ଚଣ୍ଡିଖୋଲ,୨୭ା୨(ଡି.ଏନ.ଏ): ଗ୍ରାମ୍ୟ ଉନ୍ନୟନ ବିଭାଗ ଜାରକା ଡିଭିଜନ ଅନ୍ତର୍ଗତ ଚଣ୍ଡିଖୋଲ ସବ୍ଡିଭିଜନରେ ରାସ୍ତା ନିର୍ମାଣ ଓ ମରାମତି ନାମରେ ବ୍ୟାପକ ହରିଲୁଟ ଚାଲିଛି। ଯେଉଁ ରାସ୍ତାକାମ ଟେଣ୍ଡର ଜରିଆରେ ହୋଇଛି, ତାହା ପୁଣି ଏଫ୍-୨ ଜରିଆରେ କରାଯାଇ କୋଟି କୋଟି ଟଙ୍କା ଆମତ୍ସାତ କରାଯାଉଛି। ଜାତୀୟ ରାଜପଥ ୫ନଂରୁ ସୁଙ୍ଗୁଡ଼ା ଭାୟା ଖୋସାଲିପୁର ରାସ୍ତାରେ ଏଭଳି ଘଟଣା ଦେଖିବାକୁ ମିଳିଛି। ଏହି ଘଟଣାର ଭିଜିଲାନ୍ସ ତଦନ୍ତ କରାଯିବାକୁ ଗ୍ରାମବାସୀ ଦାବି କରିଆସୁଥିଲେ ହେଁ କୌଣସି ପଦକ୍ଷେପ ନ ନିଆଯିବା ବିଭାଗୀୟ ଅଧିକାରୀଙ୍କ କାର୍ଯ୍ୟ ସ୍ବଚ୍ଛତା ଉପରେ ପ୍ରଶ୍ନବାଚୀ ସୃଷ୍ଟି ହେଉଛି।
ସୂଚନାଥାଉ କି ୨୦୧୫-୧୬ ଆର୍ଥତ୍କ ବର୍ଷରେ ଏହି ରାସ୍ତା ନିର୍ମାଣ ପାଇଁ ଏକ କୋଟି ୮୬ଲକ୍ଷ ଟଙ୍କା ବ୍ୟୟ ବରାଦ କରାଯାଇଥିଲା। ରାସ୍ତା ନିର୍ମାଣ ଶେଷ ହେବାକୁ ବିଳମ୍ବ ହୋଇଥିଲା। ୨୦୧୭ ଡିିସେମ୍ବର ମାସରେ ରାସ୍ତା ନିର୍ମାଣ ଶେଷ ହୋଇଥିଲା। ଏହା ମଧ୍ୟରେ ଖୋସାଲିପୁର ଗ୍ରାମ ମଧ୍ୟରେ ଓ ସେଠାରୁ ଯାଇଥିବା ଜଳ ସମ୍ପଦ ବିଭାଗ ରାସ୍ତା ନିର୍ମାଣ କରାଯାଇ ନ ଥିଲା। ସମ୍ପୃକ୍ତ ଦୁଇ ରାସ୍ତାକୁ ଛାଡ଼ି ଠିକାଦାର ଅନ୍ୟ କାର୍ଯ୍ୟର ବିଲ୍ ନେଇ ପଳାଇଯାଇଥିଲା। ସରକାରୀ ନିୟମ ଅନୁଯାୟୀ ରାସ୍ତା କାର୍ଯ୍ୟ କରୁଥିବା ଠିକାଦାର ୫ବର୍ଷ ପର୍ଯ୍ୟନ୍ତ ଏହାର ମରାମତି କରିବେ। ହେଲେ ମରାମତି କରିବା ପରିବର୍ତ୍ତେ ଏହାର ବର୍ଷକ ପରେ ସମ୍ପୃକ୍ତ ରାସ୍ତାରେ ୫ଟି ଗୁପ୍ତ ଟେଣ୍ଡର କରାଯାଇ ୨୦ଲକ୍ଷରୁ ଊର୍ଦ୍ଧ୍ୱ ଟଙ୍କା ହଡ଼ପ କରାଯାଇଛି। ୨୮।୨।୧୮ରୁ ୨୭।୩।୧୮ ପାଇଁ ରାସ୍ତା କାର୍ଯ୍ୟ ନାମରେ ୨୪୭ ଏଫ-୨, ୪ଲକ୍ଷ ୩୪ ହଜାର ୭୮୪ ଟଙ୍କା କରାଯାଇଥିବାବେଳେ ଏହି ସମୟରେ ୨୮୮ ଏଫ୍-୨ରେ ୪ଲକ୍ଷ ୩୫ ହଜାର ୧୬୭ ଟଙ୍କା ଖର୍ଚ୍ଚ କରାଯାଇଥିବା ସୂଚନା ଅଧିକାର ତଥ୍ୟରୁ ମିଳିଛି। ସେହିଭଳି ୮।୬।୧୮ ରୁ ୭।୬।୧୮ ମଧ୍ୟରେ ୨ଲକ୍ଷ ୧୬ ହଜାର ୮୭୪ ଟଙ୍କା ଖର୍ଚ୍ଚ କରାଯାଇଥିବା ଦର୍ଶାଯାଇଛି। ଏହା ପରେ ୧୦।୧।୧୯ ରୁ ୯।୨୧୯ ମଧ୍ୟରେ ୧୨୭ ଏଫ-୨, ୧୭୯ ଏଫ୍-୨ ରେ ଦୁଇଟି ଗୁପ୍ତ ଟେଣ୍ଡର କରାଯାଇଛି। ଜଣେ ବ୍ୟକ୍ତିଙ୍କ ନାମରେ ଏହି ଦୁଇଟି ଗୁପ୍ତ ଟେଣ୍ଡର କରାଯାଇଥିବାବେଳେ ଗୋଟିକରେ ୪ଲକ୍ଷ ୩୬ ହଜାର ୬୮୬ଟଙ୍କା ଖର୍ଚ୍ଚ କରାଯାଇଥିବା ଦର୍ଶାଯାଇଛି। ଅନ୍ୟଟିରେ ୪ଲକ୍ଷ ୩୭ହଜାର ୬୯୬ ଟଙ୍କା ଖର୍ଚ୍ଚ ହୋଇଥିବା ବିଭାଗ ପକ୍ଷରୁ ଦର୍ଶାଯାଇଛି। ଏହି ୫ଗୋଟି ଗୁପ୍ତ ଟେଣ୍ଡର ଜରିଆରେ ଜାତୀୟ ରାଜପଥ ୫ନଂମ୍ବର ଠାରୁ ସୁଙ୍ଗୁଡ଼ା ଭାୟା ଖୋସାଲିପୁର ପର୍ଯ୍ୟନ୍ତ ୨୦ଲକ୍ଷ ଟଙ୍କା ଖର୍ଚ୍ଚ କରାଯାଇଥିବା କାଗଜ ପତ୍ରରେ ଦର୍ଶାଯାଇଥିଲାବେଳେ ପ୍ରକୃତ ପକ୍ଷେ ଏହା ଖର୍ଚ୍ଚ ହୋଇ ନାହିଁ। ଏହି ରାସ୍ତାଟିକୁ ୨୦୧୭ ସୁଦ୍ଧା ଯେଉଁ ନିର୍ମାଣ କରାଯାଇଛି ସେଥିମଧ୍ୟରୁ ୬୦ଭାଗ କଂକ୍ରିଟ ରାସ୍ତା ହୋଇଥିବାବେଳେ ୪୦ଭାଗ ପିଚୁ ରହିଛି। ତେବେ କିଭଳି ଭାବରେ ସମ୍ପୃକ୍ତ ରାସ୍ତାରେ ପୁନଃର୍ବାର ଗୁପ୍ତ ଟେଣ୍ଡର ଜରିଆରେ ଏତେ ଟଙ୍କା ଖର୍ଚ୍ଚ କରାଗଲା ସେ ନେଇ ଗ୍ରାମବାସୀ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଏତେ ଟଙ୍କା ଖର୍ଚ୍ଚ କରାଯାଇଥିଲେ ବି ବର୍ତ୍ତମାନ ରାସ୍ତାର ଅବସ୍ଥା କହିଲେ ନ ସରେ। ବିଭିନ୍ନ ସ୍ଥାନରୁ କଂକ୍ରିଟ ଓ ପିଚୁ ଉଠିଗଲାଣି। ଏହି ରାସ୍ତା କାମର ଭିଜିଲାନ୍ସ ତଦନ୍ତ କରାଗଲେ ଟଙ୍କା ଆତ୍ମସାତ ସମ୍ପର୍କରେ ଜଣାପଡ଼ିବ ବୋଲି ଗ୍ରାମବାସୀ ପ୍ରକାଶ କରିଛନ୍ତି। ଏ ସମ୍ପର୍କରେ ଚଣ୍ଡିଖୋଲ ଗ୍ରାମ୍ୟ ଉନ୍ନୟନ ବିଭାଗ ସହକାରୀ ନିର୍ବାହୀ ଯନ୍ତ୍ରୀ ତୁଳସୀ ପାତ୍ରଙ୍କୁ ପଚାରିବାରେ କେତେ ଟଙ୍କା କେଉଁ ସମୟରେ ଖର୍ଚ୍ଚ ହୋଇଛି ତାହା ଠିକ୍ ଭାବେ କହିପାରିବି ନାହିଁ। କାଗଜ ପତ୍ର ଦେଖିବାପରେ ଜଣାଇବି ବୋଲି ପ୍ରକାଶ କରିଛନ୍ତି।
