାରୀ (ଡିଇଓ) ସଚ୍ଚିଦାନନ୍ଦ ବେହେରା ଶନିବାର ବନ୍ତଳା ଅଞ୍ଚଳର ବିଭିନ୍ନ ସ୍କୁଲକୁ ଅଚାନକ ପରିଦର୍ଶନରେ ଆସିଥିଲେ। ବିଦ୍ୟାଳୟଗୁଡିକୁ ଯାଇ ଛାତ୍ରୀଛାତ୍ରଙ୍କୁ ପାଠ ପଚାରିବା ସହ ଶିକ୍ଷୟିତ୍ରୀ ଶିକ୍ଷକଙ୍କୁ ବିଭିନ୍ନ ପ୍ରଶ୍ନ କରିଥିଲେ। ହେଲେ କେତେକ ପ୍ରଶ୍ନର ଉତ୍ତର ନ ପାଇ ଶିକ୍ଷା ଅଧିକାରୀ ଅସନ୍ତୋଷ ପ୍ରକାଶ କରିଥିଲେ।
ପ୍ରଥମେ ଡିଇଓ ନନ୍ଦପୁର ୟୁପି ସ୍କୁଲ, ପରେ କଳିଙ୍ଗ ହାଇସ୍କୁଲ, ନନ୍ଦପୁର ଓ କରତପଟା ପ୍ରାଥମିକ ବିଦ୍ୟାଳୟକୁ ଯାଇଥିଲେ। ସେଠାରେ ଛାତ୍ରୀଛାତ୍ରଙ୍କୁ ବିଭିନ୍ନ ପ୍ରଶ୍ନ କରିଥିଲେ। ହେଲେ ଅଧିକାଂଶ ପିଲା ଏବିସିଡି ମଧ୍ୟ କହି ପାରୁ ନ ଥିବା ସହ ଅନେକେ ବହି ପଢିପାରି ନ ଥିଲେ। ଶିକ୍ଷକ କଳାପଟାରେ ଲେଖୁଥିବା ପାଠ ଅନେକେ ବୁଝି ପାରୁ ନ ଥିବା ଡିଇଓ ଦେଖିବାକୁ ପାଇଥିଲେ। ଅନ୍ୟପକ୍ଷରେ ସ୍କୁଲରେ କେତେ ଛାତ୍ରୀଛାତ୍ର ଉପସ୍ଥିତ ରହୁଛନ୍ତି ସେ ବିଷୟରେ ଶିକ୍ଷୟିତ୍ରୀ ଶିକ୍ଷକମାନେ ନ କହିପାରିବାରୁ ଡିଇଓ ଖପ୍ପା ହୋଇଥିଲେ। ସେହିପରି ପାଇଖାନା, ନିଆଁ ଲିଭା ଯନ୍ତ୍ର, ଲେଶନ ପ୍ଲାନ, ଫ୍ୟାନ, ଲାଇଟ ଆଦି ବୁଲି ଦେଖିଥିଲେ। ପୋକତୁଙ୍ଗା ପ୍ରାଥମିକ ବିଦ୍ୟାଳୟରେ ମଧ୍ୟାହ୍ନଭୋଜନ ଖାଇ ଏହାର ମାନ ପରୀକ୍ଷା କରିଥିଲେ। ସେଠାରୁ ପୋକତୁଙ୍ଗା ସରକାରୀ ହାଇସ୍କୁଲ ଓ ପାଟଣାସାହି ପ୍ରାଥମିକ ବିଦ୍ୟାଳୟକୁ ଯାଇଥିଲେ। ଏଥିସହ ଶିକ୍ଷାଦାନର ମାନ ବଢାଇ ଠିକ୍ ଭାବେ ପାଠ ପଢାଇବାକୁ ଶିକ୍ଷା ଅଧିକାରୀ ବେହେରା ଶିକ୍ଷୟିତ୍ରୀ ଶିକ୍ଷକମାନଙ୍କୁ ତାଗିଦ୍ କରିଥିଲେ। ଜିଲା ବିଜ୍ଞାନ ପର୍ଯ୍ୟବେକ୍ଷକ କେଦାର ବେହେରା ଉପସ୍ଥିତ ଥିଲେ।
