ମୁମ୍ବାଇ: ୨୦୦୫ରେ ରିଲିଜ୍ ହୋଇଥିବା ଫିଲ୍ମ ‘ଦସ’ର ଗୀତ ‘ଦସ ବହାନେ କରକେ ଲେ ଗୟା ଦିଲ’ ଆଜିବି ଦର୍ଶକଙ୍କୁ ମତୁଆଲା କରେ। ଏବେ ପୁଣିଥରେ ଏହା ନୂଆ ରୂପରେ ରିଲିଜ୍ ହୋଇଛି। ଫିଲ୍ମ ‘ବାଗି ୩’ ପାଇଁ ଏହାର ରିମେକ୍ କରାଯାଇଛି। ଏଥିରେ ଟାଇଗର ଶ୍ରଫ ମୁଖ୍ୟ ଭୂମିକାରେ ନଜର ଆସିଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଏହି ଗୀତର ସଙ୍ଗୀତକାର, ଗୀତିକାର ଓ ଗାୟକଙ୍କୁ ପରିବର୍ତ୍ତନ କରାଯାଇ ନାହିଁ। ସେଥିପାଇଁ ଏହାର ଗୀତିକାର ପଞ୍ଛି ଜଲୋନବି ଏହି ରିମିକ୍ସକୁ ନେଇ ଖୁସି ପ୍ରକାଶ କରିଛନ୍ତି। ସାଧାରଣତଃ ରିମିକ୍ସ ସମୟରେ ପୂର୍ବରୁ ସଙ୍ଗୀତକାର, ଗୀତିକାର ଓ ଗାୟକ ଆଦିଙ୍କୁ ବଦଳାଇ ଦିଆଯାଇଥାଏ। ଏହାକୁ ନେଇ ପଞ୍ଛି କହିଛନ୍ତି ମୋ ପାଇଁ ଏହା ଗର୍ବର ବିଷୟ ଯେ ରିମିକ୍ସରେ ବି ମୋତେ ସୁଯୋଗ ଦିଆଯାଇଛି। ଏଥିରେ ବିଶେଷ କିଛି ପରିବର୍ତ୍ତନ କରାଯାଇ ନ ଥିଲେ ମଧ୍ୟ ଏହା ଦର୍ଶକ ତଥା ଶ୍ରୋତାଙ୍କୁ ମନୋରଞ୍ଜନ ଦେବ ବୋଲି ସେ କହିଛନ୍ତି।
