ଚାନ୍ଦବାଲି,୮।୭(ଡି.ଏନ୍.ଏ.) : ଭଦ୍ରକ ଜିଲା ଅଧୀନସ୍ଥ ଚାନ୍ଦବାଲି ଅଞ୍ଚଳର ବିଭିନ୍ନ ସମସ୍ୟାର ସମାଧାନ ପାଇଁ ମୋଦିସେନା ସେବା ସଂଘ ପକ୍ଷରୁ ଉଦ୍ୟମ ଆରମ୍ଭ ହୋଇଛି। ଏହିକ୍ରମରେ ୫ଦଫା ଦାବି ନେଇ ସୋମବାର ସେବା ସଂଘର ଶତାଧିକ ସମର୍ଥକ ଚାନ୍ଦବାଲି ତହସିଲ ସମ୍ମୁଖରେ ଗଣଧାରଣା ଦେଇଛନ୍ତି। ସୂଚନାଯୋଗ୍ୟ ଯେ, ଦାବି ସମ୍ପର୍କରେ ସେବାସଂଘ ପକ୍ଷରୁ ପୂର୍ବରୁ ବିଭାଗୀୟ ମନ୍ତ୍ରୀ ଓ ଜିଲା ପ୍ରଶାସନକୁ ଅବଗତ କରିବା ସହିତ ଖବରଦାତା ସମ୍ମିଳନୀ ଆୟୋଜିତ ହୋଇଥିଲା। ମାତ୍ର ଏଥିରେ କୌଣସି ସୁଫଳ ନ ମିଳିବାରୁ ଗଣଧାରଣା ଆରମ୍ଭ ହୋଇଛି।ସେମାନଙ୍କ ଦାବିକୁ ସମର୍ଥନ ଜଣାଇ ଚାନ୍ଦବାଲିର ବିଭିନ୍ନ ସଂଗଠନର କର୍ମକର୍ତ୍ତାମାନେ ଧାରଣାସ୍ଥଳରେ ବସି ରହିଥିବାର ଦେଖିବାକୁ ମିଳିଛି। ଧାମରା ଆଦାନୀ ବନ୍ଦରରେ ସ୍ଥାନୀୟ ବେକାର ଯୁବତୀ ଯୁବକଙ୍କୁ ନିଯୁକ୍ତି, ଚାନ୍ଦବାଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଖାଲି ପଡ଼ିଥିବା ଡାକ୍ତର ନିଯୁକ୍ତି, ବିପଦସଂକୁଳ ବୈତରଣୀ ନଦୀର ବିଜୁସେତୁର ମରାମତି, ଚାନ୍ଦବାଲି ବ୍ଲକରେ ବିଭିନ୍ନ ଲୋକ ହିତକର ଯୋଜନାର ସଫଳ ରୂପାୟନ, ଚାନ୍ଦବାଲିରେ ସବ୍ଜଜ୍ କୋର୍ଟ ସ୍ଥାପନ ଭଳି ଦାବି କରାଯାଇଛି। ବିଶ୍ୱକେଶରୀ ମହାନ୍ତି, ମହେଶ୍ୱର ରାଉଳ, ଧନେଶ୍ୱର ରାଉତ, ଅମୀୟ କୁମାର ସାହୁ, କୃଷ୍ଣଚନ୍ଦ୍ର ନାୟକ, ସୁଶୀଲ କୁମାର ବାରିକ୍ ପ୍ରମୁଖ ଏହି ଗଣଧାରଣାରେ ସାମିଲ ହୋଇଛନ୍ତି।
