ଭବାନୀପାଟଣା,୨୪।୧(ଡି.ଏନ୍.ଏ.): ଝାର ଜଂଗଲ, ପାହାଡ଼ ପରବତ ଘେରା କଳାହାଣ୍ଡି ଜିଲାରେ ସୁଆଧୀନତାର ୭୦ ବଛର ଉତାରୁ ବି ଅନେକ ଗାଁଗଁଡ଼ାର ଲୋକ୍ ମଉଲିକ୍ ସୁବିଧା ସୁଯୋଗରୁ ବଁଚିତ୍ ହେଇ ରହିଛନ୍। ସମିଆ ଅସମିଆରେ ଇମାନକର ଲାଗି ଭଗବାନ ହିଁ ସାହାଭରସା। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ଜିଲାର ଲାଞ୍ଜିଗଡ଼ ବ୍ଲକ ତ୍ରିଲୋଚନପୁର ପଁଚେତ୍ ଅଧୀନ ଆମଠାପଦର ଗାଁରେ।
ସୂଚନା ଅନ୍ସାରେ ଆମଠାପଦର ଗାଁରେ ୩୦ ପରିବାରର ପାଖାପାଖି ୨ଶହ ଲୋକ୍ ବାସ୍ କରୁଛନ୍। ହେଲେ ଗଁାବାସୀ ସବୁପରକାର ମଉଲିକ୍ ସୁବିଧା ସୁଯୋଗରୁ ବଁଚିତ୍ ଥିବାର ଅଭିଯୋଗ କରିଛନ୍। ଗାଁରେ ଲୁକ୍କର ପିଇଲା ପାଏନ୍ ସୁବିଧା ଲାଗି ଗୁଟେ ନଲ୍ଚୁଅଁା ରହିଛେ। ହେଲେ ଗଁାର ଲୋକ୍ ସଂଖ୍ୟା ହିସାବେ ଲୁକ୍କୁ ନଲ୍ଚୁଅଁାର ପାଏନ୍ ନିଅଁଟ ପଡ଼ୁଛେ। ଏନ୍ତାଥି ଗଁାବାସୀ ନିୟମଗିରି ପାହାଡ଼ରୁ ଝରି ଆସୁଥିବାର ଝରନ୍ର ପାଏନ୍ ଉପରେ ନିରଭର କରୁଛନ୍। ସେନ୍ତା ପଁଚେତ୍ ଅଫିସନୁ ୪ କି.ମି. ଦୂରେ ରହିଥିବାର ଇ ଗଁାକେ ଯିବାର ଆଏବାର ଲାଗି ଫିଦିନିଅଁା ରାସ୍ତାଟେ ନଁାଇଁନ। ଯଦି ବି ଦିନାକେତେ ତଲେ ଗଁାକେ ରାସ୍ତା ତିଆରି ହେଇଛେ ବାଟେ ଗୁଟେ ନାଲ୍ ରହିଛେ। ନାଲ୍ ଉପରେ ପୁଲିଆ ନାଇଁଥିବାର ଲୋକ୍ ନାନା ସମସିଆର ସାମନା କରୁଛନ୍। ଏନ୍ତାଥି ଗାଁବାସୀ ସମିଆ ଅସମିଆରେ ଜରୁରୀକାଲିନ ସେବାରୁ ବଁଚିତ୍ ହେଉଛନ୍। ଗାଁରେ କିଏ ରୋଗ୍ଦୁଖ୍ରେ ପଡ଼ଲେ, ଗରଭ୍ବତୀ ମହିଲାକୁଁ ଡାକ୍ତରଖାନା ନେବାକେ ହେଲେ ଖଟେ ବୁହିକରି ନେବାକେ ପଡ଼ୁଛେ। ରାସ୍ତାରେ ଥିବାର ନାଲ୍ ଉପରେ ଗୁଟେ ପୁଲିଆ ତିଆରିବାକେ ଗାଁବାସୀ ଅନେକ ସମିଆରେ ପରଶାସନକେ ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ଏନ୍ତାଥି ବରଷା ଦିନେ ଗାଁବାସୀ ପୂରା ଜଲ୍ବଁଦି ଅବସ୍ତାରେ ରହୁଥିବାର କହିଛନ୍। ଇଆଡ଼େ ଗାଁରେ ଗୁଟେ ଅଙ୍ଗନଓ୍ବାଡି କେନ୍ଦ୍ର ନାଇଁଥିବାର ଲାଗି ଗାଁର ଛୁଆମାନେ ୪ କି.ମି. ଜଂଗଲି ରାସ୍ତାରେ ଗଉଡ଼ ଥୁଆଗୁଡ଼ା କେନ୍ଦ୍ରକେ ପଢ଼ି ଯାଉଛନ୍। ଦେଶ ସୁଆଧୀନ ହେବାର ୭୦ ବଛର ବିତିଯାଇଥିଲେ ବି ଗାଁବାସୀକର ଲାଗି ବିଜଲିବତୀ ସାତ୍ସପନ ହେଇ ରହିଛେ। ସେନ୍ତା ଗଁାର ଅନେକ ହକ୍ଦାର ହିତାଧିକାରୀ ଭତା, ଆବାସ ଯୋଜନାରୁ ବଁଚିତ୍ ଥିବାର ଅଭିଯୋଗ କରିଛନ୍। ଜିଲା ପରଶାସନ ଆମଠାପଦର ଗାଁ ଉପରେ ଦୁରୁଷ୍ଟି ଦେଇ ମଉଲିକ୍ ସୁବିଧା ସୁଯୋଗ ସଂଗେ ଲୁକ୍କୁ ସରକାରୀ ସୁବିଧା ଯୁଗେଇ ଦେବାକେ ଗଁବାସୀ ଦାବି କରିଛନ୍।
