ଠାକୁରମୁଣ୍ଡା,୨୬।୩(ଡି.ଏନ୍.ଏ.): କରୋନା ଭୂତାଣୁ ସଂକ୍ରମଣ ରୋକିବା ଦିଗରେ ରାଜ୍ୟ ଓ କେନ୍ଦ୍ର ସରକାର ମିଳିତ ଭାବରେ ପଦକ୍ଷେପ ଆରମ୍ଭ କରିଥିବା ବେଳେ ମୟୂରଭଞ୍ଜ ଜିଲା ଠାକୁରମୁଣ୍ଡା ଅଞ୍ଚଳରେ ଲକ୍ଡାଉନ୍ର ପ୍ରଭାବ ଦେଖିବାକୁ ମିଳିଛି। ଅପରପକ୍ଷରେ କଟକଣା ନ ମାନିବାରୁ ଠାକୁରମୁଣ୍ଡା ପୋଲିସ ବୁଧବାର ୨ ଜଣଙ୍କୁ ଗିରଫ କରିଥିବା ଗୋଟିଏ ବୋଲେରୋ ଏବଂ ୬ଟି ବାଇକ ଜବତ କରି ଥାନାରେ ଅଟକ ରଖିଛି। ଗିରଫ ୨ ଜଣ ହେଲେ ଆନନ୍ଦପୁର ଥାନା ଅନ୍ତର୍ଗତ ବିଷ୍ଣୁ ହୋ ଓ ପ୍ରହଲ୍ଲାଦ ନାୟକ। ଉଭୟଙ୍କ ନାମରେ ୩୬ ଓ ୩୭/୨୦ରେ ଏକ ମାମଲା ରୁଜୁ ହୋଇଛି। ଲକ୍ଡାଉନ୍ର ଦ୍ୱିତୀୟ ଦିନରେ ଠାକୁରମୁଣ୍ଡା ସମ୍ପୂର୍ଣ୍ଣ ବନ୍ଦ ରହିଥିବା ବେଳେ ପୋଲିସ ପକ୍ଷରୁ ପଇଁତରା ମରାଯାଉଛି। ବଜାର ଅଞ୍ଚଳରେ ଥିବା ଗ୍ରୋସରୀ, ଔଷଧ, କ୍ଷୀର, ଫଳ ଦୋକାନକୁ ଛାଡ଼ି ଅନ୍ୟ ସମସ୍ତ ଦୋକାନ ବନ୍ଦ ରହିଛି। ବିଡିଓ ଶ୍ୟାମ ସୁନ୍ଦର ଟୁଡୁ, ତହସିଲଦାର ପ୍ରଦ୍ୟୁମ୍ନ କୁମାର ନାୟକ, ଠାକୁରମୁଣ୍ଡା ଥାନାଧିକାରୀ ନିରୋଜ କୁମାର ସାମଲ ଉପସ୍ଥିତ ରହି ଲୋକମାନଙ୍କୁ ଘରୁ ନ ବାହାରିବାକୁ ପରାମର୍ଶ ଦେଉଛନ୍ତି।
