ବରଗଡ଼ ଅଫିସ୍,୧୭।୬: ବରଗଡ଼ ଜିଲାରେ ଖରିଫ ଧାନ ସଂଗ୍ରହ ପ୍ରକ୍ରିୟକୁ ଆଉ ସପ୍ତାହକ ପରେ ଦେଢ଼ମାସ ବିତିବ । ଏହି ପ୍ରକ୍ରିୟାରେ ଜିଲାରେ ଖୋଲା ଯାଇଥିବା ମଣ୍ଡି ତଥା ଧାନକ୍ରୟ କେନ୍ଦ୍ର ଗୁଡ଼ିକରେ ଉଭୟ ଧାନ ସଂଗ୍ରହ ଓ ଉଠାଣ ଚାଲିଛି । ମାତ୍ର ପଦ୍ମପୁର ନିୟନ୍ତ୍ରିତ ବଜାର କମିଟି(ଆରଏମସି) ଅଧୀନ ମଣ୍ଡିଗୁଡ଼ିକରେ ଧାନ ସଂଗ୍ରହ ପ୍ରକ୍ରିୟା ସ୍ବାଭାବିକ ହୋଇପାରିନାହିଁ । ସେହିପରି ବରଗଡ଼ ଓ ଅତାବିରା ଆରଏମସି ଅଧୀନ କେତେକ ମଣ୍ଡିରେ ଧାନ ଉଠାଣ ମନ୍ଥର ଗତିରେ ଚାଲୁଥିବା ଅଭିଯୋଗ ହୋଇଛି । ଏଭଳି ସ୍ଥିତିରେ ଜିଲାରେ ଚାଷୀ ଅସନ୍ତୋଷ ବଢ଼ିବାରେ ଲାଗିଛି । ଅପରପକ୍ଷେ ଧାନ ସଂଗ୍ରହ ପ୍ରକ୍ରିୟାରେ ଗତ ଏପ୍ରିଲ ୩୦ତାରିଖରେ ଜିଲାପାଳ ଅଫିସ ସମ୍ମିଳନୀ କକ୍ଷରେ ଅନୁଷ୍ଠିତ ଧାନ ସଂଗ୍ରହ କମିଟି ନିଷ୍ପତ୍ତି ଉପରେ କିଛି ପରିବର୍ତ୍ତନ କରାଯାଇଛି । ଶୁକ୍ରବାରଠାରୁ ଜିଲାର କେତେକ ଧାନକ୍ରୟ କେନ୍ଦ୍ର(ପିପିସି)କୁ ନିକଟସ୍ଥ ମାର୍କେଟ ୟାର୍ଡ଼(ଏମଓ୍ାଇ)କୁ ସ୍ଥାନାନ୍ତର କରାଯାଇଛି । ଧାନ କିଣାବିକା ପ୍ରକ୍ରିୟାରେ ଉତ୍ତମ ପରିଚାଳନା ପାଇଁ ସେଭଳି କରାଯାଇଥିବା କୁହାଯାଉଛି । ମାତ୍ର ଏହାଦ୍ୱାରା ଚାଷୀମାନଙ୍କୁ ହିଁ ହଟହଟା ହେବାକୁ ପଡ଼ିବ ବୋଲି ଚାଷୀମାନେ ମତବ୍ୟକ୍ତ କରିଛନ୍ତି।
ଜିଲାପାଳଙ୍କ କାର୍ଯ୍ୟାଳୟ (ଯୋଗାଣ ବିଭାଗ)ର ପତ୍ରସଂଖ୍ୟା:-୪୦୨୧ ତା:-୧୨।୬।୧୯ କ୍ରମେ ଅତାବିରା ଆରଏମ୍ସି ଅଧୀନ ଅତାବିରା ପ୍ୟାକ୍ସ ଅନ୍ତର୍ଗତ ଲସ୍ତଲା, ମନାପଡ଼ା, ସିଂହପାଲି ଓ ଟୋପ ଧାନ କ୍ରୟକେନ୍ଦ୍ର (ପିପିସି)କୁ ଅତାବିରା ମାର୍କେଟ ୟାର୍ଡ଼କୁ ସ୍ଥାନାନ୍ତର କରାଯାଇଛି । ସେହିପରି ଭେଡ଼େନ ପ୍ୟାକ୍ସ ଅନ୍ତର୍ଗତ ପ୍ରଧାନପାଲି ଧାନକ୍ରୟ କେନ୍ଦ୍ରକୁ ରେଶମ ଓ ସାଲେପାଲି ଧାନକ୍ରୟ କେନ୍ଦ୍ରକୁ ଭେଡ଼େନ ମାର୍କେଟ୍ୟାର୍ଡ଼କୁ ସ୍ଥାନାନ୍ତର ହୋଇଛି । ଝିଲିମିଣ୍ଡା ପ୍ୟାକ୍ସ ଅଧୀନ ଜହ୍ନାପଡ଼ା ଓ ଝିଲିମିଣ୍ଡା ଧାନକ୍ରୟ କେନ୍ଦ୍ରକୁ ପତ୍ରାପାଲି, ଲହଣ୍ଡା ପ୍ୟାକ୍ସ ଅଧୀନ ଲହଣ୍ଡା ଧାନକ୍ରୟ କେନ୍ଦ୍ରକୁ ଗୋଡ଼ଭଗା, ଲରମ୍ଭା ପ୍ୟାକ୍ସ ଅଧୀନ ତାଲପଦରଟିକ୍ରା ଧାନକ୍ରୟ କେନ୍ଦ୍ରକୁ ଗୋଡ଼ଭଗା, ପାହାଡ଼ଶ୍ରୀଗିଡ଼ା ପ୍ୟାକ୍ସ ଅଧୀନ ଟାଙ୍ଗରପାଲି ଧାନକ୍ରୟ କେନ୍ଦ୍ରକୁ ଖରମୁଣ୍ଡା, ରେମୁଣ୍ଡା ପ୍ୟାକ୍ସ ଅଧୀନ ରେମୁଣ୍ଡାକୁ ଝରାପାଲି, ସିଆଲଖଣ୍ଡହଥା ପ୍ୟାକ୍ସ ଅଧୀନ ବରପଦର, ସୁନାଲରମ୍ଭାକୁ ଭେଡ଼େନ, ସଂକ୍ରୀଡ଼ା ପ୍ୟାକ୍ସ ଅଧୀନ ଚିଚିଣ୍ଡାକୁ ପପଙ୍ଗା ଏବଂ ସଂକ୍ରୀଡ଼ା ପ୍ୟାକ୍ସ ଅଧୀନ ଅର୍ଜୁଣ୍ଡା ଧାନକ୍ରୟ କେନ୍ଦ୍ରକୁ ଝରାପାଲି ମାର୍କେଟୟାର୍ଡ଼କୁ ସ୍ଥାନାନ୍ତର କରାଯାଇଛି ।
ସେହିପରି ବରଗଡ଼ ଆରଏମସି ଅଧୀନ ଅଡ଼ଗାଁ ପ୍ୟାକ୍ସ ଅନ୍ତର୍ଗତ ଗାଇସିମା, ଖଣ୍ଡହଥାକୁ ଅଡ଼ଗାଁ, ତାଲଶ୍ରୀଗିଡ଼ାକୁ କଲାପାଣି, ଚଢ଼େଇଗାଁ ପ୍ୟାକ୍ସ ଅଧୀନ ଜଡ଼ା ଓ କମଗାଁକୁ ଭଟଲି ମାର୍କେଟୟାର୍ଡ଼କୁ ସ୍ଥାନାନ୍ତର କରାଯାଇଛି । ଗୋବିନ୍ଦପୁର ପ୍ୟାକ୍ସ ଅଧୀନ ଚକରକେନ୍ଦ ଓ ଗୋବିନ୍ଦପୁର ଧାନକ୍ରୟ କେନ୍ଦ୍ରକୁ ଗୁଡ଼େଶିରା, ବରଗଡ଼ କଟାପାଲି ପ୍ୟାକ୍ସ ଅଧୀନ ବରଗାଁ, ନୁନିଆଁ ଜାମପାଲି ଓ ବନ୍ଦାକୁ ବରଗଡ଼, ସରସରା ପ୍ୟାକ୍ସ ଅଧୀନ ଖୁଣ୍ଟପାଲି ଓ ଲାଉନସରାକୁ ବେହେରା ଏବଂ ତୋରା ପ୍ୟାକ୍ସ ଅଧୀନ ଜମୁର୍ଡ଼ାକୁ ବରଗଡ଼ ମାର୍କେଟୟାର୍ଡ଼କୁ ସ୍ଥାନାନ୍ତର କରାଯାଇଛି ।
ଜିଲାର ବରଗଡ଼, ଅତାବିରା ଓ ପଦ୍ମପୁର ଆରଏମସି ଅଧୀନ ସମସ୍ତ ଧାନକ୍ରୟ କେନ୍ଦ୍ର ଖୋଲା ରହିବ । ମାତ୍ର ପୂର୍ବଭଳି ସବୁଦିନ ସେହି ଧାନକ୍ରୟ କେନ୍ଦ୍ର ଗୁଡ଼ିକରେ ଧାନ ସଂଗ୍ରହ କିମ୍ବା ଉଠାଣ ଚାଲିବ ନାହିଁ । ସପ୍ତାହର ପ୍ରଥମ ତିନିଦିନ ସେହି ମଣ୍ଡି ତଥା ଧାନକ୍ରୟ କେନ୍ଦ୍ର ଗୁଡ଼ିକରେ ଧାନ ସଂଗ୍ରହ କରାଯିବ ଏବଂ ଚତୁର୍ଥ ଦିବସରେ ସମ୍ପୃକ୍ତ ବ୍ଲକ ଯୋଗାଣ ନିରୀକ୍ଷକ ତାହା ଯାଞ୍ଚ କରି ସାରିବା ପରେ ଯାଇ ସେହି ଧାନ କିଣାଯାଇ ଉଠାଯିବ ବୋଲି ନିଷ୍ପତ୍ତି ହୋଇଛି । ଏହି ନିଷ୍ପତ୍ତି ପରେ ଧାନ କିଣାବିକାରେ ସୁଧାର ଆସିବ ନା ଚାଷୀଙ୍କୁ ଆହୁରି ହଇରାଣ ହରକତର ସମ୍ମୁଖୀନ ହେବାକୁ ପଡ଼ିବ, ତାହା ସମୟ କହିବ ।
