ପରଜଙ୍ଗ,୨୨ା୬ (ଡି.ଏନ୍.ଏ)- ଢେଙ୍କାନାଳ ବନଖଣ୍ଡ ମହାବିରୋଡ଼ ରେଞ୍ଜ ଡିହଡୋଳ ଫରେଷ୍ଟ ସେକ୍ସନ ଅଧୀନ ସାଆନ୍ଦା ତଳବେରଣା ଗ୍ରାମରେ ଶନିବାର ଭୋର ସମୟରେ ଗ୍ରାମର ପ୍ରମୋଦ ପାଳଙ୍କ ଶୌଚାଳୟ ଟାଙ୍କିରେ ଖସି ପଡିଥିଲେ ମା’ ଓ ଛୁଆହାତୀ। ଏହାକୁ ପରିବାର ଲୋକ ଦେଖି ବନ ବିଭାଗକୁ ଖବର ଦେଇଥିଲେ । ତେବେ କିଛି ସମୟ ପରେ ଉକ୍ତ ଟାଙ୍କିରୁ ମା’ ହାତୀଟି ବାହାରକୁ ବାହାରି ଆସି ଟାଙ୍କି ପାଖରେ ଛିଡା ହୋଇ ଛୁଆହାତୀକୁ ଜଗି ରହିଥିଲା। ସେଠାରେ ବନ ବିଭାଗ ପହଞ୍ଚି ଛୁଆହାତୀଟିକୁ ଟାଙ୍କିର ଗୋଟିଏ ପାର୍ଶ୍ୱ ଶାବଳରେ ତାଡି ଛୁଆହାତୀଟିକୁ ତରୁଆ ସାହାଯ୍ୟରେ ଟେକି ବାହାରକୁ କାଢ଼ିଥିଲେ । କିନ୍ତୁ ନିକଟରେ ମା’ ହାତୀଟି ସେମିତି ତାର ଛୁଆକୁ ଜଗି ରହିଥିଲେ ସୁଦ୍ଧା ଆକ୍ରମଣ କରିବାକୁ ଚେଷ୍ଟା କରି ନ ଥିଲା । ଛୁଆହାତୀ ଉଦ୍ଧାର ପରେ ଉଭୟ ମା’ ଓ ଛୁଆହାତୀ ଜଙ୍ଗଲକୁ ଯାଇଥିଲେ । ଘଟଣା ସ୍ଥଳରେ ମହାବିରୋଡ଼ ରେଞ୍ଜର ହରମୋହନ ନାୟକ, ଫରେଷ୍ଟର ରାମଚନ୍ଦ୍ର ରାଉତ ପହଞ୍ଚି ହାତୀଛୁଆ ଉଦ୍ଧାର କାର୍ଯ୍ୟରେ ସାହାଯ୍ୟ କରିଥିଲେ। ଉକ୍ତ ହାତୀ ପାଇଁ ଅଞ୍ଚଳରେ ଭୟର ବାତାବରଣ ଖେଳିଯାଇଛି ।
