ସମାନୁପାତିକ ଭାବରେ ସେ ଥିଲେ ଜଣେ ଲେଖକ ଏବଂ ଜଣେ ମ୍ୟୁଜିକ୍ କମ୍ପୋଜର। ସେ ସାହିତ୍ୟ ସୃଷ୍ଟିକରି ଯେତିକି ଶୀର୍ଷକୁ ଯାଇଥିଲେ; ସଂଗୀତ ମଧ୍ୟ ତାଙ୍କ ପାଇଁ ସେତିକି ଖ୍ୟାତି ଆଣିଦେଇଥିଲା। ସେ ହେଉଛନ୍ତି ପ୍ରସିଦ୍ଧ ବ୍ରିଟିଶ୍ ଲେଖକ ଆନ୍ଥୋନୀ ବର୍ଗେସ। ଗଳ୍ପ, ଉପନ୍ୟାସ, କମେଡି, ସମାଲୋଚନା, ନାଟକ, ଚିତ୍ରନାଟ୍ୟ, ବ୍ୟଙ୍ଗ ତଥା ଜୀବନୀ ରଚନା କରି ସେ ନିଜକୁ ବିଶ୍ୱର ଜଣେ ସୁଖ୍ୟାତ ଲେଖକର ତାଲିକାରେ ସ୍ଥାନିତ କରିପାରିଥିଲେ। ତାଙ୍କର ଅନେକ ଉପନ୍ୟାସ ଫିଲ୍ମକୁ ରୂପାନ୍ତରିତ ହୋଇଥିଲା। ତେବେ ମଜାର କଥା ଯେ, ସାରା ଜୀବନ ବିବାଦ ତାଙ୍କ ପିଛା ଛାଡ଼ି ନ ଥିଲା। କାରଣ ସେ ଏଭଳି ଢଙ୍ଗରେ ସତ୍ୟର ପ୍ରକାଶ କରୁଥିଲେ ଯେ, ଯାହା ତାଙ୍କୁ ମନକୁ ମନ ବିବାଦ ଭିିତରକୁ ଟାଣିନଉଥିଲା। ଆଉ ସେହି ବିବାଦ ହିଁ ତାଙ୍କ ସଫଳତାର କଞ୍ଚାମାଲ ବୋଲି ସେ ବାରମ୍ବାର ମତବ୍ୟକ୍ତ କରୁଥିଲେ। ‘କ୍ଲକ୍ଓ୍ବର୍କ ଅରେଞ୍ଜ୍’କୁ ତାଙ୍କର ସର୍ବୋତ୍ତମ କୃତି ବୋଲି ବିବେଚନା କରା ଯାଇଥାଏ। ଆନ୍ଥୋନୀ ୨୫୦ରୁ ଅଧିକ ମ୍ୟୁଜିକ୍ କମ୍ପୋଜ୍ କରିଛନ୍ତି। ସବୁଥିରେ ତାଙ୍କର ଭିନ୍ନଶୈଳୀର ସୃଜନଶୀଳତା ଭରି ହୋଇ ରହିଥିବାର ପରିଲକ୍ଷିତ କରିହୁଏ।
ଗ୍ରେଟ୍ ଡିପ୍ରେସନ୍ : ୧୯୧୭, ଫେବୃୟାରୀ ୨୫ ତାରିଖରେ ଇଂଲଣ୍ଡର ମାଞ୍ଚେଷ୍ଟରଠାରେ ଆନ୍ଥୋନୀଙ୍କର ଜନ୍ମ। ବାପା ଜୋସେଫ୍ ଥିଲେ ଜଣେ ବ୍ୟବସାୟୀ। ବିଶେଷକରି ତାଙ୍କର ଲିକର ବ୍ୟବସାୟ ଥିଲା। ତାଙ୍କ ପିଲାବେଳେ ବିଶ୍ୱରେ ଗ୍ରେଟ୍ ଡିପ୍ରେସନ୍ ବା ଗଭୀର ମାନ୍ଦାବସ୍ଥା ସୃଷ୍ଟି ହୋଇଥିଲା। ଏହା ବିଶ୍ୱକୁ ବହୁଭାବରେ ବ୍ୟତିବ୍ୟସ୍ତ କରିପକେଇଥିଲା। ଲୋକମାନଙ୍କର ଆର୍ଥିକ ମାନଦଣ୍ଡ ଭୁଶୁଡ଼ି ପଡ଼ିଥିଲା। ଅବଶ୍ୟ ଏଥିରେ ଆନ୍ଥୋନୀଙ୍କ ପରିବାରର କୌଣସି କ୍ଷତି ହୋଇ ନ ଥିଲା। ଲିକର ବ୍ୟବସାୟରେ ମାନ୍ଦାବସ୍ଥା କୌଣସି କ୍ଷତି ପହଞ୍ଚାଇ ପାରି ନ ଥିଲା। ସେହିଭଳି ସେମାନଙ୍କର ହୋଲ୍ସେଲ୍ ଗ୍ରୋସରି ବ୍ୟବସାୟ ରହିଥିଲା। ଯେହେତୁ ଏ ସବୁ ଉପରେ ଲୋକଙ୍କ ଦୈନନ୍ଦିନ ଜୀବନ ନିର୍ଭର କରୁଥିଲା ତେଣୁ ସେସବୁର ଚାହିଦା କମି ନ ଥିଲା। ବ୍ୟବସାୟର ଗତି ମନ୍ଥର ହୋଇଯାଇଥିଲେ ମଧ୍ୟ ତାହା ଜାରି ରହିଥିଲା। ତେଣୁ ଗ୍ରେଟ୍ ଡିପ୍ରେସନ୍ ସତ୍ତ୍ୱେ ଆନ୍ଥୋନୀଙ୍କ ପରିବାର ଭଲ ଭାବରେ ଚଳିଯାଇଥିଲେ।
ମହାମାରୀ କବଳିତ ପିଲାବେଳ : ଆନ୍ଥୋନୀଙ୍କ ପିଲାବେଳର ନାମ ଥିଲା ଜାକ୍। ତାଙ୍କୁ କେହିକେହି ଲିଟିଲ୍ ଜାକ୍ ବୋଲି ମଧ୍ୟ ଡାକୁଥିଲେ। ସ୍କୁଲରେ ନାମ ଲେଖାଇବା ପାଇଁ ତାଙ୍କର ନାମ ଆନ୍ଥୋନୀ ରଖାଯାଇଥିଲା। ବର୍ଗେସ୍ ହେଉଛି ତାଙ୍କର ଛଦ୍ମନାମ। ସେ ଏହି ନାମକୁ ୧୯୫୬ ମସିହାରେ ବ୍ୟବହାର କରିଥିଲେ। ଏହି ମସିହାରେ ପ୍ରକାଶ ପାଇଲା ତାଙ୍କ ଉପନ୍ୟାସ ‘ଟାଇମ୍ ଫର ଏ ଟାଇଗର’। ଏହି ଉପନ୍ୟାସରେ ସେ ନିଜ ନାମ ଆନ୍ଥୋନୀ ବର୍ଗେସ ବୋଲି ଉଲ୍ଲେଖ କରିଥିଲେ। ପିଲାବେଳେ ନିମୋନିଆ ଏକପ୍ରକାର ଆତଙ୍କ ଖେଳେଇ ଦେଇଥିଲା। ଆଗ ତାଙ୍କ ମାଆ ଏଲିଜାବେଥ ମରିଗଲେ। ପରେ ପରେ ତାଙ୍କର ଭଉଣୀ ମରିଗଲା। ଘରେ ସମସ୍ତେ ଭାବି ନେଇଥିଲେ ଯେ, ଏହା ପରେ ହେଉଛି ଆନ୍ଥୋନୀଙ୍କ ପାଳି। ଏହାର କାରଣ ହେଉଛି ମୂଳରୁ ଆନ୍ଥୋନୀ ରୋଗିଣା ଓ ଦୁର୍ବଳ ଥିଲେ। ସେଥିଲାଗି ତାଙ୍କୁ ଆଉ ଗୋଟିଏ ବି ଦିନ ଘରେ ନ ରଖି ମାମୁଘରକୁ ପଠେଇ ଦିଆଗଲା। ସେବେଠାରୁ ସେ ମାମୁଘରେ ରହିଲେ। କୁହାଯାଏ, ସେ ମାମୁଘରେ ରହିଲେ ବୋଲି ମହାମାରୀରୁ ବର୍ତ୍ତିଗଲେ।
ମ୍ୟୁଜିକ୍ : ବିଶ୍ୱର ଜଣେ ପ୍ରସିଦ୍ଧ କମ୍ପୋଜର ଭାବେ ସୁନାମ ଅର୍ଜନ କରିଥିବା ଆନ୍ଥୋନୀଙ୍କର ପିଲାବେଳେ ଆଦୌ ମ୍ୟୁଜିକ୍ ପ୍ରତି ରୁଚି ନ ଥିଲା। ନା ସେ ଗୀତ ଶୁଣୁଥିଲେ ନା ମ୍ୟୁଜିକ୍ ଶୁଣିବାରେ ଆଗ୍ରହ ରଖୁଥିଲେ। ଓଲଟି ଗୀତକଥା ଶୁଣିଲେ ସେ ବାହାରକୁ ଚାଲିଯାଉଥିଲେ। ମାତ୍ର ଦିନେ ଗୋଟିଏ ଓଲଟା କଥା ଘଟିଲା। ରେଡିଓରେ ଏକକ ବଂଶୀବାଦନର ଏକ କାର୍ଯ୍ୟକ୍ରମ ପ୍ରସାରିତ ହେଲା। ସେତେବେଳେ ବାଳକ ଆନ୍ଥୋନୀଙ୍କ ଦେହ ଅସୁସ୍ଥ ଥିଲା ଆଉ ସେ ବିଛଣାରେ ପଡ଼ିରହୁଥିଲେ। ସେତିକିବେଳେ ବଂଶୀବାଦନ କାର୍ଯ୍ୟକ୍ରମଟି ପ୍ରସାରିତ ହେଲା। ଆଉ ଇଚ୍ଛା ନ ଥାଇ ବି ସେ ତାହାକୁ ଶୁଣିଣେ। ସତେଯେମିତି ମିରାକ୍ଲ ଘଟିଗଲା। ଆନ୍ଥୋନୀ ମ୍ୟୁଜିକ୍ର ପ୍ରେମରେ ପଡ଼ିଗଲେ। ଭଲ ହେବା ପରେ କହିଲେ, ମୁଁ ମ୍ୟୁଜିକ୍ ଶିଖିବି। ତେବେ ତାଙ୍କୁ ମ୍ୟୁଜିକ୍ ଶିଖାଇବା ଲାଗି ତାଙ୍କ ପରିବାର ଲୋକମାନେ ଆଦୌ ରାଜି ନ ଥିଲେ। କାରଣ ସେତେବେଳେ ମ୍ୟୁଜିକ୍ରୁ କିଛି ରୋଜଗାର ହେଉ ନ ଥିଲା। ତଥାପି ପଛକୁ ଫେରି ନ ଥିଲେ ଆନ୍ଥୋନୀ। ସେ ବଡ଼ହୋଇ ପିଆନୋ ଶିଖିବା ଆରମ୍ଭ କରିଦେଲେ।
ସାହିତ୍ୟ : ମ୍ୟୁଜିକ୍ ସହିତ ସାହିତ୍ୟକୁ ସେ ସମାନ୍ତରାଳ ଭାବେ ଆଗକୁ ନେଉଥିଲେ। ତାଙ୍କର ପ୍ରଥମ ବଡ଼ ପୁସ୍ତକ ପ୍ରକାଶନ ହେଉଛି ‘ଦି ଲଙ୍ଗ୍ ଡେ’ ଟ୍ରାୟୋଲୋଜି। ଏଥିରେ ଥିଲା ଟାଇମ୍ ଫର ଏ ଟାଇଗର, ଦି ଏନିମି ଇନ୍ ଦ ବ୍ଲାଙ୍କେଟ୍ ଏବଂ ବେଡ୍ସ ଇନ୍ ଦ ଇଷ୍ଟ। ପରେ ପରେ ସେ ଏଥିରେ ଡେଭିଲ୍ ଅଫ୍ ଏ ଷ୍ଟେଟ୍ ପୁସ୍ତକକୁ ମଧ୍ୟ ଯୋଗକରିଥିଲେ। ଏହା ପରେ ପରେ ଆସିଥିଲା ତାଙ୍କର ସବୁଠୁ ଅଧିକ ବିବାଦୀୟ ପୁସ୍ତକ ‘ଏ କ୍ଲକ୍ଓ୍ବର୍କ ଅରେଞ୍ଜ୍’। ଏହି ପୁସ୍ତକଟି ମଧ୍ୟ ଚଳଚ୍ଚିତ୍ରକୁ ରୂପାନ୍ତରିତ ହେଲା। ଆଉ ତାଙ୍କୁ ରାତାରାତ୍ ପ୍ରସିଦ୍ଧ କରିଦେଲା।
୧୯୯୩ ମସିହା ନଭେମ୍ବର ୨୨ ତାରିଖରେ ଏହି ପ୍ରତିଭାଧର ବ୍ୟକ୍ତିତ୍ୱଙ୍କର ଜୀବନାବସାନ ଘଟିଥିଲା।
