ପ୍ରତିବର୍ଷ ଜୁଲାଇ ୧୨ରେ ସାରା ବିଶ୍ୱରେ ପାଳନ ହୋଇଆସୁଛି ‘ବିଶ୍ୱ ପେପର(କାଗଜ) ବ୍ୟାଗ ଦିବସ’। ଚଳିତ ମାସ ଜୁଲାଇ ୩ରେ ‘ଅନ୍ତର୍ଜାତୀୟ ପ୍ଲାଷ୍ଟିକ ବ୍ୟାଗ ମୁକ୍ତ ଦିବସ’ ପାଳିତ ହୋଇଯାଇଥିବା ବେଳେ, ଏହି ଦିବସଟି ଆମକୁ ପ୍ଲାଷ୍ଟିକର ଏକ ସୁନ୍ଦର ଏବଂ ପରିବେଶ ଅନୁକୂଳ ବିକଳ୍ପ ଆପଣାଇବାକୁ ସ୍ମରଣ କରାଇଦିଏ। ଆଜିର ସମୟରେ ପରିବେଶ ପ୍ରଦୂଷଣ ଯେଉଁଭଳି ଭାବେ ବଢ଼ିଚାଲିଛି, ସେଥିରେ କାଗଜ ବ୍ୟାଗର ବ୍ୟବହାର କେବଳ ଏକ ବିକଳ୍ପ ନୁହେଁ, ବରଂ ଏକ ଜରୁରୀ ଆବଶ୍ୟକତା ପାଲଟିଛି।
କାଗଜ ବ୍ୟାଗ୍ର ଇତିହାସ ବେଶ ଆକର୍ଷଣୀୟ। ଏହା ପଛରେ ରହିଛି କିଛି ମହାନ ଉଦ୍ଭାବନର କାହାଣୀ:୧୮୫୨: ଆମେରିକାର ଫ୍ରାନ୍ସିସ ୱେଲ ପ୍ରଥମ କରି କାଗଜ ବ୍ୟାଗ ତିଆରି କରିବା ମେସିନ ସ୍ଥାପନ କରିଥିଲେ।
୧୮୫୯ (ଜୁଲାଇ ୧୨): ୱିଲିୟମ ଗୁଡ୍ଡେଲ କାଗଜକୁ ସହଜରେ ଭାଙ୍ଗି ବ୍ୟାଗ ତିଆରି କରିବାର ଏକ ସ୍ୱତନ୍ତ୍ର ପଦ୍ଧତିର ପ୍ୟାଟେଣ୍ଟ ହାସଲ କରିଥିଲେ। ସେହି ସ୍ମୃତିରେ ଜୁଲାଇ ୧୨କୁ ବିଶ୍ୱ ପେପର ବ୍ୟାଗ ଦିବସ ଭାବେ ଚୟନ କରାଯାଇଛି।
୧୮୭୦: ମାର୍ଗାରେଟ ଇ. ନାଇଟ (ଯାହାଙ୍କୁ ‘ଗ୍ରୋସେରି ବ୍ୟାଗ୍ର ମାତା’ କୁହାଯାଏ) ଏଭଳି ଏକ ମେଶିନ ତିଆରି କଲେ, ଯାହା ଦ୍ୱାରା ଚାରିକୋଣିଆ ଏବଂ ସମତଳ ତଳ ଭାଗ ଥିବା ବ୍ୟାଗ୍ ତିଆରି ହୋଇପାରିଲା।
କାଗଜ ବ୍ୟାଗ କାହିଁକି ଶ୍ରେଷ୍ଠ-
ଶୀଘ୍ର ମାଟିରେ ମିଶିଯାଏ: ଗୋଟିଏ ପ୍ଲାଷ୍ଟିକ ବ୍ୟାଗ୍କୁ ମାଟିରେ ମିଶିବା ପାଇଁ ପ୍ରାୟ ୫୦୦ ବର୍ଷ ଲାଗୁଥିବା ବେଳେ, ଗୋଟିଏ କାଗଜ ବ୍ୟାଗ ମାତ୍ର ୧ ମାସ ମଧ୍ୟରେ ସମ୍ପୂର୍ଣ୍ଣ ରୂପେ ମାଟିରେ ମିଶି ସାର ହୋଇଯାଏ।
ପୁନଃ ବ୍ୟବହାର ଯୋଗ୍ୟ: ଗୋଟିଏ କାଗଜ ବ୍ୟାଗ୍ର ଫାଇବରକୁ ଆମେ ୫ ରୁ ୭ ଥର ପର୍ଯ୍ୟନ୍ତ ପୁନର୍ୱାର ନୂଆ କାଗଜ ସାମଗ୍ରୀ ତିଆରିରେ ବ୍ୟବହାର କରିପାରିବା।
ଜୀବଜନ୍ତୁଙ୍କ ପାଇଁ ସୁରକ୍ଷିତ: ପ୍ଲାଷ୍ଟିକ ଭଳି ଏହା ଗୋରୁ କିମ୍ୱା ସାମୁଦ୍ରିକ ଜୀବଙ୍କ ପେଟକୁ ଯାଇ ସେମାନଙ୍କ ମୃତ୍ୟୁର କାରଣ ସାଜେ ନାହିଁ କିମ୍ୱା ମାଇକ୍ରୋପ୍ଲାଷ୍ଟିକ ସୃଷ୍ଟି କରେ ନାହିଁ।
ଏବେ ସହରର ବିଭିନ୍ନ ସପିଂ ମଲ, ଲାଇଫ୍ ଷ୍ଟାଇଲ ଷ୍ଟୋର୍ ଏବଂ ବ୍ରାଣ୍ଡେଡ ଆଉଟ୍ଲେଟ୍ ଗୁଡ଼ିକରେ ଏବେ ପ୍ଲାଷ୍ଟିକ ବଦଳରେ କାଗଜ ବ୍ୟାଗ ଦିଆଯାଉଛି। କେବଳ ସେତିକି ନୁହେଁ, ଅନେକ ସ୍ଥାନୀୟ ମହିଳା ସ୍ୱୟଂ ସହାୟିକା ଗୋଷ୍ଠୀ ପୁରୁଣା ଖବରକାଗଜ ଏବଂ ବ୍ରାଉନ ପେପର ବ୍ୟବହାର କରି ସୁନ୍ଦର ସୁନ୍ଦର କାଗଜ ବ୍ୟାଗ୍ ତିଆରି କରୁଛନ୍ତି, ଯାହା ସେମାନଙ୍କୁ ସୱାବଲମ୍ୱୀ କରିବାରେ ସାହାଯ୍ୟ କରୁଛି।
ଆଜିଠାରୁ ସଂକଳ୍ପ ନେବା- ବଜାରକୁ ଗଲାବେଳେ ସାଙ୍ଗରେ କପଡ଼ା ବା କାଗଜ ବ୍ୟାଗ୍ ନେଇଯିବା ଅଭ୍ୟାସ କରିବା।
