ଲକ୍ଡାଉନ କଟକଣା ଧୀରେ ଧୀରେ କୋହଳ ହେଉଥିବା ବେଳେ ଜୀବନଯାତ୍ରା ସ୍ବାଭାବିକ ହେଉଛି। ବିଭିନ୍ନ ବର୍ଗରେ ଶୋ’ରୁମ୍ ଏବେ ଖୋଲିବା ଆରମ୍ଭ ହୋଇଛି। ଶୋ’ରୁମ୍ଗୁଡ଼ିକରେ ସରକାରଙ୍କ ଧାର୍ଯ୍ୟ ନିୟମାବଳୀ ମୁତାବକ ସାମାଜିକ ଦୂରତ୍ୱ ସହ ଅନ୍ୟ ବ୍ୟବସ୍ଥା କରାଯାଇଛି। ଦୀର୍ଘଦିନ ଧରି କାରବାର ବନ୍ଦ ରହିଥିବା ବେଳେ ବ୍ୟବସାୟ କ୍ଷତି ସହିବାକୁ ପଡୁଛି। ଲୋକଙ୍କୁ ପ୍ରତ୍ୟକ୍ଷ ନିଯୁକ୍ତି କ୍ଷେତ୍ରରେ ଏହି ସଂସ୍ଥାଗୁଡିକ ଯୋଗଦାନ ରଖୁଛନ୍ତି ହେଲେ କାରବାର ବନ୍ଦ ରହିଲେ ମଧ୍ୟ ପରିଚାଳନା ଖର୍ଚ୍ଚର ବୋଝ ଉଠାଇବାକୁ ପଡୁଛି। ବ୍ୟାଙ୍କ ଋଣ ଉପରେ ସୁଧ, ଘରଭଡ଼ା ସହ ଅନ୍ୟ ଖର୍ଚ୍ଚର ଚାପ ବ୍ୟବସାୟୀଙ୍କ ଉପରେ ରହିଛି। ସରକାର ଏ ଦିଗରେ ସହାୟତା ଯୋଗାଇ ଦିଅନ୍ତୁ ବୋଲି ବ୍ୟବସାୟ ଅଂଶୀଦାରମାନେ ନିବେଦନ କରିଛନ୍ତି। କୋଭିଡ୍-୧୯ ଯୋଗୁ ବଜାର ସ୍ଥିତି ନେଇ ପ୍ରମୁଖ କ୍ଷେତ୍ରଗୁଡିକ ସହ ଜଡିତ ବ୍ୟକ୍ତିବିଶେଷ ବାଣିଜ୍ୟକୁ ନେଇ ଦେଇଥିବା ପ୍ରତିକ୍ରିୟା….
ଶୋ’ରୁମ୍ ଖୋଲାଯାଇଥିଲେ ମଧ୍ୟ ବିକ୍ରି ଠପ୍ ରହିଛି। ଏବେ ଲୋକଙ୍କ ନିକଟରେ ଲିକ୍ୟୁଡିଟି ସମସ୍ୟା ରହିଛି। ନିରାପତ୍ତା ପ୍ରମୁଖ ପ୍ରସଙ୍ଗ ରହିବା ଯୋଗୁ କ୍ରୟ ପାଇଁ ଲୋକଙ୍କର ଇଚ୍ଛା ନାହିଁ। ଆଗାମୀ ୩ ମାସ ଯାଏ ବଜାର ସମ୍ପର୍କରେ କିଛି କହିହେବ ନାହିଁ। ଆମର ୨ଟି ଶୋ’ରୁମ୍ ଏବେ ପରିଚାଳନା ହେଉଛି। ଗ୍ରାହକ ଜରୁରିକାଳୀନ ସେବା ଲାଗି ଓ୍ବାର୍କଶପକୁ ଆସୁଛନ୍ତି। ଶୋ’ରୁମ୍ କାର୍ଯ୍ୟ କରୁଥିବା ଶ୍ରମ ଶକ୍ତି ଏବେ ଘରେ ରହିଥିବାରୁ ଶୋ’ରୁମ୍ରେ କାମ ବାଧାପ୍ରାପ୍ତ ହେଉଛି। ହେଲେ ଲୋକଙ୍କୁ ଜରୁରୀ ସେବା ଯୋଗାଇବା ଲାଗି କଷ୍ଟରେ ଟେକ୍ନିସିଆନ ଯୋଗାଡ଼ କରିବାକୁ ପଡୁଛି। ଲୋକମାନେ ଭୟଭୀତ ହୋଇ ରହିଛନ୍ତି। କଟକଣା କୋହଳ ହେଉଥିଲେ ମଧ୍ୟ ବଜାରକୁ ନେଇ କିଛି କହି ହେଉନାହିଁ। ବଜାରରେ ଫ୍ଲୋ ନାହିଁ। ବଜାର ଫ୍ଲାଟ୍ ରହିଛି। ଗାଡ଼ି ନିର୍ମାତାମାନେ ଗୁରୁବାର ୟୁନିଟ୍ ଖୋଲିଛନ୍ତି। ବଜାର ସ୍ଥିତି କ୍ରିଟିକାଲ। ଉଭୟ ଡିଲର ଏବଂ କମ୍ପାନୀଗୁଡିକ ଲାଗି ଏବେ କଷ୍ଟକର ସମୟ। କ୍ଷତିକୁ ସହି ବଢିବା ଏକ ବଡ଼ ଚ୍ୟାଲେଞ୍ଜ। ଭବିଷ୍ୟତକୁ ନେଇ ଲୋକମାନେ ନିଶ୍ଚିତ ହୋଇପାରୁନାହାନ୍ତି। ଏବେ ସମସ୍ତେ କ୍ଷତିରେ ଚାଲୁଥିବାରୁ କମ୍ପାନୀ ଯେତେ ସୁବିଧା ଦେଲେ କ’ଣ ହେବ ଗ୍ରାହକ ଶୋ’ରୁମ୍କୁ ଆସୁ ନ ଥିବାରୁ କିଛି ଫାଇଦା ନାହିଁ। ଏଭଳି ସ୍ଥିତିରେ କାରବାରକୁ ଆଗକୁ ବଢ଼ାଇବା ଚିନ୍ତାଜନକ ହୋଇଛି।
– ପ୍ରମୋଦ ପାତ୍ର, ସ୍ବତ୍ୱାଧିକାରୀ, ୩ଏସ୍ ଟିଭିଏସ୍
-ଦୀର୍ଘଦିନ ଧରି ଶୋ’ରୁମ୍ ବନ୍ଦ ରହିବା ପରେ କିଛିଦିନ ତଳେ କାରବାର ଆରମ୍ଭ ହୋଇଛି। କାରବାର ଏବେ ନାହିଁ। କେବଳ ଜରୁରୀ ଭିତ୍ତିରେ ଲୋକଙ୍କୁ ସେବା ଯୋଗାଣ ହେଉଛି। ଶୀଘ୍ର ବଜାରରେ ସ୍ଥିତି ଫେରିବା ନେଇ ମଧ୍ୟ ସ୍ପଷ୍ଟ ଭାବେ କହି ହେବ ନାହିଁ। ଗ୍ରୀନ୍ ଯୋଜନାରେ ଥିବା ଶୋ’ରୁମ୍ଗୁଡିକୁ ମଧ୍ୟ ଗ୍ରାହକ ଆସିବା ଦେଖାଯାଉନାହିଁ। ଏବେ କରୋନା ମାମଲା ବଢୁଥିବାରୁ ଲୋକଙ୍କ ମନରେ ଭୟ ଭରି ରହିଛି। ଏହାର ପ୍ରଭାବ ଗ୍ରାହକଙ୍କ କ୍ରୟ ନିଷ୍ପତ୍ତି ଉପରେ ପଡ଼ିଛି। କଟକଣା କୋହଳ ହେଉଥିବା ବେଳେ ଲୋକମାନେ ସେହି ଅନୁସାରେ ଶୋ’ରୁମ୍ ଆସିବା ଦେଖାଯାହିଁ। ଚଳିତ ବର୍ଷ ବ୍ୟବସାୟ ଟ୍ରାକ୍କୁ ଆସିବ ବୋଲି ଆଶା ନାହିଁ। ଏଭଳି ସ୍ଥିତିରେ ଆଗକୁ ବଢ଼ିବାକୁ ପଡୁଛି। କାରଣ ହଠାତ୍ ଏମିତି ହେବ ବୋଲି ଜଣା ନ ଥିଲା। କରୋନା ବଜାର ବ୍ୟବସ୍ଥାକୁ ସାଂଘାତିକ ଭାବେ ମାଡ଼ କରିଛି। ଡିଲରପଏଣ୍ଟଗୁଡିକରେ କାରବାର ନ ଥିବା ସତ୍ତ୍ୱେ ଉଭୟ କମ୍ପାନୀ ଏବଂ ଡିଲର କ୍ଷତି ସାମ୍ନା କରୁଛନ୍ତି। ଲୋକଙ୍କୁ ବେତନ ଦେବା, ଭଡ଼ା, ଋଣ ଉପରେ ସୁଧ ଭଳି ଚାପ ବ୍ୟବସାୟ ଲାଗି ବୋଝ ହେଉଛି। ଏଭଳି ଅସୁବିଧାକୁ ସରକାର ନଜରରେ ରଖି ସହାୟତା ଯୋଗାଇଦେବା ଉଚିତ। ଅନ୍ତତଃ ପକ୍ଷେ ବାଣିଜ୍ୟଗୁଡିକୁ ମୋରାଟୋରିୟମ ବାଦ୍ ଅନ୍ୟ ଜରୁରୀ ସୁବିଧା ଦେବା ଆବଶ୍ୟକ। ପ୍ରତ୍ୟକ୍ଷ ନିଯୁକ୍ତି କ୍ଷେତ୍ରରେ ଷ୍ଟାର୍ଟଅପ୍ ଏବଂ ଏମ୍ଏସ୍ଏମ୍ଇ ଭୂମିକା ଗୁରୁତ୍ୱପୂର୍ଣ୍ଣ ରହିଥିବାରୁ ସରକାର ସହାୟତା ଦେଲେ ଚାପ କମ୍ କରିବାରେ ସହାୟକ ହୁଅନ୍ତା। ସରକାର କମ୍ପାନୀଗୁଡ଼ିକ ଲାଗି କିଛି ନିର୍ଦ୍ଦିଷ୍ଟ ଯୋଜନା ହାତକୁ ନେବା ଆବଶ୍ୟକ।
– ହର୍ଷବର୍ଦ୍ଧନ ଦିଦ୍ଓ୍ବାନିଆ, ସହ ପ୍ରତିଷ୍ଠାତା, ଓମ୍ ଜୟ ଇଭି ଲିମିଟେଡ୍
-ଗତ ୪ ଦିନ ହେଲା ଷ୍ଟୋର ଖୋଲିଛି। ରେଡ୍ ଜୋନ୍ ଅରେଞ୍ଜ ଜୋନ ଦ୍ୱନ୍ଦ୍ୱ ରହିଥିବାରୁ ଏବେ କଷ୍ଟମର ଫ୍ଲୋ ନାହିଁ। ଗ୍ରାହକଙ୍କ ଅତି ଜରୁରୀ ଆବଶ୍ୟକତା ଅନୁସାରେ ସେବା ଯୋଗାଇଦେବାକୁ ଧ୍ୟାନ ରଖାଯାଇଛି। ଚଳିତ ବର୍ଷ ବେପାର ଟ୍ରାକ୍କୁ ଫେରି ନ ପାରେ। କାରଣ ଏବେ ଫ୍ୟାକ୍ଟ୍ରିରେ ଉତ୍ପାଦନ ବନ୍ଦ ରହିଛି। ମାଲପତ୍ର ଆସିବା ବ୍ୟାଘାତ ହେଉଛି। ଯାହା ମାଲ ଗୋଦାମରେ ରଖାଯାଇଛି ତାକୁ ବିକ୍ରି କରିବା ଏବେ କଷ୍ଟକର ହେଉଛି। ଗ୍ରାହକ ଆଗକୁ ମଧ୍ୟ ବଡ଼ ଧରଣର କ୍ରୟ କରିବା ନେଇ ଦେଖାଯାଉନାହିଁ। କାରଣ ଲୋକମାନେ ଅର୍ଥ ଖର୍ଚ୍ଚ ନ କରି ନିଜ ପାଖରେ କିଛି ରଖୁଛନ୍ତି। ଆଗକୁ କେବଳ ପର୍ବପର୍ବାଣିରେ ହିଁ କିଛି କାରବାର ରହିବ। ବାକି ସମୟରେ ଶୋ’ରୁମ୍ରେ ଗହଳି ପରିଲକ୍ଷିତ ହୋଇ ନ ପାରେ। ଏବେ ବେପାର ଉପରେ ଯେତିକି ଧ୍ୟାନ ନାହିଁ ସମୟ କେବେ ଠିକ୍ ହେବ ସେ ଚିନ୍ତା ମାଡି ପଡୁଛି। କାରଣ ସମୟ ଠିକ୍ ହେଲେ ଯାଇ ବେପାର ଟ୍ରାକ୍କୁ ଫେରିପାରିବ। ସରକାରଙ୍କ ପକ୍ଷରୁ କୌଣସି ସହାୟତା ନାହିଁ। ବ୍ୟାଙ୍କ ଋଣରେ ସୁଧ ପୂର୍ବବତ ଦେବାକୁ ପଡୁଛି। ଘରଭଡ଼ା, କର୍ମଚାରୀ ଖର୍ଚ୍ଚ ଅନ୍ୟ ପ୍ରସଙ୍ଗକୁ ସରକାର ଧ୍ୟାନଦେବା ଆବଶ୍ୟକ। ସରକାର ବଡ଼ ବଡ଼ ସଂସ୍ଥା ପାଇଁ ପଦକ୍ଷେପ ନେଉଛନ୍ତି। ହେଲେ କ୍ଷୁଦ୍ର ମଧ୍ୟମ ବାଣିଜ୍ୟ ଲାଗି ପଦକ୍ଷେପ ନିଆଯାଉନି। କିଛି ହେଲେ ସୁବିଧା ସରକାର ଦେଉନାହାନ୍ତି।
– ଯୁଗଳ କିଶୋର ଅଗ୍ରଓ୍ବାଲ, ପ୍ରୋପ୍ରାଇଟର,ଆଲିସାନ
-ବଜାରରେ ଏଭଳି ସ୍ଥିତି ଉପୁଜିବ ବୋଲି କେବେ କଳ୍ପନା କରି ନ ଥିଲୁ। ଆମ ଷ୍ଟୋର ରେଡ୍ ଜୋନ୍ରେ ଥିବାରୁ କଟକଣା ଯୋଗୁ ବର୍ତ୍ତମାନ ଖୋଲାଯାଇ ନାହିଁ। ବଜାର ସମ୍ପୂର୍ଣ୍ଣ ପ୍ରଭାବିତ ରହିଛି। କଟକଣା ସମ୍ପୂର୍ଣ୍ଣ କୋହଳ ହେଲେ ମଧ୍ୟ ଗ୍ରାହକ ବଜାରକୁ ଶୀଘ୍ର ଆସିବା ଆଶା କ୍ଷୀଣ। କରୋନା ଭୟ ସମସ୍ତଙ୍କ ମଧ୍ୟରେ ରହିଛି। ଲୋକ କମ୍ ଆସୁଥିବାରୁ ଚଳିତ ବର୍ଷ ବିଶେଷ ଯୋଜନା କରାଯାଇ ନାହିଁ। ବଜାରର ଏଭଳି ସ୍ଥିତି ଆସନ୍ତା ୬ ମାସ ଯାଏ ରହିପାରେ।
– ଅଶ୍ୱିନୀ ପାତ୍ର,ସ୍ବତ୍ୱାଧିକାରୀ, ରିତା ଆଣ୍ଡ ସନ୍ସ
