ଅନୁଗୋଳ ଅଫିସ, ୨୦।୭ – ବାରମ୍ବାର ବିବାଦ ଘେରକୁ ଆସୁଛି ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ। କେତେବେଳେ ପରିଚାଳନାଗତ ଅବ୍ୟବସ୍ଥା ତ ଆଉ କେତେବେଳେ ରୋଗୀ ବେଡ୍ରୁ ଉଠି କେଉଁଆଡ଼େ ଚାଲିଯିବା ଘଟଣା ନଜରକୁ ଆସୁଛି। ହେଲେ ଗୁରୁବାର ରାତିରେ ଶବ ସଂରକ୍ଷଣ ଗୃହରେ ଥିବା ଜଣେ ୪ ବର୍ଷର ଶିଶୁକନ୍ୟା ପ୍ରୀତି ଗୋଚ୍ଛାୟତଙ୍କ ମୃତଦେହରୁ ଦୁଇ ଆଖି ଗାଏବ ଅଭିଯୋଗ ଶୁକ୍ରବାର ଆସିବା ପରେ ଏହା ସହରବାସୀଙ୍କ ହୃତ୍ସ୍ପନ୍ଦନ ବଢ଼ାଇ ଦେଇଛି। ଏହି ଘଟଣାକୁ ନେଇ ଦିନତମାମ ମେଡିକାଲରେ ଉତ୍ତେଜନା ଲାଗି ରହିଥିବା ବେଳେ ଜିଲାରେ ମଧ୍ୟ ଚର୍ଚ୍ଚାର କେନ୍ଦ୍ରବିନ୍ଦୁ ହୋଇଛି। ଏପରି କି ଅନୁଗୋଳ ମେଡିକାଲ ଇତିହାସରେ ଏପରି ଘଟଣା ପ୍ରଥମ ବୋଲି କୁହାଯାଉଛି।
ଝିଅ ପ୍ରୀତିଙ୍କ ମୃତ ଶରୀରରୁ ଅତ୍ୟନ୍ତ ଯୋଜନାବଦ୍ଧ ଭାବେ ଆଖି ଚୋରି କରି ନିଆଯାଇଥିବା ତାଙ୍କ ମା’ ଶୀଲା ଗୋଚ୍ଛାୟତ ଅନୁଗୋଳ ଥାନାରେ ଅଭିଯୋଗ କରିଛନ୍ତି। ସେ ଦର୍ଶାଇଛନ୍ତି ଯେ, ଝିଅ ନାକରେ ମଧ୍ୟ କ୍ଷତ ଚିହ୍ନ ରହିଛି। ଡାକ୍ତରଙ୍କ ସମ୍ପୃକ୍ତି ବିନା ଆଖି ତାଡ଼ି ନିଆଯିବା ସମ୍ଭବ ନୁହେଁ। ଏଥିରେ ଏକ ସ୍ବତନ୍ତ୍ର ର଼୍ୟାକେଟ୍ ସମ୍ପୃକ୍ତ ଥିବା ସନ୍ଦେହ କରାଯାଉଛି। ଘଟଣାରେ ଜଡ଼ିତ ଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଶୀଲା ଦାବି କରିଛନ୍ତି। ଅନ୍ୟପକ୍ଷରେ ଗୁରୁବାର ପ୍ରୀତିଙ୍କୁ ମୃତ ଘୋଷଣା କରିଥିବା ଜିଲା ମୁଖ୍ୟ ଚିକିତ୍ସାଳୟର ଡାକ୍ତର ମଧ୍ୟ ସେତେବେଳେ ଝିଅର ଦୁଇ ଆଖି ଠିକ୍ଠାକ୍ ଥିବା ଓ ଶରୀରରେ କୌଣସି କ୍ଷତଚିହ୍ନ ନ ଥିବା ପ୍ରକାଶ କରିଛନ୍ତି। ତେଣୁ ଶବ ରଖାଯିବା ବେଳେ ଭଲ ଥିବା ଆଖି ଦୁଇଟି ଶୁକ୍ରବାର କିପରି କ୍ଷତବିକ୍ଷତ ହୋଇଗଲା ସେ ନେଇ ଶୀଲା ପ୍ରଶ୍ନ କରିଛନ୍ତି।
