ପାଟଣା, ୨୮।୪(ସ୍ବ.ପ୍ର.)-କେନ୍ଦୁଝର ଜିଲା ପାଟଣା ଥାନା ସାହାରପଡା ବ୍ଲକର ଉପାନ୍ତ ଅଞ୍ଚଳ ଡାଳପକା ପଞ୍ଚାୟତ ଗୋପୀନାଥପୁର ଗ୍ରାମରେ ଅଭାବନୀୟ ଘଟଣା କ୍ରମରେ ସାପ କମୁଡାରେ ଜଣେ ବିବାହିତା ମହିଳାଙ୍କର ରବିବାର ଅପରାହ୍ନରେ ମୃତ୍ୟୁ ଘଟିଛି। ମୃତ ମହିଳା ଜଣକ ହେଉଛନ୍ତି ରାମଦାସ ମାଝୀଙ୍କ ସ୍ତ୍ରୀ ଶାନ୍ତିଲତା। ସୂଚନା ଅନୁଯାୟୀ ରବିବାର ଭୋରରେ ଶାନ୍ତିଲତା ଶୋଇଥିବା ବେଳେ ଏକ ଚିତି ସାପ ତାଙ୍କୁ କାମୁଡ଼ିଥିଲା। ପରିବାର ଲୋକେ ୧୦୮ ଆମ୍ବୁଲାନ୍ସକୁ ଯୋଗାଯୋଗ ପାଇଁ କଲ କରିଥିଲେ ହେଁ ଆମ୍ବୁଲାନ୍ସ ଉପଲବ୍ଧ ନ ହେବାରୁ ଘରୋଇ ଗାଡି ମାଲିକଙ୍କ ଗାଡ଼ିରେ କରଞ୍ଜିଆ ନେବାକୁ ଅନୁରୋଧ କରିଥିଲେ। ଲକ୍ଡାଉନ୍ ସକାଶେ ଘରୋଇ ଗାଡି ରୋଗୀ ନେବାକୁ ରାଜି ହୋଇ ନ ଥିଲେ। ଫଳରେ ଶାନ୍ତିଲତା ଘଟଣା ସ୍ଥଳରେ ଛଟପଟ ହୋଇ ଜୀବନ ହାରିଥିଲେ। ଖବର ପାଇ ପାଟଣା ପୋଲିସ ପହଞ୍ଚି ଏକ ଅପମୃତ୍ୟୁ ମାମଲା (ନଂ.୨୧/୨୦) ରୁଜୁ କରି ସୋମବାର ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ମୃତଦେହ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି।
