କଟକ ଅଫିସ,୧୫ା୭- ପୂର୍ବତଟ ରେଳପଥ ପ୍ରତିଷ୍ଠାନ ପରିସରରେ ଚାଲିଥିବା ରାଜ୍ୟ ୯ ବର୍ଷରୁ କମ୍ ଚେସ ଚାମ୍ପିୟନଶିପ୍ ରବିବାର ଉଦ୍ଯାପିତ ହୋଇଯାଇଛି । ୭ ରାଉଣ୍ଡ ବିଶିଷ୍ଟ ଏହି ପ୍ରତିଯୋଗିତାର ଓପନ ବର୍ଗରେ ୬.୫ ପଏଣ୍ଟ ହାସଲ କରି ପ୍ରତ୍ୟୁଷ ନାୟକ ଚାମ୍ପିୟନ ହୋଇଛନ୍ତି । ବାଳିକା ବର୍ଗରେ ଶ୍ରଦ୍ଧା ସ୍ମରଣିକା ନନ୍ଦ ଓ ଜୟଶ୍ରୀ ବାରିକ ୬ ପଏଣ୍ଟ ଲେଖାଏ ହାସଲ କରିଥିବା ବେଳେ ଟାଇବ୍ରେକର ପଦ୍ଧତିରେ ଶ୍ରଦ୍ଧା ସ୍ମରଣିକା ଚାମ୍ପିୟନ ଟାଇଟଲ ହାସଲ କରିଛନ୍ତି । ଓପନ ବର୍ଗରେ ପ୍ରତିଯୋଗିତାର ଟପସିଡ଼ ଖେଳାଳି ଆୟୁଷ୍ମାନ ମହାନ୍ତି ୬ ପଏଣ୍ଟ ପାଇ ଦ୍ୱିତୀୟ ସ୍ଥାନରେ ରହିଛନ୍ତି। ଶ୍ରୀୟାଂଶ ଦେ, ଜୀବନ ଜ୍ୟୋତି, ବିଶ୍ୱପ୍ରୀତ ରାୟ, ଶ୍ରେୟାଂଶ ହୋତା, ସ୍ବସ୍ତିକ ଶୁଭମ ପଟ୍ଟନାୟକ, ଆୟୁଷ ଆର୍ୟନ ମହାପାତ୍ର, ସିଦ୍ଧାର୍ଥ ମିଶ୍ର, ପ୍ରୀତପାଲ ଷଡ଼ଙ୍ଗୀ ଓପନ ବର୍ଗରେ ୧୦ମ ସ୍ଥାନ ମଧ୍ୟରେ ଅଛନ୍ତି । ବାଳିକା ବର୍ଗରେ ଜୟଶ୍ରୀ ବାରିକ, ସାଇ ସମ୍ପ୍ରଦା ମହାନ୍ତି, ସନ୍ଦୀପା ପ୍ରିୟଦର୍ଶିନୀ ସାହୁ, ଅଂଶିତା ପଟ୍ଟନାୟକ, ଜ୍ୟୋତିକା ସାହୁ, ଶ୍ରଦ୍ଧା ମିଶ୍ର, ପ୍ରତ୍ୟୁଷା ଜେନା, ଶ୍ରୁତି ସ୍ନେହୀ, ସାଇଶା ସ୍ବାଇଁ ଯଥାକ୍ରମେ ୨ୟରୁ ୧୦ମ ସ୍ଥାନରେ ଅଛନ୍ତି। କଟକ ଜିଲା ଚେସ୍ ସଂଘ ଓ ନିଖିଳ ଓଡ଼ିଶା ଚେସ୍ ସଂଘର ମିଳିତ ଆନୁକୂଲ୍ୟରେ ହେଉଥିବା ଏହି ଟୁର୍ନାମେଣ୍ଟର ଉଦ୍ଯାପନୀ ଉତ୍ସବରେ ଅଭିନେତ୍ରୀ ମେଘନା ମିଶ୍ର ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ନିଖିଳ ଓଡ଼ିଶା ଚେସ୍ ସଂଘ ସମ୍ପାଦକ ଦେବବ୍ରତ ଭଟ, ପୂର୍ବତଟ ରେଳବାଇ ପ୍ରତିଷ୍ଠାନର କାର୍ଯ୍ୟକାରୀ ସଭାପତି ଡା. ସେକ୍ ରହେମତୁଲ୍ଲା, ଓ.ପି ମୀନା ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। କଟକ ଜିଲା ଚେସ ସଂଘ ସଭାପତି ବିବେକ ତିବେରୱାଲ ସ୍ବାଗତ ଭାଷଣ ପ୍ରଦାନ କରିଥିଲେ। ସମ୍ପାଦକ ରଞ୍ଜନ ମହାନ୍ତି ଅତିଥି ପରିଚୟ ପ୍ରଦାନ କରିଥିବା ବେଳେ ଉପସଭାପତି ସନ୍ତୋଷ କୁମାର ପୃଷ୍ଟି ଧନ୍ୟବାଦ ଅର୍ପଣ କରିଛନ୍ତି। ରାଜେନ୍ଦ୍ର କୁମାର ସେଠୀଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଅନ୍ତର୍ଜାତୀୟ ଆର୍ବିଟର ତାପସ ମହାନ୍ତି, ନିହାର ରଞ୍ଜନ ସାସମଲ ଖେଳ ପରିଚାଳନା କରିଥିଲେ। ସେକ ମନସୁର ଅଲ୍ଲୀ, ସାହେବ ଅଖତାର ସହାୟତା କରିଥିଲେ ।
